Brutalnaje zatrymańnie na AZS pad Drahičynam — padrabiaznaści

Departamient achovy MUS prakamientavaŭ incydent na aŭtazapravačnaj stancyi pad Drahičynam, dzie supracoŭnik viedamstva raźbiŭ škło i vyciahnuŭ praz akno kiroŭcu lehkavoha aŭtamabila.

4 červienia ŭ 22.55 u Pinsku na vulicy Bresckaj narad departamienta pracavaŭ na miescy DTZ sumiesna z supracoŭnikami DAI. Sa skryžavańnia ŭ bok śpiecaŭtamabilaŭ vyjechaŭ Volkswagen Golf. Kiroŭca, zaŭvažyŭšy supracoŭnikaŭ milicyi, rezka raźviarnuŭsia, pierasiok padvojnuju sucelnuju i pasprabavaŭ uciačy.

Narad hrupy zatrymańnia adpraviŭsia ŭ pahoniu. Na skryžavańni vulicy Piestraka i praśpiekta Žałtoŭskaha kiroŭca Volkswagen praihnaravaŭ patrabavańni ab spynieńni i zbočyŭ na prasiołkavuju darohu. Padčas manieŭru ŭ aŭtamabila advaliŭsia piaredni bampier. Praz 2,5 km aŭtamabil vyjechaŭ na trasu M10 i pajechaŭ u kirunku Kobryna. Kiroŭcu Volkswagen nieadnarazova vykazvalisia patrabavańni ab spynieńni, jaho papiaredžvali ab mahčymym vykarystańni ahniastrelnaj zbroi.

Pa trasie Golf jechaŭ ź pieravyšeńniem chutkaści i stvaraŭ avaryjnuju situacyju. Praź niekalki dziasiatkaŭ kiłamietraŭ pieraśledu lehkavik źviarnuŭ na AZS pablizu vioski Raviny Drahičynskaha rajona. Tam jaje i spynili supracoŭniki departamienta achovy.

«Prymajučy pad uvahu, što na praciahu ŭsiaho šlachu pieraśledu kiroŭca hruba ihnaravaŭ patrabavańni ab spynieńni supraćpraŭnych dziejańniaŭ, pavodziŭ siabie niepradkazalna, paśla spynieńnia zabłakavaŭ dźviery aŭtamabila i moh praciahnuć ruch, pryčyniŭšy pry hetym svaimi dziejańniami škodu hramadzianam, milicyjanty ŭžyli fizičnuju siłu i śpiecsrodki dla zatrymańnia pravaparušalnika, raźbiŭšy škło dźvierej (artykuły 26-28 Zakona «Ab orhanach unutranych spraŭ Respubliki Biełaruś»)», — paviedamili ŭ Departamiencie achovy MUS.

Za rulom «Falksvahiena» znachodziŭsia 21-hadovy kiroŭca. Akramia jaho ŭ sałonie aŭtamašyny znachodzilisia jašče dvoje pasažyraŭ, 1991 i 1993 h. n., jakija, zhodna z aktam miedycynskaha ahladu, znachodzilisia ŭ niećviarozym stanie (kancentracyja ałkaholu ŭ vydychanym pavietry skłała 2 pramile ŭ kožnaha). Usie troje — žychary horada Pinska.

Jak paviedamiła TUT.BY načalnik adździeła pa ahitacyi i prapahandzie UDAI UUS Bresckaha abłvykankama Natalla Sacharčuk, kiroŭca byŭ ćviarozy i mieŭ prava kiravańnia transpartnymi srodkami. Matyvy, jakija prymusili jaho ŭciakać ad supracoŭnikaŭ milicyi, na dadzieny momant vyśviatlajucca.

U dačynieńni da kiroŭcy skłali 14 pratakołaŭ: 12 — za parušeńni, učynienyja ŭ Pinsku i Pinskim rajonie, i jašče dva pa Drahičynskim rajonie.

Pry hetym dziesiać pratakołaŭ na maładoha čałavieka skłali pa č. 8 art. 18.14 KoAP (Parušeńnie praviłaŭ abhonu) i pa adnym — za nievykanańnie patrabavańniaŭ darožnych znakaŭ abo raźmietki (č. 6 art. 18.14), kiravańnie transpartnym srodkam biez dakumientaŭ (18.18), stvareńnie avaryjnaj abstanoŭki (č. 3 art. 18.23), nievykanańnie patrabavańnia ab spynieńni, što paciahnuła pieraśled (č. 3 art. 18.21).

U DAI taksama nie vyklučyli, što kolkaść składzienych pratakołaŭ na kiroŭcu moža pavialičycca paśla detalovaha aznajamleńnia z abstavinami zdareńnia.

• 0
• 0
• 0
• 0
• 0
• 0
• 0
• 0