U «Minsk-Śviecie» varony źvili hniazdo prosta na viežavym kranie i ciapier patrabujuć ad kranaŭščyka «chabar»
Niadaŭna ŭ kranaŭščyka Eduarda, jaki pracuje na budoŭli ŭ «Minsk-Śviecie», źjavilisia niečakanyja susiedzi pa viežavym kranie. Para varon ablubavała ŭčastak viežy i pačała budavać tam hniazdo. Ciapier Eduard naziraje za raźvićciom padziej i kožny raz biare z saboj na pracu «chabar» dla ptušak, piša «Smartpres».
«Spačatku sprabavaŭ skidać hniazdo»
Heta historyja pačałasia krychu mienš za dva tydni tamu, kali ptuški zrabili pieršuju sprobu pabudavać hniazdo na kranie.
«Spačatku jany ablubavali karetku, ale jana ž nie statyčnaja: jeździć tudy-siudy, — uspaminaje kranaŭščyk. — I jany pieramiaścilisia na viežu dy vybrali ŭ jakaści budplacoŭki ŭčastak na vyšyni prykładna 20 mietraŭ ad ziamli. Ja spačatku skidaŭ usie hetyja halinki i inšyja materyjały, jakija pryciahvali ptuški, niekalki razoŭ prybiraŭ niedabudavanaje hniazdo, ale jany pačynali jaho rabić nanoŭ.
U vyniku Eduard źmiryŭsia i navat dapamoh novym susiedziam u budaŭnictvie — pakłaŭ u hniazdo kolca z drotu.
Ad kanfliktu da dobrasusiedstva
Praŭda, udziačnaści ad ptušak nie dačakaŭsia. Naadvarot, kali hniazdo było hatovaje i ŭ im pačali źjaŭlacca jajki, paračka stała ahresiŭnaj: atakavała budaŭnika, jakomu, kab trapić na svajo pracoŭnaje miesca na vyšyni 70 mietraŭ i viarnucca na ziamlu, davodzicca padymacca i spuskacca praz varonina žyllo.
«Ja ŭžo sutykaŭsia z padobnaj situacyjaj, kali pracavaŭ na budoŭli ŭ Sankt-Pieciarburhu, tamu viedaŭ, jak ich załahodzić, — kaža Eduard. — Staŭ brać z saboj na pracu pačastunak dla ptušak: kuplaju piačonku, prynošu suchi korm, jakim karmlu svaich chatnich hadavancaŭ. Pakidaju ŭsio heta kala hniazda i ruchajusia dalej».
Atrymlivajučy rehularnyja dary ad čałavieka, varony skiemili, što jon nie źbirajecca škodzić im i ich patomstvu. Ciapier jany nie napadajuć na kranaŭščyka. Prosta adlatajuć ad hniazda, kali jon źjaŭlajecca, a zatym viartajucca i łasujucca «chabaram».
«Kali zatrymlivajusia na pracy, pačynajuć šumieć, namiakajuć, što mnie ŭžo para, — dzielicca niuansami susiedstva budaŭnik. — Zaraz u hniaździe ŭžo piać jajek, kožny dzień źjaŭlajecca pa adnym novym. Budu nazirać, čym skončycca hetaja siamiejnaja historyja».
Arnitołah: «Taki vybar miesca nietypovy»
Jak raskazaŭ smartpress.by arnitołah Alaksandr Vinčeŭski, dla biełaruskich varon taki vybar miesca dla hniazda nietypovy.
«Historyja nietryvijalnaja, ja pra takija ŭ nas nie čuŭ, — padkreślivaje ekśpiert. — Čytaŭ pra padobnyja vypadki ŭ Maskvie. Naohuł nie pryhadaju, kab našy varony budavali hniazdo na štučnaj apory, jany prymianiajuć u budaŭnictvie niezvyčajnyja materyjały, naprykład, drot, ale apora — heta zaŭsiody drevy. Štučnyja zbudavańni čaściej vykarystoŭvajuć krumkačy: budujuć hniozdy na linijach elektrapieradač, hramaadvodach… Choć heta i bolš «dzikija» ptuški, čym varony».
Što ž tyčycca adlehłaści ad ziamli, pavodle słoŭ surazmoŭcy, to hniazdo varon i ŭ pryrodzie moža być na vyšyni 20 mietraŭ, kali dreva dazvalaje, ale zvyčajna žylli znachodziacca nižej, niedzie ad 5 mietraŭ.
Čamu ptuški vybrali takoje dziŭnaje miesca dla hniazda, skazać składana. Arnitołah kaža, što jany daśledujuć terytoryju, pierš čym prystupić da budaŭnictva. I, viadoma, uličvajuć usie faktary, u tym liku i toje, što mima ich budučaha doma rehularna chodzić čałaviek.
«Mašynist pracuje na vyšyni 70 mietraŭ, jon niečasta łazić tudy-siudy, napeŭna, i na abied nie zaŭsiody spuskajecca, bo ssabojku možna ŭziać z saboj navierch, — miarkuje Alaksandr Vinčeŭski. — A dva razy na dzień turbota dla ptušak nie takaja ŭžo istotnaja, jak bačym. Tym bolš što jany pryvykli da kankretnaha čałavieka i bačać, što jon nie niebiaśpiečny».
Arnitołah nahadaŭ: hniozdy z kładkami i ptušaniatami ŭ Biełarusi zabaroniena prybirać na zakanadaŭčym uzroŭni. U pracesie budaŭnictva rabić heta možna, ale, jak bačym, u vypadku Eduarda sproby adpudzić ptušak nie mieli pośpiechu: ptuški akazalisia bolš nastojlivymi za čałavieka.
Alaksandr Vinčeŭski dadaje: kali ŭ siamji ŭsio składziecca ščaśliva, to dzieci hetych vynachodlivych baćkoŭ z bolšaj vierahodnaściu stanuć vybirać dla svaich hniozdaŭ viežavyja krany, čym drevy.
U Žodzinie raźviałosia šmat varon, žychary bjuć tryvohu. Ci sapraŭdy varta niepakoicca?
Minčanka vyratavała lebiedzia, jakoha dziaŭbli varony na Kamsamolskim voziery
Hałuby i varony zachapili centr Bresta
«U Biełarusi navat ptuški śpiešvajucca». Tyktok skaryła VIDEA vielmi vietlivaj varony
Varony pamiatajuć kryŭdu 17 hadoŭ
Kamientary