Biełaruskija mytniki admaŭlajuć, što zatrymlivajuć fury z Kalininhradskaj vobłaści
Dziaržaŭny mytny kamitet Biełarusi abvierh infarmacyju pra toje, što biełaruskaja mytnia nibyta zatrymała 300 aŭtamabilaŭ z kalininhradskimi numarami, jakija prybyli ŭ Biełaruś ź Litvy, piša BiełTA.
U DMK zajavili, što biełaruskija mytnyja orhany ŭ zvyčajnym režymie afarmlajuć tranzitnyja hruzy, u tym liku tyja, što iduć z Kalininhrada. U siarednim praź biełaruska-litoŭskuju miažu štodnia prajazdžajuć kala 80 transpartnych srodkaŭ z kalininhradskaj rehistracyjaj. Z pačatku 2026 hoda ich užo aformili kala 17,5 tysiačy.
Pry hetym ciapier u zonach mytnaha kantrolu na terytoryi Biełarusi znachodziacca tolki 16 transpartnych srodkaŭ mižnarodnych pieravozčykaŭ, ruch jakich časova prypynieny. Ź ich 11 zarehistravanyja ŭ Rasii. Pryčynaj stali padstavy mierkavać, što padčas uvozu mahli być parušanyja mytnyja praviły.
U DMK rastłumačyli, što havorka idzie pra adzin z raspaŭsiudžanych sposabaŭ uchileńnia ad vypłaty mytnych płaciažoŭ. Parušalniki mohuć sprabavać uvozić transpartnyja srodki pad vyhladam aŭtamabilaŭ, jakija ŭžo zarehistravanyja na terytoryi JEAES. Dla hetaha jany padrablajuć VIN-numary, dziaržaŭnyja rehistracyjnyja znaki i techničnyja pašparty.
Kab paćvierdzić abo źniapraŭdzić takija parušeńni, mytnym orhanam nieabchodna pravieści pravierki i ekśpiertyzy. Na ich praviadzieńnie moža spatrebicca da 20 pracoŭnych dzion.
U suviazi z hetym kampanii-pieravozčyki apieratyŭna atrymlivajuć infarmacyju pra časovaje spynieńnie ruchu asobnych transpartnych srodkaŭ. Im prapanujuć zamianić zatrymanyja aŭtamabili, kab hruzy mahli praciahnuć ruch biez zatrymak.
Pavodle DMK, tolki za pieršaje paŭhodździe 2026 hoda biełaruskija mytniki vyjavili 60 sprob niezakonnaha ŭvozu transpartnych srodkaŭ, u tym liku pryčepaŭ, pad vyhladam užo zarehistravanych u JEAES. U 16 vypadkach byli vyjaŭlenyja prykmiety parušeńniaŭ, jakija mohuć mieć kryminalny charaktar.
Pa faktach niezakonnaha ŭvozu 26 transpartnych srodkaŭ ahulnym koštam bolš za 1,8 miljona rubloŭ administracyjnyja pracesy ŭžo zavieršanyja.
Ciapier čytajuć
Vaziŭ nataŭcaŭ u Afhanistan i skidvaŭ humanitarku ŭ Sudanie, a potym trapiŭ u turmu pa danosie siabra z Ukrainy3
Kamientary