Čyrvonaj nitkaj praz uvieś film išoŭ mesedž na adras siłavikoŭ.
«Usie žartujuć pra ŭčarašniaje śpiecrasśledavańnie ANT, typu apraŭdvajuć šmatmiesiačnaj śpiecapieracyjaj svaje pravały sa źlitymi prasłuchoŭkami i masandraj, — piša ŭ svaim telehram-kanale analityk Arciom Šrajbman. — Mnie zdałosia, što heta hłyboka druhasny momant. Aŭdytoryja hosTB usio roŭna nie mocna pieražyvała pra źlivy, a prychilniki pratestu čakana nie pavieryli ŭ hetyja šmatchadoŭki zadniaj dataj».
Na dumku analityka, «hałoŭnym u hetym «rasśledavańni» było toje, što jano samo było 60-chvilinnaj psichałahičnaj apieracyjaj kontrraźviedki.
Čyrvonaj nitkaj praz uvieś film išoŭ mesedž na adras siłavikoŭ — kali zdradzicie nam, vas kinie hety polski pacan, a ŭ nas vy, jak hety kapitan z hienštaba, budziecie płakać pad kamieru i čakać svaich 20 hadoŭ za zdradu dziaržavie».
«Kali kiraŭnictva siłavoha błoka vymušana iści i zajmać hadzinu prajm-tajma na ANT, kab papracavać z łajalnaściu supracoŭnikaŭ, nie ŭsio tak hładka ŭ Dackim karaleŭstvie, a ŭnutranyja stymuły — jak puhi, tak i pierniki — drenna pracujuć. Davodzicca pałochać publična», — miarkuje Šrajbman.
Analityk taksama adznačaje, što «ŭ efir puścili revielacyi apazicyjnaha eks-śpiecnazaŭca Makara pra jaho suviazi z FSB. Nie biarusia sudzić, što heta było: ci pantavaŭsia Makar, kab atrymać ad surazmoŭcy niejkija źlivy, ci heta praŭda (i tady heta toŭsty čyrvony ściah dla ŭsioj dyjaspary, jakaja ź im jašče maje znosiny). Ale cikava, što Minsk vyrašyŭ źlić heta ŭ publičnaje pole. Heta da pytańnia ab usiepahodnym braterstvie i daviery ŭ Sajuznaj dziaržavie», — iranizuje analityk.
Nahadajem, što ŭčora na telekanale ANT vyjšaŭ film «Mankurty». Ź jaho vynikaje, što aŭdyja skandalnych razmoŭ, jakija pralivali śviatło na abstaviny hibieli Ramana Bandarenki, pieradaŭ dla publikacyi ŭ internecie padpałkoŭnik KDB Alaksiej Chrałovič.
Kali apuścić mastackija pryjomy i detali, sapraŭdnaść jakich sumnieŭnaja, to moža skłaścisia ŭjaŭleńnie, jak u realnaści razhortvalisia padziei paśla śmierci Ramana Bandarenki i apublikavanych u suviazi z hetym razmovaŭ vysokapastaŭlenych asob.
Imavierna, padpałkoŭnik Alaksiej Chrałovič vyhruziŭ pieramovy ŭsim viadomych asob z vykarystańniem słužbovych mahčymaściaŭ. Hetyja zapisy jon pieradaŭ Ściapanu Puciłu, toj ich apublikavaŭ u telehram-kanale.
Chrałovič, imavierna, mierkavaŭ, što vyličyć krynicu źlivu niemahčyma. Ale Chrałoviča vyličyli.
Vyhladaje, što dalej situacyja raźvivałasia tak: Chrałoviču prapanavali paŭdzielničać u apieratyŭnaj hulni, kab vyjavić šlachi evakucyi ź Biełarusi asob, źviazanych z rucham za hramadzianskija pravy i svabodnyja vybary, jakim pahražaje niebiaśpieka.
Śćviardžajecca, što Chrałovič iznoŭ vyjšaŭ na suviaź z Puciłam i prapanavaŭ tamu niejkuju novuju «sakretnuju» infarmacyju, ale ŭ abmien na biaśpiečny vyvaz z krainy.
