Stała viadoma, jaki prysud vynieśli va Ukrainie biełaruskamu dobraachvotniku, aryštavanamu za narkotyki
Juryj Harupa atrymaŭ minimalnaje pakarańnie, ale ŭsio adno heta vializny termin.
Juryj Harupa — były biełaruski dobraachvotnik.
Jon naradziŭsia ŭ vioscy Strelna Ivanaŭskaha rajona Bresckaj vobłaści. Źjechaŭ u Polšču, a paśla akupacyi Kryma pierabraŭsia va Ukrainu. Harupa byŭ u šerahach «Pravaha siektaru». Kali pačałasia poŭnamaštabnaja vajna, dałučyŭsia da biełaruskaj roty pry «Azovie».
U krasaviku 2022 hoda Harupa byŭ paranieny. Jamu razarvała całkam levuju ścienku mačavoha puchira. Była razdroblenaja tazavaja kostka, pierabityja niervy na pravaj ruce, razarvanaja barabannaja pieraponka pravaha vucha, a taksama razarvanaja siatčatka pravaha voka. Daviałosia vydalić častku straŭnika. Jašče mieŭ kantuziju. Ź pieradavoj jaho evakujavali.
Tym nie mienš biełarus viarnuŭsia na front. U lutym 2023 hoda Harupa byŭ zaličany raźviedčykam asobnaha bataljona śpiecpryznačeńnia 2‑ha Internacyjanalnaha lehijona abarony Ukrainy, a praź miesiac staŭ kamandziram minamiotnaha ŭzvoda ŭ zvańni siaržanta.
Paralelna sa słužbaj, jak vyznačyŭ sud, jon naładziŭ handal narkotykami. U studzieni 2024 hoda palicyja vyjaviła bolš za dziasiatak jaho zakładak u Chmialnickim — pakieciki z kanabisam i psichatropnymi rečyvami 4‑MMC i alfa-PVP, schavanyja pad pradmietami, u dupłach dreŭ i mietaličnych kanstrukcyjach. Paśla kožnaj zakładki jon fatahrafavaŭ miesca na svoj ajfon i pierasyłaŭ zdymki pakupnikam.
23 studzienia 2024 hoda jaho zatrymali kala paštamata «Novaj pošty» ŭ Chmialnickim, kudy jon pryjšoŭ zabrać pasyłku sa 127 hramami alfa-PVP — asabliva vialikaj partyjaj hetaha psichatropnaha rečyva.
Usiaho va ŭsich zakładkach i pry zatrymańni ŭ jaho znajšli 9,5 h kanabisu, zvyš 127,5 h alfa-PVP i niekalki hramaŭ psichatropnaha rečyva 4-MMC.
Harupa całkam pryznaŭ vinu pa abiedźviuch častkach artykuła 307 Kryminalnaha kodeksa Ukrainy — niezakonnyja nabyćcio i zachoŭvańnie z metaj zbytu narkotyčnych i psichatropnych rečyvaŭ. Sud nie znajšoŭ ni źmiakčalnych, ni abciažarvalnych akaličnaściaŭ i pryznačyŭ jamu 9 hadoŭ źniavoleńnia z kanfiskacyjaj usioj majomaści, akramia žylla.
Kamientary