Staŭ viadomy źmiest sajuznaj Vajennaj daktryny Rasii i Biełarusi

Novuju redakcyju Vajennaj daktryny Sajuznaj dziaržavy prezidenty Rasii i Biełarusi Uładzimir Pucin i Alaksandr Łukašenka ŭchvalili jašče ŭ listapadzie. Pra toje, što dakumient užo apublikavany na sajcie Pastajannaha kamiteta Sajuznaj dziaržavy, stała viadoma tolki ciapier, paviedamlaje «Kommiersant'».

Ahułam źmiest dakumienta vyhladaje jak «za ŭsio dobraje, suprać usiaho kiepskaha».

Vajenna-palityčnaja abstanoŭka, jakaja składvajecca vakoł Sajuznaj dziaržavy, značycca ŭ dakumiencie, «charaktaryzujecca ŭzrastańniem niehatyŭnych pracesaŭ u śfiery hłabalnaj i rehijanalnaj biaśpieki, abumoŭlenych jak hieapalityčnym supiernictvam pamiž viadučymi suśvietnymi dziaržavami, tak i sutyknieńniem intaresaŭ asobnych dziaržaŭ (kaalicyj dziaržaŭ)».

Siarod takich niehatyŭnych faktaraŭ u daktrynie vyłučanyja:

• sproby źmianieńnia kaštoŭnasnych aryjenciraŭ i madelej raźvićcia, dyskredytacyi kultur, relihij i cyvilizacyj, falsifikacyi historyi, jakija sadziejničajuć parušeńniu duchoŭna-maralnych suviaziej rodnasnych narodaŭ;
  
  
• supraćdziejańnie z boku niekatorych mižnarodnych arhanizacyj, zamiežnych dziaržaŭ raźvićciu Sajuznaj dziaržavy, ADKB, a taksama inšych intehracyjnych utvareńniaŭ z udziełam Biełarusi i Rasii;
  
  
• najaŭnaść pablizu miažy Sajuznaj dziaržavy ačahoŭ vajennych kanfliktaŭ;
  
  
• naroščvańnie siłavoha patencyjału NATA na źniešniaj hranicy Sajuznaj dziaržavy.

U paraŭnańni z daktrynaj 2001 hoda, zaznačaje «Kommiersant'», kolkaść faktaraŭ, jakija niehatyŭna ŭpłyvajuć na biaśpieku ŭdzielnikaŭ Sajuznaj dziaržavy, značna vyrasła.

Pry hetym u novym dakumiencie, jak i ŭ papiaredniaj viersii, skazana, što Rasija i Biełaruś addanyja palityčnym i nievajennym mieram pa ŭrehulavańni sprečak. 

«Prymianieńnie vajennaj siły razhladajecca jak krajniaja miera tolki paśla vyčarpańnia palityčnych, dypłamatyčnych, pravavych, ekanamičnych, infarmacyjnych i inšych mier nievajennaha charaktaru, kali ich prymianieńnie pradstaŭlajecca niemahčymym dla zabieśpiačeńnia vajennaj biaśpieki», — udakładniajecca tam.

Pavialičyć

U jakaści asnoŭnych mier pa zabieśpiačeńni vajennaj biaśpieki ŭdzielniki Sajuznaj dziaržavy siarod inšaha razhladajuć u mirny čas nastupnyja:

• sumiesnaje vykarystańnie abjektaŭ vajennaj i transpartnaj infrastruktur u intaresach RHV; praviadzieńnie ŭzhodnienaj mabilizacyjnaj padrychtoŭki ekanomik;
  
  
• farmavańnie adzinaj pahraničnaj prastory;
  
  
• padrychtoŭka orhanaŭ dziaržaŭnaha kiravańnia, miascovaha kiravańnia i samakiravańnia, arhanizacyj i nasielnictva da rašeńnia zadač terytaryjalnaj i hramadzianskaj abarony.

U dakumiencie asobna padkreślivajecca, što «jadziernaja zbroja RF budzie zastavacca važnym faktaram praduchileńnia ŭźniknieńnia jadziernych vajennych kanfliktaŭ i vajennych kanfliktaŭ z užyvańniem zvyčajnych srodkaŭ paražeńnia».

U kancy hoda Alaksandr Łukašenka dapuściŭ źjaŭleńnie na terytoryi Biełarusi jadziernaj zbroi. 

Takuju mahčymaść dapuskaje i prajekt novaj Kanstytucyi, ź jakoj admysłova prybrali status niejtraliteta. U dziejsnaj Kanstytucyi skazana, što Biełaruś «stavić metaj zrabić svaju terytoryju biaźjadziernaj zonaj, a dziaržavu — niejtralnaj». U prajekcie novaha dakumienta skazana tolki, što kraina «vyklučaje vajennuju ahresiju sa svajoj terytoryi ŭ adnosinach da inšych dziaržaŭ». 

Z novaj Vajennaj daktryny Sajuznaj dziaržavy napramuju nie vynikaje, što rasijskaja jadziernaja zbroja moža być raźmieščanaja dzie-niebudź za miežami RF. Pry hetym Uładzimir Pucin supakoiŭ hramadskaść padčas sustrečy z prezidentam Francyi Emaniuelem Makronam u Kramli nakont jadziernaj zbroi ŭ Biełarusi. Što kankretna Pucin paabiacaŭ — nieviadoma.

Ź inšaha boku, pramoj zabarony na raźmiaščeńnie rasijskaj jadziernaj zbroi ŭ Biełarusi ŭ daktrynie taksama niama.

Da taho ž, u daktryny, jak kažuć, adkrytaja kancoŭka. «Pałažeńni Vajennaj daktryny mohuć udakładniacca sa źmianieńniem charaktaru vajennych niebiaśpiek i vajennych pahroz, zadač u halinie zabieśpiačeńnia vajennaj biaśpieki i sumiesnaj abarony, umoŭ raźvićcia Sajuznaj dziaržavy, a taksama nacyjanalnych zakanadaŭstvaŭ dziaržaŭ-udzielnic», — napisana tam.

«Źjadajuć suvierenitet». Zdabyli i praanalizavali nieapubličanyja dakumienty ab intehracyi, jakija padpisali Łukašenka i Pucin

• 0
• 0
• 0
• 0
• 0
• 1