Karanik na sustrečy z aktyvistami z HrDU u Hrodnie: «A chto pieršy pačaŭ? Tydzień chadzili z BČB niezakonna»
Na chutkich padčas pratestaŭ jeździŭ nie AMAP, a vajennyja miedyki. «Hvałt na vulicach chvaluje». Kanstruktyŭnaha dyjałohu pra falsifikacyi na vybarach nie vyjšła. 27 žniŭnia inicyjatyŭnaja hrupa studentaŭ i vypusknikoŭ sustrełasia z novym staršynioj abłvykankama Uładzimiram Karanikam u Hrodzienskim dziaržaŭnym univiersitecie im. Janki Kupały. Adzin z udzielnikaŭ sustrečy padrabiazna raspavioŭ Hrodna.life, pra što tam havaryli.
Uładzimir Karanik pryznaŭ, što ciapier infarmacyja ŭ dziaržaŭnych ŚMI i alternatyŭnych krynicach (sacsietkach, telehram-kanałach) drenna kareluje pamiž saboju: «My adčuvajem deficyt biesstaronnaści. Źjavilisia dźvie praŭdy, nie chapaje abjektyŭnaści. Heta ŭnosić raskoł u hramadstva. Pieraadolvać prablemy treba praz dyjałoh».
Paśla ŭstupnaj pramovy členy inicyjatyŭnaj hrupy spytali, ci čakać u budučyni cisku na aktyvistaŭ, ich zvalnieńniaŭ abo adličeńniaŭ za ich punkt hledžańnia i niazručnyja pytańni. Uładzimir Karanik daŭ słova, što hanieńniaŭ nie budzie: «Kali vy nie parušajecie dziejučaje zakanadaŭstva».
Zajavy pra hvałt abjadnoŭvajuć u adnu spravu
Padniaŭšy temu hvałtu siłavikoŭ i pieraśledaŭ pratestujučych, kupałaŭcy raspaviali, što paciarpieli i členy inicyjatyŭnaj hrupy. Uviečary 9 žniŭnia dacent univiersiteta pryjechaŭ u RAUS daviedacca pra stan zatrymanaha brata, ale jaho samoha zatrymali na ŭsiu noč. Ranicaj vykładčyku skazali «prabačcie» i adpuścili. U druhim vypadku 12 žniŭnia AMAP biez tłumačeńnia pryčyn źbiŭ dubinkami navukovaha supracoŭnika prosta ŭ centry horada, ale adpuściŭ.
«Toje, što pravy parušanyja, nienarmalna, ale treba razabracca ŭ kožnym kankretnym zdareńni: što stała pryčynaj i nahodaj, nakolki abhruntavana prymianieńnie siły», — adkazaŭ Uładzimir Karanik.
— Byli parušeńni z abodvuch bakoŭ. <…> Hvałt na vulicach mianie pałochaje i chvaluje. Elemient siłavoha zatrymańnia, kali čałavieka prosiać spynicca, a jon uciakaje, — u miežach dziejučaha zakanadaŭstva. Kali ž čałaviek upaŭ, bić nielha».
Taksama jon raspavioŭ, što zajavy ad paciarpiełych abjadnoŭvajucca ŭ adno spravavodstva, časam cełymi vulicami, na jakich pracavali adny i tyja ž ludzi, źbirajucca fakty dla rasśledavańniaŭ, kab zatym dać pravavuju acenku dziejańniam usich bakoŭ.
Udzielnikam praŭładnaha mitynhu vyniesuć papiaredžańnie
Na sustrečy kupałaŭcy źviarnuli ŭvahu na niekalki faktaŭ: 17 žniŭnia harvykankam pajšoŭ nasustrač pratestoŭcam i dazvoliŭ pravodzić schody na centralnych płoščach horada, ale abiacańniaŭ chapiła na 3 dni. Paźniej ułady adchilili prośbu va ŭzhadnieńni čarhovaha mitynhu, bo 20 žniŭnia rašeńniem Savieta deputataŭ płoščy Savieckaja i Lenina byli pryznanyja miescami, nie pryznačanymi dla masavych mierapryjemstvaŭ. Ale ŭžo 22-ha prychilniki dziejučaha prezidenta z łozunhami «Za baćku!» zaniali płošču Lenina. Mitynh naviedaŭ i sam Łukašenka.
