Niačesnych trykatažnic pilnujuć złosnyja sabaki

Dla achovy Pinskaha trykatažnaha abjadnańnia vykarystoŭvajucca złosnyja čaćviaranohija achoŭniki — najlepšyja ŭ vobłaści.

Pinskaje trykatažnaje abjadnańnie «Paleśsie» — heta try fabryki na adnoj terytoryi: kamvolnaja, abjomnaj pražy i vierchniaha trykatažu. Raniej tut pracavała bolš jak vosiem tysiač čałaviek, pieravažna — žančyny. Ciapier kolkaść kalektyvu źmienšyłasia bolš jak na pałovu. Ale na składach tavaraŭ nia mienieje. Tut asiadaje pradukcyja, jakaja nie znachodzić popytu. Stratu kankurentazdolnaści specyjalisty tłumačać tym, što amal 95 pracentaŭ abstalavańnia fizyčna i maralna znošanaje, patrabuje zamieny.

Pakolki zarobki na pradpryjemstvie mizernyja, to padvyšajecca kolkaść kradziažoŭ. Pavodle spravazdačy viedamasnaj achovy, sioleta amal paŭsotni žančynaŭ byli zatrymanyja na prachadnoj pry sprobie vynieści spartovy kaścium, koftu ci majku. Zdarałasia, što z terytoryi kambinata, jakaja składaje 250 tysiač kvadratnych metraŭ, pracaŭniki vykidvali za aharodžu pakunki z hatovaj pradukcyjaj. Ich padbirali kampańjony złodziejaŭ.

PTA «Paleśsie», darečy, vyrablaje ŭ sutki kala 8 tysiač trykatažnych rečaŭ, albo 2 miljony ŭ hod. Kab prypynić kradziež, administracyja ŭdaskanalvaje systemu achovy. Jaje kiraŭnik Michaił Novak kaža, što, słužba achoŭnych sabak — adna ź lepšych na Bieraściejščynie.

— Našy hadavancy achoŭvajuć usiu terytoryju pa perymetry. Zamianili pastavyja budki. I zamiest karotkich pavadkoŭ naciahnuli doŭhija trosy. Ciapier kožnaja sabaka moža pierasoŭvacca na značnyja adlehłaści — ad 50 da 100 metraŭ. Usich sabak bolš jak 20.

Sa słovaŭ Michaiła Novaka, u achovie PTA «Paleśsie» vykarystoŭvajucca parodzistyja sabaki. Kuplajuć ich u prafesijnych zavodčykaŭ. Płaciać za kožnaha bolš, čym siaredniemiesiačny zarobak stanočnicy na pradpryjemstvie.

— My damahlisia, kab sabaki atrymlivali dobruju ježu. Ciapier prosim srodki na specyjalnyja treniroŭki ich, — udakładniaje spadar Novak.

Jak vyśviatlajecca, adkormlenyja vartaŭniki‑sabaki majuć chiby ŭ svaim vychavańni. Da prykładu, irvuć łancuh i zalivajucca brecham, kali pa toj bok aharodžy źjaŭlajecca kot albo inšy sabaka. Dražniać sabak dzieci. Pravakujuć ich i darosłyja.

Cikava, što na instruktažach pa technicy biaśpieki pinskich trykatažnic navučajuć, jak baranicca ad sabaki z achovy. U pryvatnaści nahadvajuć: «Budziecie ŭciakać — dahonić dakładna. Zvalić, patopča i pakusaje. Tamu nie chadzicie pa pramysłovaj zonie pradpryjemstva ŭ ciemnacie. Nie leźcie za aharodžu».

Ja źviarnułasia ŭ Pinskuju veterynarnuju stancyju. Jaje načalnik Uładzimier Mańko paviedamiŭ, što sioleta ŭ horadzie sabaki pakusali amal 20 čałaviek.

— Troje ź ich — pracaŭniki PTA «Paleśsie», — udakładniŭ spadar Mańko.

Halina Baravaja, BulletinOnline.org

• 0
• 0
• 0
• 0
• 0
• 0
• 0
• 0