U Hrodnie archieołahi znajšli frahmienty kaścioła kanca XVI — siaredziny XVII stahodździa

Jak adznačyli navukoŭcy, u hetym archieałahičnym siezonie pravodzilisia raskopki ŭ Hrodnie i Lidzie. Hetyja raboty źviazanyja z vyvučeńniem pachavalnych kompleksaŭ XVI—XIX stahodździaŭ.

U Hrodnie daśledavańni pravodzilisia na vulicy Małoj Trajeckaj. Padčas budaŭničych rabot tam znajšli pachavańni, jakija datujucca pačatkam — siaredzinaj XVI stahodździa. Akramia taho, znajšli frahmienty kultavaha zbudavańnia, jakoje źviazvajuć z kaściołam Śviatoj Trojcy, što isnavaŭ u Hrodnie z kanca XVI da siaredziny XVII stahodździa.

Pobač z hetym abjektam vyjaŭlenyja pachavańni.

«Jany majuć niezvyčajnuju płaniroŭku i adroźnivajucca ad mahilnikaŭ taho pieryjadu: pachavanyja byli raźmieščany ŭ peŭnaj struktury. Vyvučeńnie znachodak praciahvajecca ŭ kamieralnych umovach. Na hetym abjekcie zafiksavany davoli redki dla biełaruskich terytoryj fakt — zahojenaja trepanacyja», — raskazali ŭ Instytucie historyi NAN Biełarusi.

Akramia taho, znajšli materyjały, źviazanyja ź indyvidualnymi kultami. U pryvatnaści, havorka idzie pra miedaljony. Tam ža znojdzienyja artefakty XVII—XIX stahodździaŭ. Miarkujecca, što hetyja mohiłki funkcyjanavali karotki pramiežak času i byli źviazanyja ź dziejnaściu kaścioła. Vierahodna, mahilnik zakinuli paśla taho, jak kaścioł spyniŭ svajo isnavańnie.

U Lidzie archieołahi daśledavali krypty sa śvincovymi sarkafahami, jakija datujucca kancom XIX stahodździa. Byli znojdzienyja try pachavańni. Charakterna, što navukoŭcam udałosia adnavić imiony niekatorych pachavanych. Adzin ź ich — Juljan Zdanovič, padpałkoŭnik Lidskaha pałka. Jon udzielničaŭ u ruska-tureckaj vajnie, byŭ uznaharodžany i apošnija hady žyćcia pravioŭ u Lidzie, dzie paśla i byŭ pachavany. Na inšym sarkafahu zachavałasia tablička ź imieniem pachavanaha, a taksama asobnyja litary jaho proźvišča. U vyniku daśledavańnia było vyjaŭlena, što jon na praciahu 14 hadoŭ uznačalvaŭ Lidski turemny zamak. Pryniata rašeńnie pierapachavać pareštki hetych ludziej na terytoryi Lidy.

Taksama ŭ hetym hodzie praciahniecca daśledavańnie najstaražytniejšaha pomnika archieałohii na terytoryi Biełarusi — stajanki Ahova, raźmieščanaj u Ivanaŭskim rajonie Bresckaj vobłaści. Pavodle apošnich danych, jaje ŭzrost pieravyšaje 400 tysiač hadoŭ, što paćviardžajecca vynikami analityčnych daśledavańniaŭ. Daśledavańni spynilisia na hłybini 7,5 mietraŭ.

• 0
• 0
• 0
• 0
• 0
• 0
• 0
• 1