«Nie razumieju, jak jaho mahli vypisać z tempieraturaj…» U Viciebsku pamior 70-hadovy vajskovy piensijanier z karanavirusam
Nočču 2 krasavika ŭ Viciebskim abłasnym kliničnym śpiecyjalizavanym centry pamior vajskovy piensijanier Uładzimir Sidaraŭ, jamu było 70 hadoŭ, paviedamiŭ Tut.by syn niabožčyka Andrej.
3 sakavika mužčyna pastupiŭ u adździaleńnie chirurhii z dyjahnazam «tramboz padkalennaha sasuda», praź piać dzion jaho vypisali dadomu z tempieraturaj 38. Skazali, što hryp treba lačyć doma. Ale stan mužčyny paharšaŭsia, praz dva dni jamu zrabili renthien u paliklinicy — i adtul z dvuchbakovaj pnieŭmanijaj zabrali ŭ tuju ž balnicu. Piać dzion pacyjent byŭ u reanimacyi na štučnaj vientylacyi lohkich, ale vyratavać jaho nie ŭdałosia. U mužčyny byŭ stanoŭčy test na karanavirus. COVID-19 paćvierdziŭsia i ŭ jaho žonki, zaraz jana ŭ infiekcyjnaj balnicy ź pnieŭmanijaj.
Andrej Sidaraŭ raspaviadaje, što baćka da taho, jak trapić u chirurhičnaje adździaleńnie, amal dva tydni nie vychodziŭ z chaty: kalena tak baleła, što jon ledź moh chadzić.
— U špitali jamu pastavili dyjahnaz «tramboz padkalennaha sasuda». Piać dzion prakapali, pralačyli — i 19 sakavika vypisali, — kaža Andrej. — Niahledziačy na toje što ŭ jaho była vysokaja tempieratura — 38. Skazali, što heta hryp, što jon pavinien źviarnucca ŭ palikliniku pa miescy žycharstva.
Rodnyja ŭspaminajuć, što doma mužčynu stanaviłasia ŭsio horš: tempieratura padymałasia, źjaviŭsia kašal. Žonka piensijaniera ŭspaminaje, što spačatku vyklikali lekara na dom.
— Lekar pasłuchała jaho, skazała, što lohkija čystyja, chrypaŭ niama — i pryznačyła druhi antybijotyk, — kaža Taćciana Barysaŭna. — Ale tempieratura była ŭžo 39, nie źbivałasia, muž pačaŭ zadychacca. Vyklikali jašče raz lekara: skazała, što ŭ jaho chrypy, chutčej za ŭsio, zapaleńnie lohkich. U paliklinicy zrabili renthien — dvuchbakovaja pnieŭmanija. I zabrali na chutkaj ŭ tuju ž balnicu, dzie jon lažaŭ, ale ŭ kardyjałahičnaje adździaleńnie.
Žonka kaža, što, pakolki stan muža paharšaŭsia, jaho źmiaścili ŭ reanimacyju, piać dzion jon byŭ na štučnaj vientylacyi lohkich, nočču 2 krasavika mužčyna pamior.
— Test na karanavirus u muža byŭ stanoŭčy, — kaža Taćciana Barysaŭna. — Ale my nie adrazu pra heta daviedalisia. Kali jaho zabrała chutkaja, da mianie dadomu pryjšła dačka ź siamjoj, padtrymać. Hadziny paŭtary jany prabyli. Potym karanavirus paćvierdziŭsia i ŭ mianie, lažu ŭ infiekcyjnaj balnicy z zapaleńniem lohkich. Dačka, jaje muž i dzieci taksama pad nahladam lekaraŭ. U dački i ŭnučki test na karanavirus admoŭny, ziać i ŭnuk čakajuć vyniku. Sa mnoj u pałacie lažyć žančyna, muž jakoj taksama byŭ spačatku ŭ balnicy, potym jaho vypisali dadomu, a adtul užo zabrali z karanavirusam — jon u reanimacyi na ŠVŁ. Jak moh zarazicca moj muž? U nas viersija adna — u balnicy.
— Ja ŭ infiekcyjnaj balnicy, — raspaviadaje Tut.by Iryna, dačka pamierłaha Uładzimira Sidarava. — U mianie admoŭny test na karanavirus, ale renthien pakazaŭ pnieŭmaniju, u dački — branchit. Muž i syn pakul nie viedajuć svoj vynik. Choć ja ŭ adnoj lakarni z mamaj, sustrakacca my nie možam, vychad z pałaty zabaronieny.
Pakolki ŭsia siamja ŭ Viciebsku ŭ balnicy, raźvitacca z pamierłym dziedam, baćkam i mužam jany nie zmohuć.
Arhanizacyjaj pachavańnia zajmajecca syn Andrej, jaki pryjechaŭ ź Minska.
— U nas viersija adna: baćka zaraziŭsia ŭ balnicy, — kaža mužčyna. — Za miažoj jon nie byŭ, haściej zamiežnych u baćkoŭ taksama nie było. Jon amal nie moh chadzić i nie vychodziŭ, pakul nie trapiŭ u chirurhiju.
Andrej zadavaŭ hetaje pytańnie ŭ balnicy. Tam jamu patłumačyli, što na 19 sakavika situacyja i ŭ Viciebsku, i ŭ cełym pa Biełarusi była spakojnaja, nichto nie zapadozryŭ u pacyjenta, jaki nie vyjazdžaŭ za miažu i nie kantaktavaŭ ź ludźmi z-za miažy, karanavirus. Simptomy pryniali za hryp, i, kab pacyjent nie zaraziŭ inšych chvorych, z chirurhii jaho adpravili lačycca dadomu. Tym bolš u Viciebskim abłasnym kliničnym śpiecyjalizavanym centry niama infiekcyjnaha adździaleńnia, a mienavita ŭ takija dastaŭlali pieršych pacyjentaŭ z karanavirusam. Litaralna praz tydzień hetuju balnicu pieraaryjentavali na pryjom chvorych z padazreńniem i z paćvierdžanym karanavirusam, mienavita tamu Uładzimir Sidaraŭ apynuŭsia ŭ kardyjałahičnym adździaleńni.
— U balnicy kažuć, što, naadvarot, ličać, što krynicaj zaražeńnia staŭ moj baćka, — tłumačyć Andrej Sidaraŭ. — Ale ciapier heta ŭsio na ŭzroŭni zdahadak. Užo nichto dakładna nie moža vyśvietlić, z kaho ŭsio heta pačałosia.
U paśviedčańni ab śmierci Uładzimira Sidarava — fota jość u redakcyi — paznačana: vostraja reśpiratornaja niedastatkovaść, virusnaja pnieŭmanija (COVID-19), asnoŭnaja pryčyna śmierci — karanavirus.
Kamientary