Jašče pierad tryma punktami propusku na miažy pabudujuć zony čakańnia z elektronnaj čarhoj
U Biełarusi płanujuć pabudavać novyja zony čakańnia z elektronnaj čarhoj jašče kala troch punktaŭ propusku na miažy ź Jeŭrasajuzam, paviedamlaje BiełTA.
Pa słovach kiraŭnika Dziaržaŭnaha mytnaha kamiteta Uładzimira Arłoŭskaha, paśla madernizacyi punktaŭ «Brest» i «Kazłovičy» ŭłady praciahnuć raźvivać pamiežnuju infrastrukturu i na inšych napramkach.
Nastupnym abjektam stanie punkt propusku «Bierastavica» na miažy z Polščaj. Tam u najbližejšy čas płanujuć pačać budaŭnictva placoŭki dla elektronnaj čarhi. Zaviaršyć prajekt chočuć da kanca 2026 hoda.
Jašče adnu takuju zonu płanujuć stvaryć kala punkta «Hryharoŭščyna» na łatvijskim napramku. Budaŭnictva pavinna pačacca letam, a skončycca ŭ nastupnym hodzie.
Źmieny zakranuć i litoŭski kirunak. Kala punkta «Kamienny Łoh» užo isnuje placoŭka pry łahistyčnym centry, ale jaje nie zaŭsiody chapaje pry vialikich čerhach. Tamu ŭłady chočuć pabudavać asobnuju zonu mienavita dla elektronnaj čarhi. Pačatak budaŭnictva zapłanavany na nastupny hod.
Takija placoŭki dazvalajuć zahadzia rehistravać transpart u sistemie elektronnaj čarhi i stvarajuć bolš zručnyja ŭmovy dla kiroŭcaŭ i pasažyraŭ padčas čakańnia pierasiačeńnia miažy. U DMK ličać, što heta dapamoža źmienšyć nahruzku na padjezdy da punktaŭ propusku i zrobić praces bolš arhanizavanym.
Ciapier čytajuć
Daišnik, jakoha źbiŭ mašynaj piensijanier pad Minskam, pamior u balnicy. Jamu zładzili pyšnaje pachavańnie18
Kamientary