Maroka źbirajucca złučyć ź Ispanijaj i Partuhalijaj dvuma padvodnymi tunelami

Maroka-Partuhalija

Adzin z prajektaŭ — aŭtamabilny tunel pamiž Maroka i Partuhalijaj — užo pryciahnuŭ uvahu jak mahčymy novy «kalidor blizkaści» praz Atłantyku. Pavodle papiarednich acenak, jaho košt moža pieravysić 800 miljonaŭ jeŭra.

Jak paviedamlaje partuhalskaje vydańnie OKDiario, prajekt praduhledžvaje złučeńnie darožnaj sietki na poŭnač ad Tanžera ź infrastrukturaj paŭdniovaj Partuhalii, uklučajučy aŭtastradu A22, a taksama intehracyju z naziemnaj łahistykaj i marskimi maršrutami.

Inžyniery, jakija ŭdzielničajuć u raspracoŭcy, nazyvajuć hety prajekt «infrastrukturnym skačkom», jaki źmianiaje samo razumieńnie prastory i terytoryi. Jon płanujecca jak modulny, što dazvolić paetapna vieści budaŭnictva biez parušeńnia isnujučaha ruchu transpartu. Kaardynacyja prajekta budzie ažyćciaŭlacca praz sumiesny kansorcyum, jaki budzie pracavać pavodle adzinych standartaŭ biaśpieki, sumiaščalnaści i ekałahičnaj ustojlivaści.

Technična tunel budzie składacca z dvuch paralelnych prachodaŭ — pa adnym dla kožnaha napramku ruchu — a taksama asobnaha avaryjnaha kalidora. Praduhledžvajucca składanyja sistemy vientylacyi i kantrol cisku, a taksama avaryjnyja schoviščy i sučasnyja sistemy biaśpieki.

Siarod razhladanych rašeńniaŭ — vykarystańnie papiarednie vyrablenych padvodnych siekcyj i śpiecyjalnych tuneleprachodnych mašyn, adaptavanych da cisku i hieałahičnych umoŭ marskoha dna.

Razam z tym, jak paviedamlaje vydańnie, šerah klučavych detalaŭ prajekta nie paćvierdžany aficyjna, a ŭłady Partuhalii pakul nie kamientavali infarmacyju.

Maroka-Ispanija

Adnačasova z partuhalskim kirunkam novaje dychańnie atrymaŭ jašče bolš maštabny prajekt padvodnaha čyhunačnaha tunelu pamiž Maroka i Ispanijaj. Hetaje hrandyjoznaje zbudavańnie koštam ad 15 da 20 miljardaŭ jeŭra pavinna praciahnucca na 42 kiłamietry, ź jakich prykładna 27 kiłamietraŭ projdzie niepasredna pad vadoj.

Pavialičyć

Tunel, jaki złučyć ispanskuju Punta-Pałoma z marakanskim mysam Małabata, budzie pryznačany jak dla hruzavych, tak i dla pasažyrskich pieravozak. Čakajecca, što paśla zaviaršeńnia prajekta čas u šlachu pamiž kantynientami skarocicca ŭsiaho da 30 chvilin, što stvoryć biesprecedentnyja ŭmovy dla paskareńnia handlovych patokaŭ u rehijonie.

Realizacyja hetych dvuch prajektaŭ śviedčyć pra fundamientalny zruch u ekanamičnaj stratehii Afryki. Zamiest tatalnaj zaležnaści ad marskich hruzapieravozak, jakija časta stanoviacca zakładnikami hieapalityčnych kanfliktaŭ, kantynient robić staŭku na stvareńnie ŭstojlivych naziemna-padvodnych kalidoraŭ.

• 0
• 0
• 1
• 1
• 0
• 0
• 0
• 0