Studenta asudzili na 2,5 hady kałonii za toje, što adbivaŭ pratestoŭca ad zatrymańnia 10 žniŭnia

Sud Leninskaha rajona 30 śniežnia asudziŭ pa artykule 364 Kryminalnaha kodeksa za hvałt u dačynieńni da supracoŭnika AMAPu 10 žniŭnia 20-hadovaha studenta 4 kursa Instytuta pradprymalnickaj dziejnaści Viktara Akcistava. U toj viečar student chacieŭ adbić ad zatrymańnia nieznajomaha chłopca kala haścinicy «Jubilejnaja» — u vyniku hetaha jon nanios supracoŭniku AMAPu niekalki ŭdaraŭ. Paciarpiełym pa spravie byŭ pryznany supracoŭnik minskaha AMAPu, čyje ankietnyja dadzienyja byli źmienienyja ŭ sudzie «ŭ metach biaśpieki». Ad dziejańniaŭ studenta amapaviec atrymaŭ tolki lohkija ranki i drapiny na łbie, ale maralnyja pakuty acaniŭ u 2000 rubloŭ, rodnyja studenta pakryli škodu padčas sudovaha pierapynku. Sudździa Maryna Zapaśnik pryznała chłopca vinavatym i pryznačyła jamu pakarańnie ŭ vyhladzie 2,5 hady kałonii va ŭmovach ahulnaha režymu. Mienavita takoje pakarańnie zaprošvaŭ staršy pamočnik prakurora rajona A. Ramanovič, paviedamlajuć pravaabaroncy.

Pavialičyć

Student znachodzicca pad vartaj z 21 vieraśnia. Kamandzir minskaha AMAPu Dźmitryj Bałaba nakiravaŭ u sud piśmovaje chadajnictva ab tym, kab u dačynieńni da paciarpiełaha Cimafiejeva i śviedki Bujnickaha byli pryniatyja miery biaśpieki, jakija zabiaśpiečvajuć ich niepaznavalnaść. Sudździa zadavoliła zajaŭlenaje chadajnictva. Paciarpieły, šyrakaplečy i dva mietry rostam, źjaviŭsia ŭ zale ŭ samy apošni momant u kiepcy z vyjavaj dziaržaŭnaha ściaha i bałakłavie.

Zhodna abvinavačvańniu Viktar Akcistaŭ «uviečary 10 žniŭnia kala haścinicy «Jubilejnaja» ŭ pieryjad z 18 da 20 hadzin nanios try ŭdary kułakom u vobłaść hałavy i adzin udar nahoj u pachvinnuju vobłaść paciarpiełamu Cimafiejevu ŭ metach pieraškodzić zakonnaj dziejnaści supracoŭnika AMAPu i z pomsty za vykanańniem im zadač pa achovie hramadskaha paradku».

Abvinavačany ŭ sudovym pasiadžeńni rastłumačyŭ, što ŭ toj viečar jon pryjechaŭ na stancyju mietro «Niamiha», adkul nakiravaŭsia ŭ bok Steły, kab uziać udzieł u akcyi pratestu suprać falsifikacyi vynikaŭ vybaraŭ prezidenta. Kala haścinicy abvinavačany pačuŭ kryk čałavieka, jakoha zatrymlivali dvoje supracoŭnikaŭ AMAPu. Student rastłumačyŭ, što byŭ u kursie taho, što adbyłosia ŭ noč z 9 na 10 žniŭnia, i, bajučysia za dalejšy los zatrymanaha, nanios adzin udar Cimafiejevu pa hałavie, pasprabavaŭ schapić i spynić supracoŭnika milicyi, paśla čaho nanios jašče dva ŭdary pa hałavie. Na ŭdakładniajučaje pytańnie prakurora ab tym, ci biŭ jon u pachvinnuju vobłaść supracoŭnika AMAPu, Akcistaŭ skazaŭ, što rabiŭ zamach nahoj u vobłaść žyvata paciarpiełaha i bić u pach nie źbiraŭsia.

Cimafiejeŭ na ŭdary vykazaŭ ździŭleńnie, paśla čaho schapiŭ za zapiaście levaj ruki abvinavačanaha. Za druhuju ruku abvinavačanaha schapiŭ inšy supracoŭnik. Viktar rastłumačyŭ, što paśla zatrymańnia jaho adviali ŭ mašynu, dzie pakłali na žyvot i źviazali ruki za śpinaj płastmasavymi ściažkami. Zatym abvinavačanaha z druhim zatrymanym pavieźli i pieradali inšym supracoŭnikam, jakija apytali jaho ŭ stanoviščy ležačy tvaram u ziamlu. Paśla apytańnia Akcistava advieźli ŭ Partyzanskaje RUUS, dzie trymali na praciahu 16 hadzin. Da nočy z 12 na 13 žniŭnia zatrymany ŭtrymlivaŭsia ŭ SIZA Žodzina, adkul byŭ adpuščany razam z astatnimi zatrymanymi.

Abvinavačanaha nie pryciahvali da adkaznaści i nie składali pratakoł ab administracyjnym pravaparušeńni. Paśla taho, kali abvinavačany rastłumačyŭ, što jaho dziejańni byli vyklikanyja aściarohami za dalejšy los zatrymanaha, prakuror Ramanovič staŭ nastojliva patrabavać adkazu na pytańnie ab tym, što kankretna pahražała zatrymanamu ŭ momant zatrymańnia. Akcistaŭ rastłumačyŭ, što zatrymańnie było, na jaho dumku, nieabhruntavanym, jon raskajvajecca ŭ zroblenym i prynios prabačeńni Cimafiejevu.

Sud doŭžysia adzin dzień, na druhi byŭ vyniesieny prysud. Sudździa Maryna Zapaśnik pryznačyła Viktaru Akcistavu takoje ž pakarańnie, jakoje i prasiŭ prakuror — 2,5 hady pazbaŭleńnia voli va ŭmovach ahulnaha režymu. Akramia hetaha, była vyniesienaja pryvatnaja pastanova pa miescy vučoby abvinavačanaha.

• 0
• 0
• 0
• 0
• 0
• 0
• 0
• 0