Rasijski palityk i hramadski dziejač Siarhiej Baburyn u apošnija dni maja zavitaŭ u Minsk, kab pryniać udzieł u III Miždziaržaŭnym forumie «Terytoryja sajuznaj dziaržavy jak adzinaja histaryčnaja, adukacyjnaja i infarmacyjnaja prastora». Prachodziła heta ŭsio ŭ «Domie Maskvy» ŭ Minsku.
Baburyn byŭ z tych, chto nie pryniaŭ razvału SSSR. Udzielničaŭ u putčy, a taksama ŭ samych roznych kamitetach pa vyratavańni Sajuza. Dvojčy Baburyna abirali ŭ rasijskuju Dumu. Jon navat paŭdzielničaŭ u prezidenckich vybarach — 2018, dzie zaniaŭ apošniaje miesca z 0,65%. Ciapier sam siabie jon nazyvaje «prezidentam Mižnarodnaj słavianskaj akademii navuk». Jasna, što abjadnańnie hetaje butaforskaje.
Čym jašče admietny Baburyn? Jon byŭ siarod arhanizataraŭ nacyjanalistyčnaha «Ruskaha marša». U 2014 padtrymaŭ dałučeńnie Kryma da Rasii. Atrymaŭ miedal «Za vyzvaleńnie Kryma i Sievastopala». Aktyŭna padtrymlivaŭ «niezaležnaść» Abchazii, Paŭdniovaj Asiecii i Prydniastroŭja.
Ciapier Baburyn aktyŭna pracuje na biełaruskim kirunku. Letaś jon zasnavaŭ rasiejska-biełaruski ruch «Hramadzianskaja inicyjatyva «Sajuz». Jaho padtrymała častka pravasłaŭnaha duchavienstva, a taksama čarnosocieniec Leŭ Kryštapovič i były nieapahanski vołchv Siarhiej Łušč.
Čytajcie: Arhanizatar «Ruskich maršaŭ» stvaryŭ u Biełarusi palityčny ruch: jaho padtrymali pravasłaŭnaja carkva i «Rumoł»
Admietna, što Baburyn mieŭ u Biełarusi sustrečy na samym vysokim uzroŭni. Jaho prymali ŭ siabie kiraŭnica Administracyi prezidenta Natalla Kačanava, a taksama kiraŭnik spravami prezidenta Viktar Šejman. Pra heta sam Baburyn paviedamiŭ u sacyjalnych sietkach.
«Viktar Uładzimiravič Šejman u roznyja časy prezidentam Biełarusi staviŭsia na roznyja dziaržaŭnyja pasady, ale zaŭsiody zastavaŭsia i zastajecca jaho samym davieranaj asobaj i nadziejnym paplečnikam. Razmaŭlali ab roznych bakach rasijska-biełaruskich adnosinaŭ, ale asabliva cikavaja razmova pajšła paśla taho, jak ja pradstaviŭ surazmoŭcu svajho spadarožnika, vidnaha rasiejskaha biznesmiena A.V.Hajdamaka. Havorka pajšła ab surjoznaj ekanomicy. Pakolki mnie samomu treba było paśpiašacca na sustreču z kiraŭnikom Administracyi prezidenta, to ja ŭdvuch i pakinuŭ.
Kali z V. U. Šejmanam tavaryskija adnosiny nas źviazvajuć bolš za dva dziesiacihodździ, to z kiraŭnikom Administracyi prezidenta RB N.I.Kačanavaj ja tolki znajomiŭsia. Bo ciapier mienavita jana — «načalnik hienieralnaha štaba» biełaruskaha lidara. Razmova z Natallaj Ivanaŭnaj była siabroŭskaj, hruntoŭnaj, doŭhaj. Pieradaŭ joj šerah dakumientaŭ na imia kiraŭnika dziaržavy, časopisy «Słavianie». Raskazaŭ ab hramadzianskaj inicyjatyvie «Sajuz», — napisaŭ Baburyn.
Kamientary