Puciła, śćviardžajecca, spačatku prasiŭ za heta hrošy, a potym «pieradaŭ» pytańnie Chrałoviča Iharu Makaru, jaki i arhanizavaŭ aficeru KDB vyvaz, pry hetym vykanaŭcy vyvazu byli zatrymanyja.
Siarod tavaryšaŭ Makara, jakija mieli arhanizavać vyjezd, zhadvajecca Viačasłaŭ Sidarakin, vieteran «Ałmaza», jaki raptoŭna znajšoŭsia ŭ SIZA KDB.
Što da telefonnych razmoŭ pres-sakratarki Łukašenki Natalli Ejsmant z roznymi słužbovymi asobami, to ŭ filmie śćviardžajecca, što jany byli śledčym ekśpierymientam, insceniroŭkaj — u pryvatnaści, z pamočnikam Łukašenki Mikałajem Łatyšonkam, a taksama ź Dźmitryjem Baskavym. A što z razmovaj Baskava ź Dźmitryjem Šakutam? Adkazu ŭ filmie niama.
Dastatkovych dokazaŭ dla viersii insceniroŭki nie pryvodzicca. Ale samaje hałoŭnaje — našto treba była insceniroŭka mienavita hetych razmoŭ?
Ściapan Puciła i Ihar Makar pakul nijak nie prakamientavali film i nie raskazali svajoj viersii padziej.
Niama i infarmacyi ad advakata i siamji zatrymanaha. U filmie havorycca, što Chrałoviča abvinavačvajuć u dziaržaŭnaj zdradzie. Ale, pakolki nieviadoma, kamu mienavita i što jon pieradaŭ, to niemahčyma skazać, ci hetaje abvinavačvańnie dojdzie da suda. Kali havorka tolki pra telefonnyja razmovy, datyčnyja hibieli Ramana Bandarenki, jakija pralivajuć śviatło na abstaviny złačynstva, to naŭrad ci heta moža kvalifikavacca jak «zdrada radzimie».
Adnačasova było paviedamlena, što aryštavany aficer Hienštaba Dzianis Urad, jaki pieradaŭ dla publikacyi ŭ internecie płany siłavikoŭ na Dzień Voli.
Jak paviedamiŭ telekanał ANT, kapitan Urad 14 sakavika na dziažurstvie na pastu śpiecsuviazi Hienštaba sfatahrafavaŭ sakretnaje piśmo ad ministra ŭnutranych spraŭ ministru abarony — možna mierkavać, što heta dakumient ab achovie siłavych budynkaŭ na 25 Sakavika.
Telekanał paviedamlaje, što kopiju dakumienta aficer «adpraviŭ polskamu telehram-kanału».
Tak dziaržaŭnyja ŚMI nazyvajuć telehram-kanał, jaki ŭ Biełarusi pryznany ekstremisckim.
Telekanał nie paviedamiŭ, jakim čynam biełaruskija śpiecsłužby vyjavili krynicu hetaj infarmacyi. Mahčyma, dadzieny telehram-kanał apublikavaŭ dakumient całkam, a dostup da jaho mieła abmiežavanaje koła ludziej, što palehčyła vyjaŭleńnie aŭtara.
Raniej za miažu vyjechaŭ vysokapastaŭleny aficer HUBAZiK Stanisłaŭ Łupanosaŭ, jaki pieradaŭ «BajPołu» vialiki masiŭ infarmacyi, u tym liku aŭdyjazapisy. Łupanosaŭ paviedamiŭ, što ŭ centralnym aparacie MUS kala 400 čałaviek pastavili podpisy za Viktara Babaryku.
Pavodle infarmacyi ANT, suprać kapitana Urada zaviedzienaja kryminalnaja sprava pa artykule ab zdradzie radzimie, jamu pahražaje da 20 hadoŭ pazbaŭleńnia voli, jon znachodzicca ŭ SIZA KDB.
Kamientary