Preśnienski sud Maskvy prysudziŭ prankiera Karamatuła Džabarava da dvuch hadoŭ i čatyroch miesiacaŭ kałonii ahulnaha režymu za toje, što toj razyhraŭ u minułym hodzie «prystup karanavirusa» ŭ maskoŭskim mietro. Dziaržabvinavaŭca prasiŭ čatyry hady pazbaŭleńnia voli, piša Bi-bi-si.
«Džabaraŭ całkam pryznaŭ vinu i z ulikam času, praviedzienaha ŭ SIZA, budzie adpuščany na volu praz try tydni. Heta adbudziecca, kali prakuratura i administracyja mietro nie abskardziać prysud. Što tyčycca nas, to my nie budziem hetaha rabić», — patłumačyŭ advakat.
Videa, z-za jakoha Džabarava prysudzili da realnaha terminu, źjaviłasia ŭ internecie ŭ pačatku lutaha 2020 hoda.
Na im bačna, jak małady čałaviek u mascy idzie pa vahonie mietro, a zatym raptam valicca na padłohu. Pasažyry spačatku padbiahajuć da jaho, kab dapamahčy, ale paśla taho, jak saŭdzielniki prankiera pačynajuć kryčać, što ŭ jaho karanavirus, ludzi ŭ panicy adbiahajuć.
Palicyja zaviała kryminalnuju spravu pa častcy 2 artykuła 213 Kryminalnaha kodeksa (Chulihanstva, ździejśnienaje hrupaj asob). Maksimalnaje pakarańnie pa hetym artykule ŭvohule siem hadoŭ pazbaŭleńnia voli.
Praz tydzień paśla publikacyi taho videa Džabarava zatrymali. Spačatku jamu abrali mieru strymańnia ŭ vyhladzie padpiski ab niavyjeździe, ale paźniej vyśvietliłasia, što abvinavačany nie pražyvaje pa adrasie, jaki ŭkazaŭ u pratakole dopytu, i sud jaho aryštavaŭ.
Byli zatrymanyja i saŭdzielniki Džabarava, jakija zdymali prank na kamieru. Jany znachodzilisia pad padpiskaj ab niavyjeździe i atrymali ŭmoŭnyja terminy.
Džabaraŭ raskajaŭsia ŭ zroblenym i paprasiŭ prabačeńnia ŭ ludziej, jakija znachodzilisia ŭ momant incydentu ŭ vahonie mietro. Svaje dziejańni jon nazvaŭ «durnym žartam».
Kamientary