«Što takoje čyhunka?» Biełarusy raspracavali dla ZSU test dla vykryćcia rasijskich dyviersantaŭ z «biełaruskimi pašpartami»
Z pačatkam vajny Rasija masava zasyłaje va Ukrainu dyviersantaŭ. Niekatoryja ź ich vydavali siabie za biełarusaŭ, jakija biehli ad režymu. Voś jak ich vyvodzili na čystuju vadu.
Pra apytanku, jakaja dapamahaje vyličyć dyviersantaŭ, raskazaŭ adzin ź jaje składalnikaŭ. Były minčuk, jon žyvie va Ukrainie z 2003 hoda. Mužčyna ŭdzielničaŭ u vajnie jašče ŭ 2014-m. Ciapier słužyć u terytaryjalnaj abaronie svajoj vobłaści.
Z pačatkam vajny Uzbrojenyja siły Ukrainy (ZSU) źviarnulisia da biełarusaŭ z prośbaj skłaści apytanku, jakaja dapamahała b vyjaŭlać rasijskich špijonaŭ ź biełaruskimi pašpartami.
«Ź jaje dapamohaj možna zrazumieć, špijon heta ci sapraŭdny biełarus. U samoj ankiecie nie tolki moŭnyja pytańni.
Naprykład, čałaviek kaža, što jon bieh ad režymu, žyŭ u Minsku. Pytajemsia u jaho, dzie tam Kamaroŭski rynak. Kožny biełarus heta viedaje. Z dapamohaj takich pytańniaŭ i vykryvali, što jon rasijanin. I takich vypadkaŭ vielmi šmat. Albo pytali, što takoje čyhunka ci bulba.
Padobnyja pytańni składzieny i dla tych, u lehiendzie katorych śćviardžajecca, što jon žyŭ u Breście ci Mahilovie. Dyviersant z Rasii, kaniečnie, na takija pytańni nie adkaža», — raskazvaje mužčyna. Aŭtary testu ź mierkavańniaŭ biaśpieki nie raskryvajuć inšych pytańniaŭ, jakija jon utrymlivaje.
Ale rasijskich špijonaŭ vydajuć i inšyja detali.
Tyja, chto vydaje im dakumienty, časam navat nie viedajuć, što ŭ Biełarusi niama hubiernij.
«U padroblenym pašparcie byvaje napisana, što jon vydadzieny palicyjaj niejkaj hubiernii ci Połackaj vobłaści. I tut pamylajucca navat dva razy.
Samu apytanku časta vykarystoŭvaje patrul. Naprykład, jany iduć pa Lvovie, pytajucca ŭ čałavieka dakumienty, a jon daje biełaruski pašpart. I tady jany pa apytancy prachodziacca. Kali čałaviek adkazvaje, to pytańniaŭ bolš da jaho niama.
Asabliva ŭ sakaviku my šmat takich dyviersantaŭ złavili, kali była abłoha Kijeva. Jany zdavalisia ŭ pałon, kazali, što ź Biełarusi i što dakumienty zhareli. A potym vyjaŭlałasia, što heta rasijski vajskoviec».
Mahčyma, mienavita praz takich dyviersantaŭ z «biełaruskimi» pašpartami i pajšli čutki, što ŭ Vorzieli pad Kijevam stajaŭ i biełaruski adździeł.
Kamientary