10 žniŭnia paśla dopytu ŭ Śledčym kamitecie Biełarusi vyzvalili karespandenta Deutsche Welle ŭ Miensku Paŭluk Bykoŭski, paviedamlaje «Radyjo Svaboda».
Paŭluk Bykoŭski byŭ zatrymany 8 žniŭnia na 72 hadziny. Hety termin musiŭ skončycca ŭ subotu, 11 žniŭnia. Pierad hetym u jaho kvatery byŭ praviedzieny pieratrus z kanfiskacyjaj elektronnych nośbitaŭ infarmacyi. Deutsche Welle źviarnułasia da biełaruskaha ambasadara ŭ Berlinie z patrabavańniem nieadkładna vyzvalić Bykoŭskaha.
Za kratami zastajecca hałoŭnaja redaktarka infarmacyjnaha ahienctva BiełaPAN Iryna Leŭšyna.
Uviečary 9 žniŭnia na volu vyjšli hałoŭnaja redaktarka Tut.by Maryna Zołatava, a taksama Hanna Kałtyhina i Hanna Jermačonak z Tut.by, redaktar sajtu hazety «Biełarusy i rynak» Alaksiej Žukaŭ i žurnalistka infarmacyjnaha ahienctva BiełaPAN Taciana Karaviankova. Udzień 9 žniŭnia była vyzvalenaja Halina Ŭłasik (Tut.by).
Śledčy kamitet Biełarusi z hetaj nahody zajaviŭ, što padčas praviadzieńnia śledčych dziejańniaŭ atrymanyja dokazy, śviedčańni padazravanych, jakija paćviardžajuć fakty, što pasłužyli padstavaj dla zaviadzieńnia kryminalnaj spravy pavodle art. 349 («niesankcyjanavany dostup da kamputarnaj infarmacyi») Kryminalnahu kodeksu Respubliki Biełaruś. Havorka idzie pra niesankcyjanavany dostup da płatnaj stužki dziaržaŭnaha infarmahienctva BiełTA.
Bolšaść zatrymanych z redakcyj niezaležnych ŚMI pakul adpuščanyja pad padpisku ab niavyjeździe, viadziecca śledztva, im pahražaje da 2 hadoŭ turmy. Hałoŭnamu redaktaru Tut.by Marynie Zołatavaj taksama pradjavili abvinavačańnie pavodle artykułu «Biaździejnaść słužbovaj asoby» Kryminalnaha kodeksu Biełarusi, pavodle jakoha joj pahražaje da 5 hadoŭ źniavoleńnia i zabarona zajmać peŭnyja pasady ci zajmacca peŭnaj dziejnaściu.
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary