Napadnik źbiŭ dźviuch žančyn, adna ź ich špitalizavanaja z traŭmami hałavy.
10 červienia ŭ Baranavičach na adno z adździaleńniaŭ «Biełarusbanku» byŭ ździejśnieny ŭzbrojeny napad, paviedamlaje «Intex-press».
Pa skančeńni pierapynku na abied u filijał banku na vuł. Parkavaj uvarvaŭsia ŭzbrojeny pistaletam i nažom mužčyna. Pahražajučy zbrojaj, jon zapatrabavaŭ hrošaj. A paśla pačaŭ źbivać žančyn — supracoŭnicu banku i naviednicu ŭstanovy.
Adna ź ich, 38-hadovaja supracoŭnica filijału, ad ŭdaru napadnika pavaliłasia na bankamat i mocna ŭdaryłasia ab jaho hałavoj. Nieviadomy streliŭ u stolu, abyšoŭ pamiaškańnie, i, nie znajšoŭšy hrošaj, źbieh.
Paciarpiełyja atrymali lohkija čerapna-mazhavyja traŭmy, supracoŭnica banku jašče strasieńnie mazhoŭ. Žančyna znachodzicca ŭ niejrachirurhičnym adździaleńni haradskoj balnicy.
***
Varta adznačyć, što ŭzbrojenyja napady na banki i kasiraŭ ŭ hetym hodzie rezka pačaścilisia.
Tolki za pieršyja paŭhoda zdaryłasia niekalki hučnych spraŭ, źviazanych z rabavańniem bankaŭ.
Badaj samym hučnym vypadkam staŭ napad na mašynu z hrašyma dla rabotnikaŭ adnaho ź sielhaspradpryjemstvaŭ Salihorskaha rajonu 27 lutaha.
Złačyncy arhanizavali zasadu na ŭskrajku Salihorska. Dziela 73 miljonaŭ rubloŭ jany zabili buchhałtarku SVK i kiroŭcu. U apošniaha zastalisia dvoje, a ŭ žančyny-buchhałtarki — troje dziaciej.
20 lutaha ŭviečary nieviadomy złačynca, vydaŭšy siabie za inkasatara, trapiŭ u pamiaškańnie punktu abmienu valutaŭ u minskim hipiermarkiecie «Prastor». Tam jon užyŭ suprać kasirki elektrašokier dy zavałodaŭ valutaj na sumu bolš 80 tys. dalaraŭ.
Uviečary 30 sakavika ŭ filijale staličnaha banka, što na vulicy Pramoj (rajon Hrušaŭki), pahražajučy kasiru pistaletam, nieviadomy złačynca zavałodaŭ 1915 dalarami, 850 jeŭra, 2200 rasijskimi rublami i 2 młn 300 tys. biełaruskimi rublami.
29 krasavika ŭ dobrušski bank uvarvaŭsia mužčyna z paviazkaj na tvary. Jon pieraskočyŭ praz stojku, zabraŭ 52 tysiačy rasiejskich rubloŭ i bolš za 1,5 tysiačy dalaraŭ ZŠA, i ŭciok. Ale niedaloka - znajści rabaŭnika dapamahli kamiery videanazirańnia.
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja97
Kamientary