Biełarusy skardziacca na jakaść ajčynnych tavaraŭ — biełaruskaja vopratka ci technika nabyvajecca ŭ vypadku, kali niama hrošaj na impartny anałah. Tym časam u susiedziaŭ «biełaruskaje» stała sinonimam jakasnaha i dobraha praduktu. Naprykład, va Ukrainie isnuje ŭžo ceły šerah psieŭdabiełaruskich brendaŭ, jakija vykarystoŭvajuć jak biełaruskuju simvoliku, tak i biełaruskuju movu. I dobra pradajucca!
«Biełaja biaroza»
Adnymi ź pieršych «ukrainskich biełarusaŭ» stali vytvorcy maroziva pad nazvaj «Biełaja biaroza» (jano nazyvajecca mienavita tak, pa-biełarusku). Pryčym navat sajt zarehistravali ŭ zonie.by.
«Nazva «Biełaja Biaroza» kaža pra toje, što my rodam ź Biełarusi, choć hlebu dla ŭkaranieńnia i stanaŭleńnia brenda my znajšli ŭ haścinnaj Ukrainie! I heta niezdarma!
Vyrablać sapraŭdny biełaruski płambir na radzimie, a potym pastaŭlać jaho va Ukrainu, uličvajučy adlehłaść dastaŭki, mytnyja pracedury, adsutnaść aptymalna raźmieščanych śpiecyjalizavanych chaładzilnych składoŭ i ŭsie dalejšyja łahistyčnyja dziejańni, a taksama vydatkavany čas, mohuć niehatyŭna adbicca na jakaści praduktu.
Tamu, majučy aryhinalnyja receptury i adrodžanyja technałohii vytvorčaści maroziva, a taksama majučy mahčymaść pastaŭlać ź Biełarusi asnoŭnuju syravinu, my źviarnulisia da viadučych vytvorcaŭ maroziva va Ukrainie, i paśpiachova vyrablajem jaho ŭ «niepasrednaj blizkaści» ad spažyŭca!» — tłumačać vytvorcy.
Brend nabyŭ papularnaść — siońnia pad hetaj handlovaj markaj pradajucca ŭžo i pielmieni, i vareniki. Vyrablajecca «Biełaja Biaroza» ŭ Adesie, Krapiŭnickim i Dniapry.
Praŭda, ukrainskich vytvorcaŭ trochi padviali viedy sučasnaj hieahrafičnaj nazvy našaj krainy. Na sajcie kampanii to tut, to tam praskokvaje nazva «Biełoruśsija», što małaimavierna dla sapraŭdnaha biełaruskaha brenda.
«Dvieri Biłorusii»
Kampanija z takoj nazvaj isnuje až z 2005 hoda.
Za hety čas źjaviłasia 135 firmiennych sałonaŭ, internet-krama, 130 brend-adździełaŭ u punktach prodažu partnioraŭ kampanii, bolš za 300 mantažnych bryhad i partniorskich budaŭničych kampanij. Vyrablajuć i pradajuć dźviery, vokny. U 2007 i 2008 hadach kampanija navat atrymała zvańnie «Najlepšaha praduktu hoda», i ŭvohule, śpis uznaharod i dasiahnieńniaŭ davoli vialiki.
Simvał kampanii — čyrvony zubr.
U adroźnieńnie ad «Biełaj biarozy», nazva kampanii napisanaja pa-ukrainsku.
«Biełorusskij Płombir»
«Prostie, śvitle, jak Biłoruś, morozivo płombir u brikieti!» – kažuć markietołahi ukrainskaj kampanii «Łaska».
Ciapier maroziva nazvanaje na rasiejskaj, raniej – nazyvałasia «Płombir Biełorusii» pa-ukrainsku. Da Biełarusi ŭ tym marozivie maje dačynieńnie tolki nazva. Vytvorčaść mieścicca vyklučna va Ukrainie — Ciarnopal i Krapiŭnicki.
Praŭda, varta adznačyć, što ŭsio maroziva firmy tak ci inakš prymierkavana da inšych krain: jość nibyta brazilskaje, kitajskaje, amierykanskaje i hetak dalej. Majecca na ŭvazie smak, a nie vytvorčaść. Praŭda, pačak «biełaruskaha» ŭsio ž maje najbolš aŭtentyčny vyhlad — u azdableńni vykarystoŭvajucca kolery biełaruskaha dziaržaŭnaha ściaha i nacyjanalnyja ŭzory.
«Biełaruskija nacyjanalnyja tradycyi»
Pad takoj nazvaj pradajucca małočnyja pradukty, vytvorčaść jakich mieścicca va ŭkrainskim Zaparožžy.
«Vsiem davno iźviestno, čto tradicii biełorusskoho majonieza sochraniliś jeŝio s sovietskich vriemion. V sostavie majonieza «Nacyjanalnyja biełaruskija tradycyi» isklučitielno kačiestviennyje naturalnyje inhriedijenty. Postojannyj kontrol kačiestva majonieza «Nacyjanalnyja biełaruskija tradycyi» harantirujet biezopasnosť produkta, čto podtvierždajetsia sootvietstvujuŝimi siertifikatami. Priedłahajem i Vam poprobovať majoniez «Nacyjanalnyja biełaruskija tradycyi» — nastojaŝij i kačiestviennyj produkt. Prijatnoho appietita!» — na čystaj rasiejskaj paviedamlajuć spažyŭcu ŭkrainskija vytvorcy «biełaruskaha» praduktu.
«Minskaje Žyhuloŭskaje»
Pakupnikoŭ vabić nie tolki biełaruskaja małočka — piva taksama karystajecca papularnaściu. Znajści «Minskaje Žyhuloŭskaje» možna amal u kožnaj kramie pa ŭsioj Ukrainie.
Spačatku hetaje piva raźlivali vyklučna na minskaj «Alivaryi», ale paru hadoŭ tamu vytvorčaść pačałasia i na lvoŭskim zavodzie mižnarodnaha piŭnoha hihanta — dackaj kampanii «Karłśbierh». Heta nie dziŭna — «Alivaryja» taksama ŭvachodzić u «Karłśbierh hrup», bolš za 60% akcyj naležać dackaj kampanii.
Praŭda, śćviardžajecca, što ŭkrainski anałah robicca «stroha pa biełaruskaj technałohii».
«Vietračok»
Liniejka limanadaŭ z takoj nazvaj taksama pazicyjanujecca jak biełaruskaja.
Na etykietkach biełaruskija słovy: «Dziušes», «Sitro», čyrvona-zialony biełaruski arnamient. Voś tolki jość dva pryncypovyja momanty. Pa-pieršaje, aŭtary brenda nie viedali, što słova «vietračok», u adroźnieńnie ad «viatrak», pišacca pa-biełarusku praz «je». I, pa-druhoje, vytvorčaść «Viatračkoŭ» taksama mieścicca nie ŭ Biełarusi — limanady raźlivaje kampanija «Słavucič», jakaja źjaŭlajecca častkaj kancernu «Karłśbierh Ukraina».
«Bolš za ŭsio paskudstvaŭ pryčyniaje jaŭrejonyš». Dziciačaja doktarka ź Minska šakavała antysiemickimi vykazvańniami34
Kamientary