U Bielhii ŭ ścianie doma znajšli skarb z załatych źlitkaŭ i maniet na 9 miljonaŭ jeŭra
Budaŭniki znajšli skarb u ścianie padvała pad domam, kali prakładvali trasu dla kanalizacyjnych trub.
Rabočyja, jakija pierabudoŭvajuć stary dom u Bielhii, znajšli ŭ ścianie padvała pad im skarb — załatyja źlitki i maniety, ahulny košt jakich moža dasiahać dzieviaci miljonaŭ jeŭra, piša VVS.
«Ja spačatku padumaŭ, što heta manietki pa 1 jeŭra. Ale potym ubačyŭ pobač załaty źlitak. I tut my zrazumieli, što znajšli niešta bolšaje», — raskazaŭ bielhijskaj viaščalnaj kampanii VRT člen bryhady, 18‑hadovy student pa imieni Kobe.
Budaŭniki vyklikali palicyju. Pakinuć skarb sabie, jak jany tłumačać, było b niejmavierna.
«Tam tak šmat maniet i źlitkaŭ — heta było b amal niemahčyma, — skazaŭ VRT bryhadzir Marya. — Dy i heta było b prosta kradziažom».
«Dzieviać miljonaŭ jeŭra — stolki nie schavaješ», — pahadziŭsia Kobe.
Usie źlitki pramarkiravanyja, ale kali jany i maniety byli vyrableny, nie paviedamlajecca. Infarmacyi pra toje, kali i jak jany byli zamuravanyja ŭ ścianu, taksama niama.
Jak paviedamlaje bielhijskaja presa, dom u akruzie Dendermonde na poŭnačy Bielhii, dzie byŭ znojdzieny skarb, z kanca XIX stahodździa naležaŭ pradprymalniku-pivavaru, a ciapier rabočyja całkam pierabudoŭvajuć jaho pad patreby arhanizacyi CAW Oost-Vlaanderen, jakaja kupiła jaho i zajmajecca sacyjalnaj dapamohaj u Dendermonde.
Dyrektar CAW Oost-Vlaanderen Hiert Chilert skazaŭ žurnalistam, što vielmi rady hetaj uražalnaj znachodcy i spadziajecca, što ŭ vyniku srodki atrymaje jaho dabračynnaja arhanizacyja i vykarystaje na dapamohu ludziam.
Adnak, jak adznačaje bielhijskaja presa, nie ŭsio tak prosta.
Pa-pieršaje, pišuć žurnalisty, skarb pavinny padzialić napałovu rabočyja, jakija jaho znajšli, i arhanizacyja, jakaja vałodaje domam.
Pa-druhoje, pavodle bielhijskich zakonaŭ naležyć čakać piać hadoŭ, ci nie abjavicca zakonny ŭładalnik skarbu.
I pa-treciaje, skarb nie dastaniecca nikomu ź ich, kali vyśvietlicca, što schavanyja kaštoŭnaści zdabyty złačynnym šlacham.
Pakul miascovaja palicyja pačała rasśledavańnie i zaklikała ludziej nie źjazdžacca da «załatoha» doma, zajaviŭšy, što jon i tak užo pieraviernuty dahary nahami, a skarb pieraviezieny ŭ nadziejnaje miesca.
Ciapier čytajuć
«Jana hadami ciarpieła, a paśla adzin raz udaryła muža nažom — hetaha chapiła, kab zabić»14
Kamientary