Antyfašystu Vadzimu Bojku prysudzili 4 hady za bojku ŭ tralejbusie, ale časova vyzvalili

Vadzima Bojku, jaki byŭ asudžany na čatyry hady pazbaŭleńnia voli,vypuścili z žodzinskaha SIZA pad padpisku ab niavyjeździe ŭdzień 10 červienia. Jaho asudzili za zdareńnie, jakoje adbyłosia ŭletku 2014 hodu. Pavodle versii śledčych, hrupa fanataŭ FK «Partyzan» spyniła tralejbus, u jakim jechali fanaty FK «Tarpeda Miensk». Potym fanaty «Partyzana» raźbili ŭ tralejbusie šybu, raspylili ŭ salonie ślezaciečny haz, a taksama ŭčynili bojku. Pieršapačatkova vypadak nie atrymaŭ rozhałasu, usie zatrymanyja byli adpuščanyja. Adnak paśla taho, jak spravaj zaniałasia Hałoŭnaje ŭpraŭleńnie baraćby z arhanizavanaj złačynnaściu i karupcyjaj, jaje daviali da sudu, a dziejańni futbolnych fanataŭ rascanili jak asabliva złosnaje chulihanstva.

U vyniku šaściora fanataŭ FK «Partyzan» atrymali roznyja terminy źniavoleńnia: Illa Vałavik — 10 hadoŭ pazbaŭleńnia voli, Filip Ivanoŭ iVadzim Bojka — pa 4 hady, Dźmitry Cichanovič — 6 hadoŭ, Arciom Kraŭčanka iVadzim Čartovič (ich dadatkova abvinavačvali ŭ niezakonnym vyrabie i zbycie narkotykaŭ) — pa 12 hadoŭ.

«Svaboda» sustrełasia z Vadzimam Bojkam napiaredadni razhladu apelacyi ŭ jahonaj spravie. Chłopiec pryznajecca, što na sudovaje pasiedžańnie pryjdzie z sabranaj torbaj i hatovy viarnucca za kraty.

Niečakanaje vyzvaleńnie

«Niečakana mianie vyzvalili, papraŭdzie. 9 červienia paklikali na zborny punkt. Skazali iści na vychad z rečami. Ja dumaŭ, što ŭ inšuju kameru prosta. Bo z administracyjaj dyjaloh nie skłaŭsia, — raskazvaje Vadzim Bojka. — A jany na zborny punkt. Heta miesca, dzie ŭsie rečy ahladajuć, kali ŭ turmu pryvoziać. I kažuć: vyzvalajem ciabie. Rečy pierahledzieli, raździecca prymusili. Ja dumaŭ, što žartujuć. Čatyry hady ž siadzieć mnie, kudy ja pajdu?»

Navina pra vyzvaleńnie 9 červienia nasamreč akazałasia niapraŭdaj — paśla ahladu rečaŭ Vadzimu zahadali apranucca i adviali nazad u kameru. Na nastupny dzień pracedura paŭtaryłasia, ale ŭ vyniku Bojka zamiest kamery apynuŭsia ź inšaha boku bramy žodzinskaha SIZA. Ź jaho ŭziali padpisku ab niavyjeździe i adpuścili da razhladu apelacyi. Amal roŭna na tydzień.

Chłopiec mieŭ pry sabie krychu hrošaj, źviazaŭsia sa znajomymi ŭ Žodzinie. Paśla sieŭ u maršrutku i pryjechaŭ dadomu. «Usie ŭzradavalisia. Ślozy byli. Niečakana vielmi», — havoryć Bojka. Ab pryčynach vyzvaleńnia jon tolki zdahadvajecca. Mahčyma, sudździa, jaki razhladaje apelacyju, vyrašyŭ zrabić usio pavodle zakonu. A tam paznačana, što biez ustupleńnia prysudu ŭ siłu čałavieka možna trymać pad vartaj nia bolš za try miesiacy.

Pra sud, jaki prachodziŭ u zakrytym režymie, Vadzim Bojka raskazać amal ničoha nia moža — usie fihuranty spravy davali padpisku ab nievydavańni.

«Pa-mojmu, heta byŭ cyrk. Paviesili na nas šyldy niejkich ekstremistaŭ. Ja voś zaraz vyzvaliŭsia, vyrašyŭ pahladzieć kamentary ŭ internecie. Tam nas ekstremistami nazyvajuć, terarystami. Udzielnikami niezakonnaj arhanizacyi, — skardzicca Vadzim. — Ja nie liču siabie takim. Ja prosta chaču žyć, jak usie ludzi. Pracavać, płacić padatki».

Bojka havoryć, što na sudzie nivodny z pryznanych paciarpiełymi nie pradjaviŭ pretenzijaŭ abvinavačanym. Bolš za toje, paciarpiełyja prasili sudździu abvinavačanych vyzvalić. Siarod šarahovych pasažyraŭ tralejbusa paciarpiełych taksama nie znajšłosia. Persanalna Bojku abvinavačvali tolki ŭ raźbivańni šyby tralejbusa, ale jaje cana skłała ŭsiaho 29 rubloŭ i była kampensavanaja da sudu. U tralejbusnaha parku pretenzijaŭ paśla hetaha taksama nie było.

