Za chulihanstva i naŭmysnaje paškodžańnie čužoj majomaści z pryčynieńniem škody ŭ bujnym pamiery asudžanyja dvoje 23-hadovych niepracujučych mužčyn. Adzin ź ich žychar Stolina, druhi — Ivacevickaha rajona.
Jak paviedamiła staršy prakuror adździeła prakuratury Bresckaj vobłaści Łarysa Karanievič, 24 krasavika kala 2.00 u Stolinie maładyja ludzi, jakija znachodzilisia ŭ stanie ałkaholnaha apjanieńnia, paškodzili handlovy kavavy aŭtamat, ustalavany pablizu handlovaha paviljona.
Pa słovach mužčyn, jany sprabavali padmanuć kavavy aparat pabačanym u internecie sposabam. Nie atrymaŭšy ni kavy, ni układzienaj kupiury, jany pačali bić nahami pa aparacie, i toj upaŭ.
Zhodna z zaklučeńniem ekśpiertyzy, reštkavy košt kavavaha aŭtamata, jaki ramantavać niemetazhodna, składaje 73 504 000 niedenaminavanych rubloŭ.
Žycharu Stolina, jaki nie maje sudzimaści, pryznačana pakarańnie ŭ vyhladzie troch hadoŭ abmiežavańnia voli z nakiravańniem u vypraŭlenčuju ŭstanovu adkrytaha typu, raniej sudzimamu žycharu Ivacevickaha rajona — try hady i čatyry miesiacy pazbaŭleńnia voli ŭ kałonii ahulnaha režymu.
Z abvinavačanych u salidarnym paradku spahnana na karyść indyvidualnaha pradprymalnika (uładalnika kavavaha aŭtamata) 7 350 denaminavanych rubloŭ.
Prysud jašče nie nabyŭ zakonnuju moc. Prakuror Stolinskaha rajona prynios apielacyjny pratest, u jakim jon pastaviŭ pytańnie ab źmienie režymu papraŭčaj kałonii žycharu Ivacevickaha rajona z ahulnaha na ŭzmocnieny.
Kamientary