«Maskva chacieła b pavialičyć na Biełarusi svaju pastajannuju vajskovuju prysutnaść». Jakaja rola Rasii ŭ mihranckim kryzisie?
Mihrancki kryzis na miažy Biełarusi i Polščy robicca i rasijskaj prablemaj. Premjer-ministr Polščy Matevuš Maraviecki i MZS Polščy prostym tekstam abvinavačvajuć Rasiju ŭ datyčnaści da padziej, Mierkiel razmaŭlaje pra mihrantaŭ z Pucinym, ES pahražaje sankcyjami «Aerafłotu», a Rasija abiacaje zakryć nieba dla zamiežnych avijakampanij u adkaz. Sam Łukašenka prosić Rasiju padklučycca da dziažurstva na miežach Sajuznaj dziaržavy. Mižnarodnaja situacyja z kožnym dniom abvastrajecca, ale jakaja tut sapraŭdnaja rola Rasii? Raspytali ekśpiertaŭ.
«Kali ES pahodzicca na pasrednictva Pucina, toj zhulaje jak «miratvorac» i zmoža vyjści ź izalacyi»
Rasijski palitołah Ivan Preabraženski ŭpeŭnieny, što ŭ Maskvie ŭ kursie ŭsich detalaŭ apieracyi ad biełaruskich uład pa vykarystańni ŭciekačoŭ u jakaści tranśmiežnaj zbroi. Tam radyja skarystać heta ŭ svaich intaresach.
«Rasija čakała, kali Jeŭrasajuz vymušany budzie paprasić jaje vystupić pasrednikam u adnosinach z Łukašenkam, bo bolš nikoha, aproč Rasii (i, moža być, Kitaja), toj słuchać nie stanie. Havorka jakraz pra razmovu Pucina ź Mierkiel. Kali ES pahodzicca na pasrednictva Pucina, toj zhulaje jak «miratvorac» Łukašenka ŭ 2014 hodzie i zmoža vyjści ź izalacyi».
Na dumku ekśpierta, pačaŭsia etap vialikaha palityčnaha handlu: Rasiju pałochajuć sankcyjami, kab jana ŭmiašałasia i spyniła Łukašenku. Rasija, u svaju čarhu, pałochaje tym, što zusim samaŭchilicca — tady prosta nie budzie kamu razmaŭlać ź biełaruskimi ŭładami.
«Heta moža praciahvacca da momantu, pakul nadvorje — śnieh i marazy — nie pieratvoryć trafik ź ludźmi ŭ «darohu śmierci», i sproby šturmu miažy ź biełaruskaha boku časova, da viasny, nie sasłabnuć ci zusim nie spyniacca. U lubym razie ŭžo siońnia Pucin uzmacniaje svoj upłyŭ, i pry takim raskładzie Biełaruś ad jaho dakładna nikudy nie dzieniecca», — ličyć Preabraženski.
«Łukašenka chacieŭ by, kab Zachad i Kreml płacili za svoj spakoj»
Palitołah, ekśpiert iSANS i Centra EAST Andrej Jelisiejeŭ ličyć pierabolšanym mierkavańnie, što Maskva vyrašaje ŭsio ŭ biahučaj situacyi na pamiežžy, jak zajaŭlaŭ u tym liku polski bok.
«Pucin sapraŭdy maje vialiki ŭpłyŭ na zamiežnapalityčnyja dziei Łukašenki, i prapahandysckaja padača situacyi ŭ biełaruskich dziaržaŭnych i kramloŭskich ŚMI zbolšaha identyčnaja. Heta śćvierdžańni pra adkaznaść Zachadu za mihracyjnuju situacyju, jaki, maŭlaŭ, raniej prajaviŭ ahresiju da dalokich krain, a taksama pra adnačasova biezdapamožny Jeŭrasajuz, jaki nie moža dać rady situacyi, i jahonaje «fašysckaje» staŭleńnie da ŭciekačoŭ. Razam z tym, na moj pohlad, Kreml i Łukašenka majuć va ŭsioj hetaj historyi svaje mety i svaje partyi ŭ hulni», — kamientuje ekśpiert.
Na jaho dumku, Maskva chacieła b ciapier pavialičyć na Biełarusi svaju pastajannuju vajskovuju prysutnaść. Łukašenka ž imkniecca zrabić takuju prysutnaść tolki časovaj dla zastrašvańnia Zachadu: jon adnačasova šantažyruje i Zachad, i Kreml, što zdolny suprać ichniaj ža voli ŭciahnuć ich u vialiki kanflikt.
«Łukašenka chacieŭ by, kab Zachad i Kreml płacili za svoj spakoj i kupili jaho «pradkazalnaść». Dva hady tamu Łukašenka hulaŭ u rehijanalnaha «miratvorca» i atrymlivaŭ bonusy pad hety imidž. Ciapier ža sprabuje vybivać resursy u susiedziaŭ u jakaści «vajnatvorcy».
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach11
Kamientary