«Aficyjnyja ŚMI pisali pra nas, jak pra pseŭdaantyfašystaŭ. Što nas było 40 čałaviek, što my sabralisia i na 10 aŭtamabilach pajechali niekaha bić. Nasamreč heta było nia tak, — raskazvaje pra padziei 29 červienia 2014 hodu Vadzim. — I tralejbus nichto nie blakavaŭ, jon spyniŭsia sam. Kiroŭca tralejbusa heta na adkrytym pracesie pryznaŭ. Nas było našmat mienš, čym 40 čałaviek. I aŭtamabilaŭ, zdajecca, było tolki piać. Heta maksymum. Prosta my sustrelisia z apanentami. Adbyłasia, tak by mović, svarka. Žadańnie pabicca za svaje idei było ŭzajemnym. My nikomu z vypadkovych ludziej nie chacieli pryčynić škody».

Ambicyi, junacki maksymalizm i palityka

Za miesiac da zdareńnia ŭ tralejbusie Vadzimu Bojku spoŭniłasia 18 hadoŭ. «Ambicyi ihrali, nervy. Mahčyma, junacki maksymalizm byŭ u kryvi. Heta pamyłki maładości. Ja nie chaču, kab jany paŭpłyvali na maju budučyniu. Choć heta ŭžo paŭpłyvała. Nieviadoma, jak składziecca žyćcio paśla adsiedki. U nas buduć prablemy z pracaj, ź milicyjaj», — havoryć Vadzim Bojka.

U pryčynach uziaćcia pad vartu, sudzie i pryhavory Bojka bačyć palityku. Kaža, što na fonie narastańnia niestabilnaści, vuličnych akcyjaŭ, nadychodziačaha Dnia Voli treba było prystrunić samych aktyŭnych futbolnych fanataŭ. «Pracavali na budučyniu. Užo kali my znachodzilisia ŭ SIZA, u Miensku adbyłasia vielmi padobnaja historyja, — raskazvaje Bojka. — Sutyčka pamiž fanatami «Słucku» i «Haradziei». Tam taksama byŭ raspyleny haz, taksama bojka była ŭ tralejbusie, milicyja šukała paciarpiełych, ale sprava skončyłasia ničym, nichto za kraty nia trapiŭ. Dumaju, tamu, što tam haz raspylili fanaty «Słucku» z pravymi pohladami. A na nas, antyfašystaŭ, čamuści vyrašyli nacisnuć».

Zatrymali Vadzima Bojku praz dva hady paśla bojki ŭ tralejbusie. Milicyjanty pryjšli dadomu ŭ 7.20 ranicy i, pradstaviŭšysia, pahrukali ŭ dźviery z zahadam adčynić. Bojka adčyniŭ, jaho tut ža pakłali tvaram u padłohu i pačali pieratrus. «Šok byŭ. Dla baćkoŭ asabliva, dla susiedziaŭ. Baćka — invalid, paśla insultu, i dla jaho heta stała vielmi mocnym vyprabavańniem, jon pierastaŭ razmaŭlać. Užo išoŭ na papraŭku, usio było dobra… Ja voś zaraz viarnuŭsia dadomu, a baćka dahetul nie havoryć», — raskazvaje Bojka.

Uvieś čas paśla zatrymańnia jon pravioŭ u SIZA na Vaładarcy. Ale niezadoŭha pierad Dniom Voli kamery pačali masava vyzvalać.

«Niedzie 23 čysła pačali ludziej z kamery ŭ kameru na Vaładarcy raskidvać. Vyzvalali miescy dla zatrymanych na Dzień Voli. Ad 100 da 200 čałaviek u toj dzień vyvieźli ŭ Žodzina. Mianie taksama, z Vałavikom (jašče adzin fihurant spravy fanataŭ FK «Partyzan»)», — havoryć Bojka.

Sustreča z fanatami «Dynama Miensk»

U SIZA Žodzina ŭmovy byli bolš spartanskimi. Biez televizaraŭ, ź minimumam vyhodaŭ. Tolki ścieny, nary, stoł z łavami. Raz na tydzień prynosili hazetu «SB». Knihi tolki z turemnaj biblijateki, u asnoŭnym rasiejskaja klasyka. «Ale ja mieŭ pry sabie Orueła, mnie zmahli pieradać jašče da sudu. Pieračytvaŭ «1984»», — dzielicca Vadzim.

Pa ironii losu fanata FK «Partyzan» i prychilnika antyfašysckich pohladaŭ Vadzima Bojku ŭ žodzinskim SIZA čakała sustreča z fanatami staličnaha «Dynama», viadomymi svaimi pravymi pohladami. «Staralisia ź imi padtrymlivać siabroŭskija stasunki. Choć pohlady na žyćcio ŭ nas roznyja, roznaja idealohija. My i pra heta hutaryli. Cikava było abmierkavać čužyja pohlady. Ale ja nie damohsia adkazaŭ na svaje pytańni», — havoryć Bojka.

Chłopiec pryznajecca, što navat prykładna nie ŭjaŭlaje, jakim budzie vynik razhladu apelacyi. «Ja za raźbitaje škło ŭžo adsiadzieŭ za kratami hod i try miesiacy. Navošta jašče na dva hady i dzieviać miesiacaŭ mianie tam trymać? Heta hłupstva. Chaj adpraviać na chimiju tak zvanuju, kab ja moh adpracavać, padatki płaciŭ by, — havoryć Vadzim. — Chaču tolki pieradać praz vas, što my nijakija nie ekstremisty i nie terarysty. My zvyčajnyja chłopcy i nie ŭjaŭlajem dla hramadztva niebiaśpieki».

• 0
• 0
• 0
• 0
• 0
• 0
• 0
• 0