Błohier Pratasievič u sudzie dakazaŭ, što zdavaŭ ekzamien, kali milicyja «bačyła» jaho ŭ Kurapatach

Prynieści daviedku z VNU i pryvieści svaich vykładčykaŭ u sud spatrebiłasia studentu 3 kursa žurfaka BDU, błohieru Ramanu Pratasieviču, kab dakazać, što jon zdavaŭ ekzamien ranicaj 25 lutaha. Sprava ŭ tym, što ŭ hety čas milicyjanty, miarkujučy pa administratyŭnym pratakole, bačyli jaho na akcyi ŭ Kurapatach.

Pavialičyć

Sud nad błohieram pačaŭsia jašče 10 krasavika. Na Pratasieviča skłali pratakoł za ŭdzieł 25 lutaha ŭ niesankcyjanavanaj akcyi ŭ Kurapatach. U pratakole pravaparušeńnia było ŭkazana, što student «aktyŭna ŭdzielničaŭ u niezakonnym pikietavańni na budaŭničaj placoŭcy pa adrasie: Mirašničenka, 49». Pavodle źviestak milicyi, jon byŭ tam u 10.00.

Ale Pratasievič prynios daviedku z dekanata, što ŭ hety dzień jon zdavaŭ ekzamien na žurfaku, jaki doŭžyŭsia z 10.00 da 12.00 pa pradmiecie «mova i styl ŚMI». Hetaha akazałasia niedastatkova, i sudździa Dźmitryj Cykał vyklikaŭ u sud śviedkami vykładčykaŭ, jakija prymali ispyt u Pratasieviča 25 lutaha. Siońnia jany pryjšli ŭ sud.

Dacent kafiedry stylistyki i litaraturnaha redahavańnia žurfaka BDU Volha Horbač raspaviała, što studenty rychtujucca da adkazu ŭ prysutnaści vykładčykaŭ. Pierazdača ekzamiena prachodziła z 10 da 12 hadzin. Pa słovach vykładčyka, Pratasievič byŭ na kafiedry da 11.30-11.40.

- Zdaŭ? - spytaŭ sudździa.

- Vy viedajecie, navat na 5 zdaŭ. Da hetaha była kursavaja na 4, tam šmat śpisaŭ. A tut napeŭna bajaŭsia, padrychtavaŭsia. Ja navat ŭzradavałasia, što nie na 4.

Staršy vykładčyk Marharyta Cybulskaja taksama paćvierdziła, što Pratasievič 25 lutaha zdavaŭ ekzamien, ale sama ŭžo nie pamiataje, ź jakoha času da jakoha času jon znachodziŭsia na kafiedry.

- Jon niadrenna zdavaŭ darečy, zrabiŭ niadrennaje ŭražańnie.

Sudździa pajšoŭ u daradčy pakoj, a kali viarnuŭsia zajaviŭ, što vina Pratasieviča nie dakazana.

— Sprava ab administracyjnym pravaparušeńni ŭ dačynieńni da Pratasieviča spynić za niedakazanaściu jaho vinavataści.

Siabry Pratasieviča i inšyja aktyvisty ŭ zale sustreli rašeńnie sudździ apładysmientami.

Raniej Pratasievič adbyŭ 10 sutak aryštu paśla zatrymańnia na akcyi 26 sakavika ŭ Minsku kala Kastryčnickaj płoščy.

• 0
• 0
• 0
• 0
• 0
• 0