Kureńnie na prypynkach i dziciačych placoŭkach płanujuć całkam zabaranić
U Biełarusi płanujecca całkam zabaranić kureńnie na prypynkach hramadskaha transpartu, dziciačych placoŭkach i plažach, paviedamiła namieśnik hałoŭnaha ŭrača Respublikanskaha centra hihijeny, epidemijałohii i hramadskaha zdaroŭja Ludmiła Narojčyk.
Ministerstva achovy zdaroŭja inicyiravała ŭniasieńnie źmianieńniaŭ u dekret numar 28, dziakujučy jakim namiečany čarhovyja kroki ŭ baraćbie z tytuniekureńniem. Dla stvareńnia biezdymnaha asiarodździa prapanujecca padzialić miescy, u jakich zabaraniajecca kureńnie, na dźvie katehoryi: z poŭnaj zabaronaj i sa śpiecyjalna pryznačanymi dla kureńnia miescami.
Da miescaŭ, u jakich prapanujecca ŭstanavić poŭnuju zabaronu, adniesieny prypynki hramadskaha transpartu, pierachody mietrapalitena, dziciačyja placoŭki, pamiaškanni, zaniatyja arhanizacyjami fizičnaj kultury i sportu. U hetym śpisie taksama plažy i lifty. Prapanujecca zabaranić kureńnie ŭ aŭtamabilach i pamiaškańniach, kali ŭ ich prysutničajuć dzieci da 14 hadoŭ. Da miesc, u jakich kureńnie zabaroniena za vyklučeńniem śpiecyjalna stvoranych dla hetaj mety, prapanujecca adnieści handlovyja abjekty i rynki, abjekty bytavoha absłuhoŭvańnia nasielnictva i hramadskaha charčavańnia, pamiaškańni i terytoryi, zaniatyja dziaržorhanami, ustanovami adukacyi, arhanizacyjami kultury i achovy zdaroŭja, arhanizacyi, što akazvajuć pasłuhi suviazi, sacyjalnyja, bankaŭskija, strachavyja, haściničnyja i inšyja pasłuhi i h.d. Patrabavańni da śpiecyjalna pryznačanych dla kureńnia miesc buduć ustanaŭlivacca Ministerstvam achovy zdaroŭja i MNS.
Abjekty, dzie kureńnie tytuniovych vyrabaŭ zabaroniena, płanujecca abaznačyć adpaviednym znakam, patrabavańni da jakoha, a taksama paradku jaho raźmiaščeńnia ŭstanović Ministerstva achovy zdaroŭja.
Zhodna z danymi apošnich sacyjałahičnych daśledavańniaŭ, u Biełarusi kuryć 27,9 pracenta darosłaha nasielnictva, značnaja častka nasielnictva padviarhajecca pasiŭnamu kureńniu. Tak, bolš za pałavinu apytanych vymušanyja znachodzicca pobač z kurcami ŭ roznych miescach (doma, u haściach, na rabocie i h.d.).
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie5
Kamientary