Rasijskaje pasolstva ŭ Tajłandzie pieranakiravała spravu Naści Rybki i Aleksa Leśli biełaruskamu boku
Rasijskaje pasolstva nie zajmajecca pytańniami zamiežnych hramadzian, «u tym liku hramadzian Respubliki Biełaruś», zajaviŭ RBK zahadčyk konsulskaha adździeła pasolstva Rasii ŭ Tajłandzie Uładzimir Sasnoŭ.
Na prośbu prakamientavać zatrymańnie Anastasii Vašukievič (Naści Rybki) i Alaksandra Kiryłava (Aleksa Leśli), rasijski dypłamat pieranakiravaŭ pytańnie biełaruskamu boku.
U MZS Biełarusi RBK paviedamili, što pasolstva našaj krainy ŭ Vjetnamie adsočvaje situacyju.
«Umovy ich utrymańnia identyčny ŭmovam utrymańnia inšych zamiežnych hramadzian. <… Jany> byli aryštavanyja ŭ suviazi z parušeńniem miascovaha zakanadaŭstva — ažyćciaŭleńniem na terytoryi Tajłanda niezakonnaj pracoŭnaj dziejnaści biez adpaviednaha dazvołu miascovych uładaŭ», — padkreśliŭ Sasnoŭ.
Im moža pahražać albo štraf, albo departacyja, albo turemnaje źniavoleńnie terminam da dvuch hadoŭ z nastupnaj departacyjaj na radzimu. Pasiadžeńnie suda, na jakim budzie abranaja miera strymańnia, pavinna adbycca na praciahu dvuch miesiacaŭ z momantu zatrymańnia.
«Nijakaj palityki, jak chočuć pradstavić šmatlikija ŚMI, u dadzienaj spravie niama. Zvyčajnaja kryminalnaja sprava, raspačataja miascovym sudom za nielehalnuju pracu», — zapeŭniŭ RBK dypłamat.
U kancy lutaha palicyja Tajłanda zatrymała Vašukievič, Kiryłava i jašče vosiem rasijan pa padazreńni ŭ niezakonnym praviadzieńni seks-treninhaŭ u Patai. Pa słovach Rybki, na treninh, jaki pravodziŭ Aleks Leśli, pryjšli «ludzi ź Interpoła», a ŭžo ŭ palicyi da zatrymanych «pryjšoŭ rasijski konsuł, jaki skazaŭ, što nas vielmi chočuć bačyć u Rasii». Paźniej Rybku i jašče piacioch čałaviek adpuścili pad zakład, adnak paźniej znoŭ zatrymali i źmiaścili pad vartu.
Jak raspavioŭ RBK znajomy Rybki i Leśli Pavieł Junko, na adras zatrymanych pastupali pahrozy ŭ imihracyjnaj turmie ŭ Banhkoku. Pavodle jaho, u ich kanfiskavali telefony i zapatrabavali paroli ad devajsaŭ «na padstavie taho, što mocna pabjuć ŭ vypadku admovy». Infarmacyju pra pahrozy paćvierdziŭ i druhi znajomy zatrymanych. Pavodle abodvuch surazmoŭcaŭ RBK, nichto ŭ vyniku nie paviedamiŭ pravaachoŭnikam hetyja paroli.
Praź niekatory čas Vašukievič i Kiryłaŭ paprasili palityčny prytułak u ZŠA. Vašukievič śćviardžaje, što maje infarmacyju ab suviaziach rasijskich deputataŭ z prezidentam ZŠA Donaldam Trampam i eks-kiraŭnikom jaho pieradvybarčaha štaba Połam Manafortam.
Naścia Rybka i Aleks Leśli taksama źjaŭlajucca adkazčykami pa pazovie Aleha Dzierypaski pra publikacyju biez dazvołu materyjałaŭ ab pryvatnym žyćci rasijskaha biznesmiena. Svaju skarhu ŭ sud jon padaŭ paśla publikacyi rasśledavańnia Fondu baraćby z karupcyjaj Alaksieja Navalnaha, u jakim raspaviadałasia pra adpačynak namieśnika staršyni ŭrada Rasii Siarhieja Prychodźki na jachcie Elden, jakaja naležyć Dzierypasku. Rasśledavańnie było zasnavana na fotazdymkach i videa z «Instahrama» Vašukievič i infarmacyi, apisanaj u jaje knizie.
Kamientary