«Pamiž Biełaruśsiu i Rasijaj uźnik nievyrašalny kryzis davieru»

Kanfierencyja prajšła 26 studzienia na bazie Vyšejšaj škoły ekanomiki — libieralnaj maskoŭskaj VNU. Sustreču zładziŭ palitołah Andrej Suzdalcaŭ, jaki ŭ 2006 hodzie byŭ departavany ź Biełarusi praz toje, što «ŭjaŭlaŭ pahrozu nacyjanalnaj biaśpiecy krainy».

U Maskvu było zaprošana dastatkova šmat biełaruskich palitykaŭ (Karatkievič, Karač, Kalakin, Jarašuk), zatoje nie pryjšoŭ nichto ź biełaruskich dypłamataŭ. Choć zaprašeńni dasyłalisia Paŭłu Lohkamu — byłomu kiraŭniku pres-słužby Łukašenki, a siońnia daradcu-pasłańniku pry pasolstvie Biełarusi ŭ Maskvie. Nie adhuknulisia i praŭładnyja palitołahi, naprykład Siarhiej Kizima, a taksama člen savieta respubliki Juryj Siańko.

Zatoje było dastatkova šmat pradstaŭnikoŭ rasijskich struktur, choć i nie vierchnich ešałonaŭ. Byli pradstaŭniki kramloŭskaj administracyi, a taksama śpiecsłužbaŭ. Choć hetyja ludzi i nie vystupali ŭ jakaści pramoŭcaŭ, a byli słuchačami.

Z vysokich vystupoŭcaŭ byŭ tolki namieśnik ministra finansaŭ Rasii Siarhiej Starčak. U svaim słovie jon adznačyŭ, što supracoŭnictva ź biełaruskim bokam jaho zadavalniaje, nijakich pretenzij jon vykazać nie moža.

Z peŭnaj ahavorkaj da pradstaŭnikoŭ rasijskaj ułady možna adnieści Aleha Niemienskaha — supracoŭnika Rasijskaha instytuta stratehičnych daśledavańniaŭ. RISD — heta anałah biełaruskaha Infarmacyjna-analityčnaha centra, u jaho abaviazki ŭvachodzić infarmacyjnaje zabieśpiačeńnie Administracyi prezidenta RF, Savieta Fiederacyi, Dziaržaŭnaj Dumy. Niemienski ličycca rasijskim śpiecyjalistam pa Biełarusi i Ukrainie.

Jakraz z vusnaŭ Niemienskaha hučała, što ŭ Biełarusi ŭzrastajuć antyrasijskija nastroi, a ŭłada razvaročvajecca ŭ bok Zachadu. Niemienski škadavaŭ, što Rasija «nie ŭkładvaje hrošaj» u apracoŭku biełaruskaj moładzi. A paharšeńnie adnosin, na dumku Niemienskaha, adbyvajecca praź vinu rasijskaha boku, jaki «zanadta spakojna stavicca da vybrykaŭ kiraŭnika Biełarusi». Prykładna ŭ takim samym duchu havaryŭ ahladalnik «Rośsii siehodnia» Raścisłaŭ Iščanka.

«Mnie heta nahadvała, jak Žul Viern moh talenavita apisvać fłoru i faŭnu krain, jakija nikoli nie naviedvaŭ, — dzielicca ŭražańniami biełaruski palityčny ahladalnik Raman Jakaŭleŭski. — Hetaksama i hetyja «mazhaviedy» majuć pra Biełaruś dastatkova apasrodkavanaje ŭjaŭleńnie».

Pa słovach Jakaŭleŭskaha, padobnaja kanfierencyja mahła adbycca tolki ŭ Maskvie, bo mnohija rasijskija ekśpierty prosta bajacca jechać u Biełaruś paśla vypadku ź mieniedžaram «Urałkalija» Uładzisłavam Baŭmhiertnieram.

Pa skančeńni kanfierencyi jaje arhanizatar Andrej Suzdalcaŭ na sajcie politoboz.com nadrukavaŭ kamiunikie z karotkimi vysnovami. Biełaruś adychodzić ad sajuza z Rasijaj — taki jaho lejtmatyŭ. Adznačajecca, što ŭ častki biełaruskaha hramadstva ŭzrastajuć antyrasijskija nastroi, na dziaržpracu nie biaruć ludziej, što atrymali adukacyju ŭ Rasii albo majuć simpatyi da hetaj krainy (choć na samaj spravie ŭsie viarchi biełaruskaha vojska — vypuskniki Akademii Hienštaba Rasii). Asabliva źviartaje ŭvahu, što pamiž Biełaruśsiu i Rasijaj «uźnik nievyrašalny pry siońniašnim biełaruskim kiraŭnictvie kryzis davieru». Uźnikaje pytańnie: heta ŭsio ž pryvatnaja dumka aŭtaraŭ ci pramacvańnie hleby?

Pavialičyć

«Vysnovy vynikovaha kamiunikie, padrychtavanaha kalektyvam arhanizataraŭ kanfierencyi na asnovie analizu vystupleńniaŭ dakładčykaŭ mierapryjemstva, mohuć častkova nie supadać ź mierkavańniami ŭdzielnikaŭ kanfierencyi», — adznačajecca pry kancy.

Faktyčna ž vychodzić, što pad takimi vysnovami padpisali ŭsich udzielnikaŭ kanfierencyi.

Što tyčycca niejkich bytavych umoŭ, to ničoha asablivaha ŭ Maskvie nie było. Udzielniki pryjazdžali roŭna na adzin dzień, biez načoŭki. Ikry i inšych dalikatesaŭ udzielnikam nie prapanoŭvali, jak heta byvała ŭ sytyja hady. Navat harełku «Bajkał» na viačeru davodziłasia kuplać za svaje hrošy.

• 0
• 0
• 0
• 0
• 0
• 0
• 0
• 0