Na vynikovym kancercie piataha siezonu konkursu maładych vykanaŭcaŭ, jaki pravodziać partał TuzinFM.by i fond «Viartańnie», možna budzie pačuć žyŭcom usich troch finalistaŭ. A ŭ jakaści haściej vystupić «Eryk i Ja», novy prajekt lidara hurta TonqiXod Uładzia Lankieviča.
Finalisty sioletniaha konkursu byli adabranyja z 25 pretendentaŭ pavodle dema-zapisaŭ, jakija jany zrabili na vieršy sučasnych biełaruskich paetaŭ i žyvoha prasłuchoŭvańnia. Jany ŭziali ŭdzieł u adukacyjnaj siesii, dali kancerty pry padtrymcy viadomych vykanaŭcaŭ i atrymali mahčymaść darabić u studyi i prezientavać kančatkovuju viersiju konkursnaj pieśni.
23-hadovy vakalist Pavał Kozič i 26-hadovy kłavišnik Cichan Bukraba razam z strunnym trya zapisali pieśniu «Tramvaj» na vierš Antona Rudaka. 22-hadovaja Alesia Druk z elektronnaha prajektu Maximalism vykanała pieśniu «Frahmienty» na słovy Hanny Komar. A 21-hadovy Raman Vołaźnieŭ napisaŭ muzyku da vierša Mikity Najdzionava «Salonyja sny».
Kožny ź finalistaŭ syhraje 30-chvilinny set na vynikovym kancercie «Zaśpiavaj-5», jaki projdzie 29 sakavika ŭ novym minskim kłubie «Berlin». Pry kancy imprezy budzie nazvany pieramožca, jaki atrymaje hrašovy pryz u pamiery 1500 rubloŭ na realizacyju svaich dalejšych tvorčych zadumaŭ.
«Chto by nie atrymaŭ hałoŭny pryz, užo ciapier možna skazać, što kožny ź finalistaŭ zastaŭsia ŭ vyjhryšy: Maximalism pasiabravali z paetkaju Hannaj Komar i pracujuć užo razam pa-za konkursam. Paŭła Koziča i Cichana Bukraba konkurs padšturchnuŭ da stvareńnia aŭtarskaha prajektu i jany na ŭzdymie stvaryli jašče niekalki kampazicyjaŭ. Dla Ramana Vołaźnieva konkurs staŭ nahodaj źviarnucca da sučasnaj paezii i vykanaŭca źbirajecca praciahnuć šlach u hetym kirunku. A ŭsie my pa vyniku atrymali try novyja vydatnyja biełaruskija pieśni», — kaža pradusar konkursu Siarhiej Budkin. U žury konkursu sioleta ŭvajšli śpiavačka i piedahoh Irena Katvickaja, muzyka Aleh Chamienka, saŭndpradusar Andrej Akataŭ, kampazitarka i śpiavačka Natalla Kunickaja, muzyka Aleś-Francišak Myškievič, kiraŭnik fondu «Viartańnie» Pavał Bierahovič.
Admysłovymi haściami na finalnym kancercie «Zaśpiavaj-5» stanie hurt «Eryk i Ja», jaki zasnavaŭ paet i śpiavak Uładź Lankievič (TonqiXod) razam z multyinstrumientalistam Erykam Arłovym-Šymkusam (ili-ili, Harotnica mix, raniej Vuraj, Palina Respublika). Kvitki ŭ papiarednim prodažy pa 10—15 rub. možna nabyć na Beskassira.by.
Kamientary