Daišnikam Bresckaj vobłaści na vychodnych trapilisia «viasiołyja» parušalniki.
Pieršy vypadak adbyŭsia 4 lutaha kala 4 hadziny ranicy la vioski Novaja Popina (Drahičynski rajon).
Daišniki chaciełai spynić «Aŭdzi A6», ale kiroŭca tolki paddaŭ hazu. Pačałasia pahonia.
Da pieraśledu parušalnika dałučylisia jašče niekalki ekipažaŭ DAI, jakim udałosia spynić «Aŭdzi». Kiroŭca pierasieŭ na zadniaje pasažyrskaje siadzieńnie i zabłakavaŭ dźviery aŭtamabila znutry. Inśpiektary nieadnarazova prapanoŭvali kiroŭcu vyjści z aŭtamabila, ale jon nie reahavaŭ i staiŭsia. Dla akazańnia dapamohi kiroŭcu, jaki nie padavaŭ prykmiet žyćcia, było pryniata rašeńnie raźbić škło, kab adkryć dźviery aŭtamabila. Inśpiektary advieźli kiroŭcu ŭ balnicu, dzie toj admoviŭsia ad miedycynskaha ahladu. U vyniku na 27-hadovaha miascovaha žychara składzienyja try administracyjnych materyjały.
Druhoje nadzvyčajnaje zdareńnie adbyłosia amal u toj ža čas u Ivacevičach. U hetym vypadku daišniki spynili «Reno Łohan».
31-hadovy kiroŭca admoviŭsia vyjści z aŭtamabila.
«Akramia taho, zastavacca ŭ sałonie aŭtamabila jamu dapamahali pasažyry, jakija trymali jaho za vopratku. Patrabavańni supracoŭnikaŭ DAI kiroŭca nie vykonvaŭ, choć jaho nieadnarazova papiaredžvali ab prymianieńni fizičnaj siły», — paviedamlajuć milicyjanty.
U vyniku kiroŭcu ŭsio ž vyciahnuli z sałona siłaj. Ale na «vyratavańnie» tavaryša kinulisia jaho siabry-pasažyry (miascovyja žychary 1995 i 1996 h.n.).
«Pravakujučy supracoŭnikaŭ DAI svaim cyničnym i nieadekvatnymi pavodzinami, pasažyry sprabavali «vyzvalić» svajho tavaryša, ale nie zmahli. «Načnyja pryhody» dla kampanii praciahnulisia ŭ Ivacevickim RAUS. U ciapierašni čas u dačynieńni da zatrymanych pravodziać śledčyja dziejańni supracoŭniki Śledčaha kamiteta. Na kiroŭcu i pasažyraŭ składzieny administracyjnyja materyjały. Taksama vyrašajecca pytańnie ab zaviadzieńni kryminalnaj spravy», — paviedamlaje DAI Bresckaj vobłaści.
Kamientary