Novyja praviły ŭtrymańnia mohiłak: pamiž učastkami nie mieniej za 0,5 m, vyšynia aharodžy — 40 sm

Ministerstva ŽKH zaćvierdziła praviły ŭtrymańnia i dobraŭparadkavańnia mohiłak, paviedamlaje Nacyjanalny pravavy partał. U ich havorycca pra toje, jak pavinny być abstalavanyja miescy pachavańniaŭ i mahiły.

Pavialičyć

Voś niekalki punktaŭ z novych pravił:

• Terytoryja mohiłak abstalujecca zručnymi padjezdami, pa jakich da miesca pachavańnia moža dajechać katafałk i jakija dazvalajuć pravodzić raboty pa ŭtrymańni i dobraŭparadkavańni mahiły.
• La centralnaha ŭvachodu, hałoŭnaha prajezdu abo alei na terytoryi dziejučych miescaŭ pachavańnia ŭładkoŭvajucca rytualnyja placoŭki.
• Hałoŭny prajezd na mohiłkach pavinien być šyrynioj 6,0-9,0 m, kab zabiaśpiečvać dvuchbakovy ruch. Uzdoŭž hałoŭnaha prajezdu z abodvuch bakoŭ pavinny być uładkavanyja tratuary šyrynioj nie mienš za 0,75 m.
• Hałoŭny i dadatkovy prajezdy pamiž siektarami, prachody ŭ alejach, a taksama placoŭki kala ŭvachodu na mohiłki, darožki da miescaŭ zaboru vady i hramadskich prybiralniaŭ, miescaŭ dla zboru śmiećcia ładziacca ź ćviordym pakryćciom takim čynam, kab zabiaśpiečvaŭsia ściok atmaśfiernych i tałych vod z terytoryi miesca pachavańnia.
• Dapuskajecca abstalavańnie dadatkovych prajezdaŭ (hałoŭnaha prajezdu dla sielskich mohiłak) i piešachodnych darožak z hravijna-piasčanaj sumiesi.
• Na sielskich mohiłkach pavinna być dobraŭparadkavanaja placoŭka dla śmiećcia, aharodža i pry nieabchodnaści — hramadskaja prybiralnia.
• La centralnaha ŭjezdu i dadatkovych uvachodaŭ na terytoryju mohiłak praduhledžvajucca aŭtamabilnyja parkoŭki i (abo) prypynki pasažyrskaha transpartu.
• Pry prajektavańni i ŭźviadzieńni (rekanstrukcyi) miescaŭ pachavańnia, pieravažna ŭ haradskoj miažy, praduhledžvajecca vonkavaje aśviatleńnie terytoryi kala centralnaha ŭjezdu (hałoŭnaha ŭvachodu) i pry najaŭnaści techničnaj mahčymaści — la dadatkovych uvachodaŭ.
• Adlehłaść pamiž učastkami dla pachavańnia ŭ šerahu pa doŭhich bakach mahił pavinna być nie mieniej za 0,5 m, pa karotkim — nie mienš za 1 m.
• Hłybinia mahiły na ŭčastku dla pachavańnia pavinna być nie mienš za 1,5 m z ulikam miascovych hlebava-klimatyčnych umoŭ. Adlehłaść ad dna mahiły da ŭzroŭniu stajańnia hruntavych vod pavinna być nie mieniej za 0,5 m. Adrazu paśla pachavańnia nad mahiłaj pavinien być uładkavany nadmahilny pahorak vyšynioj 0,5 m ad pavierchni ziamli. Nadmahilny pahorak pavinien vystupać za baki mahiły dla abarony jaje ad pavierchnievych vod.
• Aharodžy na mohiłkach pavinny być vyšynioj da 40 sm, maksimalnaja vyšynia nadmahilnych zbudavańniaŭ nie pavinna pieravyšać 1,8 m.
• Padzachavańnie ŭ isnujučuju mahiłu truny ź ciełam (pareštkami) pamierłaha muža (žonki), albo adnaho ź blizkich svajakoŭ, inšych pamierłych svajakoŭ moža rabicca pa zakančeńni 20 hadoŭ paśla pieršaha pachavańnia, zroblenaha na hłybiniu nie mieniej za 1,5 m, abo pry najaŭnaści volnaha miesca (u miežach učastka dla pachavańnia, aharodžy, kvietnika) pamieram nie mienš jak 1 mietr pa šyryni.
• Pry zvarocie svajakoŭ pamierłaha, jak praviła, dazvalajecca rabić pachavańnie z raźlikam nastupnaha pachavańnia ŭ druhim šerahu pa vyšyni da zakančeńnia 20 hadoŭ paśla pieršaha pachavańnia. Pry hetym hłybinia mahiły dla pieršaha pachavańnia pavinna być nie mienš za 2,5 m i adlehłaść ad dna mahiły da ŭzroŭniu stajańnia hruntavych vod pavinna być nie mienš za 0,5 m, a hłybinia mahiły dla druhoha pachavańnia pavinna być nie mienš za 1,5 m.

• 0
• 0
• 0
• 0
• 0
• 0
• 0
• 0