Pieršyja paśla Katałonii. U paŭnočnych rehijonach Italii prachodziać refierendumy

22 kastryčnika Vieniecyja i Łambardyja na poŭnačy Italii pravodziać refierendumy ab pradastaŭleńni hetym rehijonam bolšaj aŭtanomii ad Ryma.

Kali refierendum tolki rychtavaŭsia, ułady Vieniecyi chacieli sfarmulavać pytańnie tak, kab havorka išła nie tolki pra aŭtanomiju, ale i pra mahčymuju niezaležnaść rehijona ad Italii.

Ale Kanstytucyjny sud krainy paličyŭ by takoje hałasavańnie niedapuščalnym.

Palityki vyrašyli pavieści siabie chitrej i abviaścić refierendum mienavita pytańniem aŭtanomii.

Zhodna z 116 artykułam Kanstytucyi Italii rehijony mohuć patrabavać ad Ryma bolšaj aŭtanomii. Adpaviedna, hałasavańnie źjaŭlajecca zakonnym.

Čaho jany chočuć

U pieršuju čarhu, bolšaj finansavaj samastojnaści.

Abodva rehijony chočuć pakidać vialikuju dolu zaroblenych hrošaj u siabie, a nie adpraŭlać ich u Rym u formie padatkaŭ.

Vieniecyja (jana ž Vienieta) i Łambardyja — heta samyja bahatyja rehijony Italii. Razam jany vyrablajuć tracinu VUP krainy.

Hubiernatar Łambardyi (hałoŭny horad — Miłan, siarod viadomych haradoŭ Brešya, Koma, Bierhama, Monca) Rabierta Maroni zajaviŭ, što taksama ŭniasie prapanovu ab źmianieńniach u kanstytucyju, kab atrymać bolš aŭtanomii ŭ śfiery biaśpieki i imihracyi.

Nasielnictva Łambardyi składaje amal 10 młn čałaviek, što składaje 1/6 usioj Italii, a VUP — kala 400 młrd jeŭra.

Nasielnictva Vieniecyi — 5 młn čałaviek.

Hubiernatar Vieniecyi Łuka Dzaja taksama choča atrymać bolš paŭnamoctvaŭ dla rehulavańnia turystyčnaj śfiery.

Refierendumy ŭ Vieniecyi i Łambardyi buduć kansultatyŭnymi (heta značyć ich vyniki ni da čaho nie abaviazvajuć ŭrad krainy).

Adnak Rymu budzie składana nie ličycca ź mierkavańniem 15-miljonnaha nasielnictva dvuch samych mocnych z ekanamičnaha punktu hledžańnia rehijonaŭ.

Vieniecyja jak Barsiełona

Štodnia Vieniecyju naviedvaje 75 tysiač čałaviek. Heta bolš, čym ułasnaje nasielnictva horada (jano składaje 50 tysiač čałaviek).

Hadavyja pakazčyki ŭražvajuć jašče bolš. Kožny hod pahladzieć na italjanskuju žamčužynu pryjazdžaje bolš za 25 miljonaŭ turystaŭ.

Niekatoryja ź ich viaduć siabie niepryhoža: nyrajuć u kanały z mastoŭ, malujuć hrafici na staradaŭnich damach.

Municypalitet ź ciažkaściu spraŭlajecca z tonami śmiećcia, jakoje pakidajuć amatary piknikoŭ na vieniecyjanskich kanałach.

U horadzie začyniajucca tak patrebnyja miascovym žycharam jurydyčnyja kantory, miedycynskija ofisy i zvyčajnyja praduktovyja kramy. Na ich miescy vyrastajuć haścinicy.

U vyniku miascovyja žychary - asabliva moładź - pierajazdžajuć «na maciaryk». Nasielnictva Vieniecyi imkliva stareje.

Vulicy Vieniecyi apanavali kramy viadomych brendaŭ, sietkavyja kafe i kramy, jakija handlujuć tannymi suvienirami, vyrablenymi ŭ Kitai. Vieniecyjanskija majstry ź ich unikalnymi, ale niatannymi vyrabami akazvajucca na ŭzbočynie.

• 0
• 0
• 0
• 0
• 0
• 0
• 0
• 0