«A chto pieršy pačaŭ? Tydzień chadzili z BČB niezakonna. Paśla hetaha vyjšli ludzi ź dziaržaŭnym ściaham. Nam nie było čaho skazać ludziam, čamu astatnim možna, a im nielha, — adkazaŭ Karanik. — Ułada pajšła na farmalnyja parušeńni, dazvalajučy (22-ha mitynh prychilnikaŭ dziejnaha prezidenta — zaŭv.), kab vykanać pryncyp spraviadlivaści. Ja hatovy nieści adkaznaść. My vyniesiem papiaredžańnie».
Uładzimir Karanik dadaŭ, što možna zabaranić usim vychodzić na płoščy: u Hrodnie jość alternatyŭnyja miescy dla masavych mierapryjemstvaŭ — Rumloŭski i Kałožski parki. Jon prapanavaŭ źbiracca tam na dyskusii pad usimi ściahami. «My hatovyja razhledzieć pytańnie i dać placoŭku pa zajaŭnym pryncypie», — zapeŭniŭ jon. Vydatki na pasłuhi milicyi, chutkaj dapamohi i ŽKH (kala 6 tys. rub.) u takim vypadku lahuć na dziaržbiudžet.
Taksama Karanik prapanavaŭ pravieści dyskusijny kłub u pramym efiry, dzie adabjecca ŭvieś pluralizm mierkavańniaŭ.
Chto jeździŭ u mašynach mieddapamohi padčas pratestaŭ
Były ministr achovy zdaroŭja rastłumačyŭ źjaŭleńnie na mitynhach tak zvanych trajanskich koniej — mašyn mieddapamohi, u jakich byli zaŭvažanyja ludzi ŭ formie (mnohija Telegram-kanały pačali abmiarkoŭvać, što transpart, mahčyma, vykarystoŭvali dla padvozu bajcoŭ da miesca razhonu pratestoŭcaŭ). Pa słovach Karanika, heta byli aŭtamabili miedycynskaj słužby, u jakich byli nie supracoŭniki AMAPa, a vajennyja miedyki. Jany pracavali ŭ «ahmieniach» padziej, kab vyklučyć trapleńnie rabotnikaŭ chutkaj «pad razdaču». Za ramki zakona heta nijakim čynam nie vychodzić.
«Pierachodźcie ŭ pravavoje pole»
Uładzimir Karanik parekamiendavaŭ usim prychilnikam inšych kandydataŭ u prezidenty i aktyvistam pierajści ŭ pravavoje pole: «Kali jość prahrama i kanstruktyŭnyja prapanovy, jakija dapamohuć palepšyć žyćcio ŭ našaj krainie, stvarajcie hramadskaje abjadnańnie ci palityčnuju partyju. Vyznačajcie pieramoŭnuju pazicyju i patrabavańni, pradjavicie lehitymnaha pradstaŭnika». Jon paabiacaŭ akazać nieabchodnaje sadziejničańnie ŭ rehistracyi struktur i nakiravać na kansultacyju da jurystaŭ abłvykankama.
Staršynia abłvykankama nie pryznaje strajk efiektyŭnym mietadam palityčnaj baraćby: jon pavinny vyrašać tolki pracoŭnyja sprečki. Kupałaŭcy nahadali, što pracoŭnyja kalektyvy, jakija strajkujuć, patrabujuć nieadkładnaj adstaŭki kiraŭnika dziaržavy, bo sumniavajucca ŭ jaho lehitymnaści. Jany nie daviarajuć uładam i tym, chto stvaryŭ umovy dla falsifikacyj ci nie rasśledavaŭ incydenty na vybarčych učastkach. Na žal, na temu falsifikacyj vyraznaj hutarki nie atrymałasia.
Inicyjatyŭnaja hrupa Kupałaŭskaha ŭniviersiteta maje namier stvaryć hramadskuju arhanizacyju, jakaja pačnie dziejničać u vnu. Jaje prahrama budzie ahučana ŭ najbližejšyja dni. Raniej inicyjatyŭnaja hrupa vnu sustrakałasia z rektaram univiersiteta i ahučyła svaje palityčnyja patrabavańni.
Kamientary