U abłasnoj balnicy ŭpieršyniu pačali rabić pierasadku vałasoŭ. Kolki kaštuje?
Upieršyniu siarod rehijanalnych miedustanoŭ krainy ŭ Bresckaj abłasnoj balnicy stali vykonvać apieracyi pa pierasadcy vałasoŭ. Śpiecyjalisty abiacajuć pryžyvalnaść da 95-98% vałasoŭ i miedycynski kantrol na ŭsich etapach adnaŭleńnia, piša «Lusterka».
U Bresckaj abłasnoj balnicy pačali rabić apieracyju pa pierasadcy vałasoŭ. Heta infarmacyja źjaviłasia na sajcie miedycynskaj ustanovy.
Praceduru vykonvajuć mietadam FUE. Jak skazana na sajcie miedustanovy, FUE, abo follicular unit extraction, heta małainvaziŭnaja technika adnaŭleńnia vałasoŭ. Padčas jaje lekar paštučna vymaje vałasianyja falikuły (hrafty) z donarskaj zony (zvyčajna patylica abo bakavyja častki) i pierasadžvaje ich u zonu abłysieńnia. Pracedura pravodzicca biez razrezaŭ i nakładańnia švoŭ.
Pryžyvalnaść abiacajuć da 95−98%.
Vykonvaje apieracyju chirurh-transpłantołah Vasil Jurkoŭski, jaki prajšoŭ śpiecyjalnaje navučańnie ŭ Turcyi.
U intervju TikTok-kanału «Hłavnyj obzorŝik» miedyk raskazaŭ, što praceduru robiać pad miascovaj aniestezijaj, i jana niebalučaja.
— Lažyš, i, možna skazać, atrymlivaješ zadavalnieńnie ad pracesu, — pažartavaŭ chirurh.
Lažać pryjdziecca doŭha: u siarednim apieracyja zajmaje šeść-vosiem hadzin. Padčas jaje doktar i pacyjent robiać pierapynki, kab, naprykład, pajeści ci schadzić u tualet.
— Kožny hraft pierabirajecca ŭručnuju. Treba čałavieku pierasadzić [ich] try tysiačy, i try tysiačy [pa adnym] pierabiraješ, zabiraješ, sartuješ. Dla kožnaha robiš asobnyja adtuliny, kožny paasobku pierasadžvaješ, — apisvaje toje, što adbyvajecca, Vasil Jurkoŭski. — Heta nijak nie moža być chutka i kaštuje nie try rubli, jak kažuć.
Pavodle słoŭ doktara, u siarednim padčas apieracyi pierasadžvajuć kala troch tysiač hraftaŭ. Košt pracy z adnym — dva-try rubli.
U vyniku ŭ siarednim apieracyja abydziecca ŭ šeść-dzieviać tysiač rubloŭ.
Doktar adznačaje, što tyja, chto cikaviŭsia prejskurantam na pasłuhu ŭ Turcyi, Maskvie ci pryvatnych klinikach, razumiejuć: «Heta maksimalna kamfortny košt».
— U nas niama zvyš niejkich nadbavak. Časta idzieš na praceduru, potym dadatkova [płaciš] za narkoz, pieraviazačnyja materyjały i h.d., — pieraličvaje miedyk. — U nas čałaviek prychodzić, jon kankretna viedaje, jakuju sumu zapłacić.
Vasil Jurkoŭski raskazvaje, što paśla apieracyi pacyjenta adrazu ž adpuskajuć dadomu. Pry hetym doktar praciahvaje kantaktavać z čałaviekam uvieś pieryjad adnaŭleńnia.
— Jany pryjazdžajuć na ahlady. My ź imi damaŭlajemsia, kali jany buduć pakazvacca. Heta nie ŭ Turcyi, kali ty źjechaŭ, ciabie na darožku pierachryścili i z Boham, jak kažuć, — pažartavaŭ miedyk. — A tut usio kantralujecca. A hałoŭnaje, usio heta robicca ŭ apieracyjnych, daktarami. Tamu što ŭ nas usio stroha i kantralujecca. I ŭ nas jość niejkija harantyi, u adroźnieńnie ad niekatorych, skažam tak.
Chirurh adznačyŭ, što, jak i lubaja apieracyja, pierasadka vałasoŭ patrabuje padrychtoŭki i času dla hetaha.
— Tym nie mienš žadajučych užo dastatkova, — zajaviŭ Vasil Jurkoŭski. — Ludzi zapisvajucca, ludzi hatovyja rabić. Adna tolki dumka, što nikudy nie treba jechać, heta možna rabić u našych rodnych ścienach. Jany [pacyjenty] tolki «za». Chutkaja reabilitacyja. Samyja składanyja tydzień-dva. A dalej zvyčajny sposab žyćcia bieź jakich-niebudź mocnych abmiežavańniaŭ.
U abłasnych balnicach inšych rehijonaŭ krainy pierasadku vałasoŭ pakul nie robiać. U toj ža čas jaje, naprykład, pravodziać u Respublikanskim navukova-praktyčnym centry miedycynskaj ekśpiertyzy i reabilitacyi. Ukazana jana ŭ pieraliku pasłuh u klinicy Viciebskaha mieduniviersiteta. Časta biełarusy jeździać pierasadžvać vałasy ŭ Turcyju.
Ciapier čytajuć
«Jana hadami ciarpieła, a paśla adzin raz udaryła muža nažom — hetaha chapiła, kab zabić»12
Kamientary
A nie tak jak siońnia: čałavieku pa miedyčnych pakazańniach patrebnaje uzi, ci fhds, ci MRT, a tałon na jaho ŭčastkovy lekar nie daje, bo niama tałonaŭ. I čałaviek vymušany iści rabić płatna.
U tym liku onkachvoryja ludzi, u jakich chvaroba nie čakaje, pakul kiraŭnictva palikliniki vydaść učastkovym lekaram na ŭčastak tałony.
A potym Biełstat ździŭlajecca, čamu takaja vysokaja śmiarotnaść. Pryčym nie starych ludziej, a siaredniaha, pracazdolnaha ŭzrostu.
A Ministerstva pracy ździŭlajecca, čamu nie moža zapoŭnić pustujučyja vakansii.