Mytnaja słužba Respubliki Polšča ŭvodzić novyja praviły ŭvozu paliva na terytoryju Jeŭrasajuza, paviedamlajecca na sajcie Bresckaj mytni.
Pa paviedamleńni polskaha boku, ad 14 listapada 2016 hoda ŭzmocnieny kantrol u dačynieńni da paliva, što ŭvozicca na terytoryju Jeŭrapiejskaha sajuza ŭ bakach lehkavych aŭtamabilaŭ, piša TUT.BY.
Kantrol budzie ažyćciaŭlacca nastupnym čynam: ujezd u Polšču transpartnych srodkaŭ z poŭnymi bakami, praduhledžanymi zavodam-vytvorcam, budzie mahčymy biaspošlinna adzin raz u 72 hadziny (3 sutak). Kali ŭjezd budzie ažyćciaŭlacca čaściej, to norma biaspošlinnaha ŭvozu nie moža pieravyšać 20 litraŭ paliva.
Kali limit budzie pieravyšany, hramadzianinu pryjdziecca zapłacić mytnuju pošlinu, albo transpartny srodak budzie viernuty na terytoryju Biełarusi.
Adlik času (sutak) dla kožnaha hramadzianina budzie ažyćciaŭlacca indyvidualna, pry hetym sutki buduć ličycca nie kalandarnyja, a z momantu papiaredniaha ŭjezdu ŭ Polšču.
Nahadajem, ad 1 vieraśnia byli źniatyja abmiežavańni na vyvaz paliva za miežy Biełarusi. Kali raniej na adnoj i toj ža mašynie aŭtamabilistu z našaj krainy prychodziłasia vyjazdžać za miežy JEAES (da 2014 hoda — Mytnaha sajuza) čaściej, čym raz u 8 dzion, to jamu treba było zapłacić pošlinu na paliva (jakaja zaležała ad stavak ekspartnych pošlin na naftu i naftapradukty, jakija pastajanna źmianialisia).
U kancy kastryčnika ŭrad Polščy zajaviŭ ab padrychtoŭcy cełaha kompleksu mier, nakiravanych na skaračeńnie pastavak nielehalnaha paliva ŭ krainu. Asnoŭnymi «bienzavozami» čynoŭniki nazvali pryhraničnych handlaroŭ i kiroŭcaŭ fur.
Pa padlikach Polskaj arhanizacyi naftavaj pramysłovaści i handlu, čorny rynak bienzinu ŭ Polščy składaje 7-8% ad ahulnaha, a dyziela — usie 10%. Biudžet niasie straty ŭ miljardy złotych (nazyvajucca sumy ad 3,5 da 4 miljardaŭ u hod). Vierahodniej za ŭsio, biazmytny ŭvoz paliva nie čaściej, čym raz u troje sutak — adna ź mier baraćby z čornym rynkam.
Ciapier čytajuć
«Dekałanizacyja — heta pryjści i zaniać svajo miesca». Nasta Rahatko budzie ŭdzielničać u fiestyvali rasijskaj knihi. Sulima jaje asudziŭ, jana nie zmaŭčała ŭ adkaz6464
Kamientary