Mieć aŭtamabil stanovicca hłupstvam: viadomy futurołah raskazaŭ pra toje, jak źmienicca śviet za 30 hadoŭ

Žan-Krystaf Boni uzhadvaje, što «amal dvaccać hadoŭ išoŭ da prafiesii futurołaha, kali jašče i prafiesii takoj nie było». Z 1999 hoda jon pracuje śpiecyjalistam pa pierśpiektyŭnym płanavańni i analitykam u vobłaści ŭpłyvu novych technałohij na ludziej.

Pavialičyć

Pra «razumnyja» damy: žyllo budzie ŭzajemadziejničać z čałaviekam

Praz 20-30 hadoŭ damy pierastanuć być pasiŭnymi ŭ adnosinach da nas. My ciapier siadzim u pakoi, i jon nijak na nas nie reahuje. Kab uklučyć śviatło, treba kudyści tknuć. Kali mnie budzie horača, ja prosta budu ablivacca potam. Na praciahu 20 hadoŭ heta źmienicca.

Pakoj budzie ŭzajemadziejničać z nami, razumieć: aha, tempieratura zanadta vysokaja, hetamu chłopcu horača, a jašče jon u drennym nastroi. Značyć, chopić nahravać pavietra, što jašče i dobraja ekanomija. «I voś tabie rassłablalnaja muzyka», — vyrašaje mašyna i ŭklučaje vaš lubimy płejlist.

Pra «razumnuju» vopratku: džynsy navučacca padhaniać pamier

Užo jość prajekty, nakštałt Jacquard ad Google, to bok adzieńnie z zašytymi datčykami i elektronikaj. Ty možaš kantralavać jaje i sačyć za pakazčykami praz smartfon.

U budučyni vopratka budzie adpaviadać našym patrebam i reahavać na navakolnaje asiarodździe.

Kali ja źbiraŭsia ŭ Maskvu, u Paryžy było 35 hradusaŭ ciapła. Tut viečaram było ŭsiaho piać, i ja źmierz. U budučyni adzieńnie prystasujecca pad mianie: sahreje, kali choładna, budzie prachałodnym, kali horača. Prablema pamieraŭ taksama źniknie. Mara dla dziaŭčat: navat kali vy stracili niekalki kiłahramaŭ, džynsy buduć jakraz.

Pra bieśpiłotnyja aŭtamabili: praz 15 hadoŭ vytvorčaść zvyčajnych mašyn źnizicca na 85%

Bieśpiłotniki ŭžo na vulicach. Mašyny ad Google jeździać biez kiroŭcy ŭžo siem hadoŭ, chaj i pa darohach Kalifornii. U bieśpiłotnych aŭtamabilaŭ jość piać uzroŭniaŭ i apošni — heta poŭnaja aŭtanomnaść. My pryjdziem da hetaha praz 15 hadoŭ. Praz 15 hadoŭ vytvorčaść zvyčajnych aŭtamabilaŭ źnizicca na 85%.

Pastupova stanovicca hłupstvam vałodać mašynaj. Bo vy vykarystoŭvajecie jaje ŭsiaho na 7%. Siem! Kožnuju chvilinu vaš aŭtamabil, jaki kaštavaŭ tysiačy rubloŭ, hublaje hrošy. Revalucyja vielizarnaja, i nastupstvy adpaviednyja.

Ja byvaŭ u šmatlikich krainach, i nie baču ničoha drennaha ŭ bieśpiłotnych aŭtamabilach. Zirnicie na Sinhapur: jany pracujuć nad tym, kab zamianić usie taksi bieśpiłotnikami. Prablema nie ŭ technałohii, a ŭ tym, što my zrobim, kab ludzi nie stracili pracu. Tamu što praź bieśpiłotniki źniknuć nie tolki kiroŭcy, ale i piłoty samalotaŭ, mašynisty ciahnikoŭ.

Pra bieśpiłotnyja drony i samaloty: dastaŭka stanie praściej

Pakul bieśpiłotniki čaściej vykarystoŭvajuć dla vajennych dziejańniaŭ. Ale ŭ budučyni jany dakładna źmieniać niekatoryja rynki, adzin ź ich — dastaŭka. Tak zvanaja «dastaŭka apošniaha kiłamietra». Amazon, «Jandeks» ŭžo sprabujuć hetuju technałohiju.

Pavialičyć

Pra niebiaśpieku technałohij: horšyja scenary mohuć spraŭdzicca

U adnym z epizodaŭ sieryjała «Čornaje lusterka» była dziaŭčyna, žyćcio jakoj zaležała ad rejtynhu ŭ sacsietcy. Uber robić toje ž samaje. Ad rejtynhu zaležyć, ci atrymajecie vy dostup da pasłuh.

Kab adbylisia ŭsie samyja horšyja scenary, treba tolki čas i ŭdzieł niekalkich nie samych lepšych ludziej. Varyjanty raźvićcia padziej pierad nami. Jašče jość čas, kab rabić niešta niezvyčajnaje.

Tamu ja imknusia mianiać myśleńnie ludziej, kab źmianić śviet. Hrošy i biznes — heta nie samaje važnaje, treba dać ludziam adukacyju i šaniec raźvivacca. Google stvaraje kampanii, kab zmahacca sa śmiarotnymi chvarobami. Heta nie pra biźnies, heta dla ludziej.

• 0
• 0
• 0
• 0
• 0
• 0
• 0
• 0