Łukašenka, Jarmošyna, Karpiankoŭ i milicyjaniery… Za abrazu i «raspalvańnie varožaści» maładziečancu dali 4 hady kałonii
U Minskim abłasnym sudzie 11 červienia zaviaršyŭsia sudovy praces pa kryminalnaj spravie ŭ dačynieńni da žychara horada Maładziečna Dzianisa Syrca. Sudzili jaho za kamientary ŭ miascovym telehram-čacie «Mołodiečno dla žiźni Chat», paviedamlajuć pravaabaroncy.
Dzianisa pryznali vinavatym u raspalvańni nianaviści da milicyi, u abrazie słužbovych asob i prezidenta, i prysudzili da 4 hadoŭ kałonii va ŭmovach ahulnaha režymu. Taksama jon pavinien vypłacić paciarpiełym maralnyja kampiensacyi. Prysud Dzianisu vynies sudździa Tulejka, a dziaržabvinavaŭcam, jaki paprasiŭ mienavita taki termin, vystupiŭ Šaravar.
Paciarpiełymi pryznanyja maładziečanskija milicyjanty i haradzienskaja supracoŭnica AMAP, a taksama i publičnyja piersony — Łukašenka, Jarmošyna i Karpiankoŭ. Nie ŭsie z paciarpiełych pryjšli paŭdzielničać u pracesie.
Praces prachodziŭ 9 i 10 červienia, a 11 vynieśli prysud.
U Dzianisa Syrca jość dźvie dački — 15 hadoŭ i 4 hady. Jak raspaviała žonka Dzianisa, małodšaja dačka dumaje, što tata ŭ kamandziroŭcy.
11 červienia sudździa Minskaha abłasnoha suda Tulejka pryznaŭ Dzianisa Syrca vinavatym pa ŭsich troch artykułach i prysudziŭ jaho da pazbaŭleńnia voli terminam na čatyry hady kałonii va ŭmovach ahulnaha režymu. A taksama na karyść kožnaha paciarpiełaha, jaki zajaviŭ pazoŭ ab maralnych pakutach, spahnać ź Dzianisa Syrca pa 1000 rubloŭ.
Kamientary