Viarchoŭny sud ZŠA dazvoliŭ uzłom kampjutaraŭ va ŭsim śviecie
Viarchoŭny sud ZŠA ŭchvaliŭ papraŭki ŭ zakanadaŭstva, jakija dajuć pravaachoŭnym orhanam prava na dostup da kampjutaraŭ, jakija znachodziacca ŭ lubym miescy, navat za miažoj.
Raniej sankcyju na takija «vobšuki» kampjutaraŭ davali mahistraty ŭ miežach jurysdykcyi svajho suda, jakaja niaredka ŭklučaje ŭ siabie tolki niekalki hrafstvaŭ.
U ministerstvie justycyi ZŠA zajaŭlajuć, što papraŭki nieabchodnyja dla ŭdaskanaleńnia zakanadaŭstva ŭ ličbavym stahodździ.
Adnak krytyki śćviardžajuć, što novaŭviadzieńni pašyrajuć paŭnamoctvy FBR pa ŭzłomie kampjutarnych sietak.
Ministerstva justycyi vystupaje za toje, kab sudździ mahli davać sankcyi na dostup da kampjutaraŭ, raźmieščanym u lubym miescy, na jakoje raspaŭsiudžvajecca jurysdykcyja ZŠA, u tym liku i za miežami krainy.
Addaleny vobšuk, jak praviła, uklučaje ŭ siabie ŭzłom kampjutara padazravanaha z metaj vyvučyć infarmacyju, jakaja zachoŭvajecca ŭ im.
Ministerstva justycyi damahajecca źmianieńniaŭ u zakanadaŭstvie z 2013 hoda, śćviardžajučy, što złačyncy mohuć chavać abo maskiravać svajo miescaznachodžańnie i asobu ŭ internecie, što ŭskładniaje vyśviatleńnie jurysdykcyi, jakaja adnosicca da ich.
«Adziny dastupny sposab»
«Ciapier u złačyncaŭ jość dostup da daskanałych technałohij ananimizacyi, z dapamohaj jakich jany chavajuć svaju asobu, ździajśniajučy złačynstva ŭ internecie», — zajaviŭ pradstaŭnik ministerstva Piter Kar.
«Časta addaleny vobšuk — adziny dastupny pravaachoŭnym orhanam sposab apaznać ich, — praciahnuŭ Kar. — U papraŭkach vyrazna prapisana, što tradycyjnyja praviły — najaŭnaść dastatkovaj padstavy i apaviaščeńnie — zastajucca ŭ sile».
U ministerstvie taksama śćviardžajuć, što novaŭviadzieńni nie nadzialajuć pravaachoŭnyja orhany nijakimi novymi paŭnamoctvami, jakija nie praduhledžanyja isnujučym zakanadaŭstvam.
Adnak krytyki papravak, u pryvatnaści Amierykanski sajuz abarony hramadzianskich svabod (ACLU), nastojvajuć, što źmieny ŭ zakonie mohuć pašyryć mahčymaści FBR pa maštabnym uzłomie kampjutarnych sietak.
«Tysiačy ci miljony kampjutaraŭ»
«Takoje značnaje źmianieńnie zakona nie pavinna prajści mima Kanhresa pad prykryćciom pracesualnaj normy», — kaža Niima Sinhch Hulijani z ACLU.
U 2015 hodzie karparacyja Google taksama vystupała suprać papravak, jakija, pa słovach jaje pradstaŭnikoŭ, «pahražajuć padarvać prava na tajamnicu pryvatnaha žyćcia i kampjutarnuju biaśpieku internet-karystalnikaŭ».
Sienatar ad štata Arehon Ron Uajden zajaviŭ, što novaŭviadzieńni buduć mieć značnyja nastupstvy dla asabistaha žyćcia amierykancaŭ, i paabiacaŭ dabivacca admieny rašeńnia.
«Zhodna z prapanavanymi normami, urad zmoža atrymać usiaho tolki adzin order na dostup i pieratrus adrazu tysiač ci miljonaŭ kampjutaraŭ. Pry hetym pieravažnaja bolšaść hetych kampjutaraŭ buduć naležać achviaram kibierzłačynstvaŭ, a nie samim złačyncam», -= havorycca ŭ jaho zajavie.
U Kanhresa ŭsio jašče jość mahčymaść adchilić abo ŭnieści źmieny ŭ papraŭki da 1 śniežnia, kali jany aficyjna nabuduć moc.
Ciapier čytajuć
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»14
Kamientary