U Homieli 21 sakavika siłaviki zatrymali hrupu ludziej, jakija ŭ restaranie pravodzili śviata «Hukańnie viasny». Ich sudzili za parušeńnie paradku praviadzieńnia masavych mierapryjemstvaŭ. Hetym razam pad «narodny» artykuł trapiŭ major milicyi.
Jak piša «Fłahštok», siarod haściej restaracyi, jakija atrymlivali štrafy i aryšty za ŭdzieł u abradzie «Hukańnie viasny», byŭ i milicyjant, jaki ŭ im udzielničaŭ.
Heta major milicyi, učastkovy inśpiektar Homielskaha RAUS Viktar Šypkoŭ.
Raniej jon atrymlivaŭ dziaržaŭnyja ŭznaharody, u tym liku premiju «Za duchoŭnaje adradžeńnie» — jakraz za ŭkład u zachavańnie narodnych tradycyj.
A ciapier atrymaŭ pratakoł pavodle art. 24.23 KaAP («parušeńnie paradku praviadzieńnia masavych mierapryjemstvaŭ»).
Šypkoŭ šmat hadoŭ zajmajecca falkłoram i krajaznaŭstvam, udzielničaje ŭ mierapryjemstvach prychilnikaŭ tradycyjnaj biełaruskaj kultury, pra jaho nie raz zachoplena raskazvała dziaržaŭnaja presa — nie tolki jak pra prykładnaha ŭčastkovaha, ale i jak pra baćku šaściarych dziaciej.
Taksama ŭ 2025 hodzie viadomy harmanist-milicyjanier atrymlivaŭ uznaharodu ad kiraŭnika MUS Ivana Kubrakova — naručny hadzińnik ź simvolikaj ministerstva.
Nieaficyjny kanał kamiteta ideałahičnaj pracy nazvaŭ abrad u dvoryku «masavym mierapryjemstvam», zajaviŭšy, što jaho praviali «nie pa zakonie», biez uzhadnieńnia z uładami.
Pa dadzienych «Fłahštoka», jak minimum adzin udzielnik «Hukańnia viasny» atrymaŭ 15 sutak aryštu, piać čałaviek — maksimalnyja štrafy ŭ 100 bazavych, heta 4 500 rubloŭ (bolš za 1,5 tys. dalaraŭ). Jašče adzin čałaviek, jakoha paličyli arhanizataram, — štraf u 150 bazavych vieličyń, heta 6750 rub. (amal 2,3 tys. dołaraŭ).
Praviedzienaje raniej šumnaje šeście rasiejcaŭ pa centry Homiela, ź vidavočnym parušeńniem hramadskaha paradku, nie vyklikała zaniepakojenaści ideołahaŭ. Fanaty prajšli pa vulicach z dymavymi šaškami i «kryčałkami», pakinuli hrafici na fasadzie doma. Ale ŭ abłvykankamie niesankcyjanavanaje šeście nazvali tolki «prachodkaj spartyŭnych fanataŭ z brackaj Rasii».
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3434
Kamientary