Jak nie zachvareć na cystyt — samuju raspaŭsiudžanuju žanočuju chvarobu

My raspytali zahadčycu ŭrałahičnaha adździaleńnia miedycynskaha centra «Łade» Volhu Antonavu, što važna viedać pra hetuju chvarobu i jak jaje paźbiehnuć.

Što takoje cystyt i jak jon prajaŭlajecca

Cystyt — samaja raspaŭsiudžanaja mačavaja infiekcyja. Faktyčna kožnaja žančyna choć raz u žyćci ź joj sutykajecca.

Cystyt adrazu daje pra siabie znać: ciahnučy bol unizie žyvata, u pachvinnych zonach, reź pry močavypuskańni, biaskoncyja patrabavańni arhanizma schadzić u prybiralniu, načnyja padjomy pa tych ža pryčynach. Kali stan vostry, to ŭ mačy moža być kroŭ.

Čamu chvarejuć mienavita žančyny

U žančyn uretra karaciejšaja i šyrejšaja, čym u mužčyn, i infiekcyja lohka traplaje ŭ mačavy puchir. Tamu cystyt i ličycca najpierš žanočaj chvarobaj. Pryčym pakutujuć na cystyt u lubym uzroście: dzieci, dziaŭčaty, što pačynajuć žyć pałavym žyćciom, žančyny ŭ hadach, u jakich iduć harmanalnyja pierabudovy, klimaks. Stončanaja ślizistaja va ŭretry, u mačavym puchiry, u pochvie mienš zdolnaja supraciŭlacca bakteryjam.

U mužčyn čaściej za ŭsio razam z zapaleńniem mačavoha puchira adbyvajecca zapaleńnie prastaty. To bok asobnaha dyjahnazu jak cystyt praktyčna nie byvaje, bo heta sumiesnaja zapalenčaja reakcyja.

Što pravakuje chvarobu

Pieraachaładžeńnie, seks, niapravilny harmanalny fon. Kali havaryć pra dziaciej, to katalizataram mohuć być parazitozy. Praź ich uźnikaje zapaleńnie pierad pochvaj, jakoje moža pierajści na ŭretru i mačavy puchir.

Jak ni banalna, cystyt moža spravakavać stres. Da prykładu, kali mačavy puchir — heta «słabaje» miesca žančyny, i prablemy ŭžo byli, to pry stresie, pieraachałodžvańni, kali imunitet padaje, jany mohuć abvastrycca.

Taksama spryjaje cystytu našeńnie štodzionnych prakładak, bo heta vyklikaje dyśbijoz u pochvie. Toje samaje tyčycca i strynhaŭ, tamu što praź ich bakteryi mohuć trapić z zadniaha prachodu ŭ vobłaść uretry.

Žančyny, jakija lubiać sałodkaje, taksama bolš schilnyja da cystytu. Sałodkaje spryjaje razmnažeńniu kišečnaj pałački — samaha častaha ŭzbudžalnika chvaroby. Kišečnaja pałačka žyvie va ŭsich ludziej, jana dapamahaje arhanizmu. Ale, na žal, u hetym vidzie bakteryj jość patahiennyja štamy, jakija vyklikajuć infiekcyi mačavych šlachoŭ. Kali ŭ žančyny raźvivajecca dysbakteryjoz u kišečniku, to jon abaviazkova paŭpłyvaje i na inšyja orhany. U vyniku farmirujecca niapravilnaja mikrafłora ŭ pieraddźvierji pochvy, što moža pryvieści da cystytu.

U hrupie ryzyki taksama znachodziacca žančyny, jakija pakutujuć na cukrovy dyjabiet i roznyja hiniekałahičnyja chvaroby.

Jak seks źviazany z cystytam

Padčas seksu ŭłasnaja infiekcyja žančyny čysta miechanična pieranosicca mužčynskim pałavym orhanam ź pieraddźvierja pochvy i ŭcirajecca va ŭretru. Heta moža adbycca navat pry abaronienym seksie.

Moža być i inšaja situacyja, kali na skury ŭ mužčyny žyvie mnostva jaho bakteryj, jakija navat nie ličacca patahiennymi. Jon da ich pryvyk, jany ŭ jaho dyskamfortu nie vyklikajuć, jon ich nie adčuvaje. Ale dla žančyny, u jakoj imunitet čaściej za ŭsio słabiejšy, jaho mikroby mohuć źjaŭlacca patahiennymi. Padčas seksu jon zanosić ich žančynie, uciraje ź piaredniaj ścienki pochvy va ŭretru. Dalej jany padymajucca z uretry ŭ mačavy puchir i zdarajecca cystyt.

Što takoje «cystyt miadovaha miesiacu»

Heta jakraz toj pieryjad, kali ŭ dziaŭčat pačynajecca aktyŭnaje pałavoje žyćcio. U mnohich žančyn uretra raźmieščanaja vielmi blizka da piaredniaj ścienki pochvy. Bakteryi miechanična zanosiacca padčas seksu i z preziervatyvam, i bieź jaho (sa skury pałavoha partniora).

Mikrafłory partnioraŭ pavinny «pasiabravać» adna z adnoj. Heta adbyvajecca niachutka, možna i da paŭhoda, i da hoda čakać. Tamu zaŭsiody musić być postkaitalnaja prafiłaktyka. Paśla seksu treba schadzić u prybiralniu pamačycca, pamycca z hiel-dušam dla intymnaj hihijeny i nie lišnim budzie pryniać kapsułu ŭraantyseptyku.

Jak zaścierahčysia

Imknucca nie pieraachałodžvacca, pić šmat vady, 1,5—2 litry ciaham dnia. Taksama dobra pić čaj, ale lepš nie zialony, bo jon moža spryjać dyskamfortu pry močavypuskańni, a traviany. I nielha nikoli ciarpieć, kali chočacca ŭ prybiralniu, bo padčas tryvańnia ŭ mačavym puchiry razmnažajucca bakteryi. Mikrafłora ŭ pochvie, kišečniku pavinna być u normie. Nielha dapuskać dysbakteryjoz. Kali, da prykładu, zdaryŭsia panos, jaho abaviazkova treba lačyć, a nie čakać, pakul jon projdzie sam.

Jakija mohuć być nastupstvy

Infiekcyja moža padniacca ŭ nyrki i spravakavać raźvićcio pijełaniefrytu. Pry hetym zachvorvańni ŭzdymajecca tempieratura, źjaŭlajecca łamota i bol u pajaśničnaj vobłaści, ahulnaja słabaść, niedamahańnie, moža vanitavać. Pijełaniefryt — heta surjoznaja prablema, jakuju lečać u tym liku ŭ stacyjanary.

Ci možna vylečyć cystyt całkam

Možna, ale treba vykonvać usie pieraličanyja vyšej prafiłaktyčnyja miery. Kali ŭsio heta rabić, to možna nikoli i nie zachvareć. Važna nie zapuskać chvarobu i nie dapuskać recydyvaŭ, jakim zaŭsiody jość pryčyna.

Apošniaje nou-chau — vakcyna ad cystytu. Jaje ŭvodziać try razy ź intervałam 10 dzion. Pryščepka harantuje, što chvaroba nie paŭtorycca ciaham hoda, ale paśla nieabchodnaja revakcynacyja, — padahulniaje doktar.

Pavialičyć

UNN 101431475

• 0
• 0
• 0
• 0
• 0
• 0
• 0
• 0