Nazvać vulicu Vaładarskaha ŭ honar bratoŭ Łuckievičaŭ haradzkija ŭłady admovilisia, bo «nia ekstrany» vypadak. Što z ustanoŭkaj doški ŭ honar 100-hodździa abviaščeńnia niezaležnaści BNR, niezrazumieła: pryčynaŭ takoha doŭhaha razhladu ŭ adkazie nie nazyvajuć, piša Radyjo Svaboda.
Mastak Mikoła Kupava atrymaŭ adkaz ad namieśnika staršyni Mienharvykankamu Ihara Jurkieviča nakont dźviuch inicyjatyvaŭ, źviazanych sa 100-hodździem abviaščeńnia niezaležnaści Biełaruskaj Narodnaj Respubliki. Jak raskazaŭ Kupava Svabodzie, z doškaj «pakul nie pryniataje rašeńnia», ale pryčyny taho, čamu rašeńnia niama, nie nazyvajucca.
Haradzkija ŭłady dali papiaredniuju vusnuju zhodu na ŭstanoŭku doški, vyrablenaj 25 hadoŭ tamu, jašče 1 sakavika, ale kančatkovaj zhody niama dahetul. Za košt achviaravańniaŭ (patrebnuju sumu sabrali za try hadziny) skulptar Ihar Zasimovič vyrabiŭ novuju došku, bo staraja pryjšła ŭ nieprydatny stan.
Mastackaja rada Mienharvykankamu jašče ŭ krasaviku zaćvierdziła vonkavy vyhlad doški, adnak, nasupierak raniejšym damoŭlenaściam, aficyjnaha rašeńnia Mienharvykankamu ab ustanoŭcy niama dahetul. Kupava miarkuje, što «tak možna ciahnuć i hod, i dva», ale daviadziecca nabracca ciarpieńnia.
Ideju pierajmienavać vulicu Vaładarskaha ŭ honar bratoŭ Łuckievičaŭ, ideolahaŭ adradžeńnia biełaruskaj dziaržaŭnaści, Mienharvykankam adchiliŭ, bo takija pierajmienavańni robiacca «tolki ŭ ekstranych vypadkach». Taksama haradzkija ŭłady spasyłajucca na toje, što niadaŭna ŭžo byŭ ustalavany memaryjalny znak u honar bratoŭ Łuckievičaŭ — u parku Kupały, na miescy, dzie stajaŭ ichny dom.
«Bolš za ŭsio paskudstvaŭ pryčyniaje jaŭrejonyš». Dziciačaja doktarka ź Minska šakavała antysiemickimi vykazvańniami35
Kamientary