«Што такое чыгунка?» Беларусы распрацавалі для ЗСУ тэст для выкрыцця расійскіх дыверсантаў з «беларускімі пашпартамі»
З пачаткам вайны Расія масава засылае ва Украіну дыверсантаў. Некаторыя з іх выдавалі сябе за беларусаў, якія беглі ад рэжыму. Вось як іх выводзілі на чыстую ваду.
Пра апытанку, якая дапамагае вылічыць дыверсантаў, расказаў адзін з яе складальнікаў. Былы мінчук, ён жыве ва Украіне з 2003 года. Мужчына ўдзельнічаў у вайне яшчэ ў 2014-м. Цяпер служыць у тэрытарыяльнай абароне сваёй вобласці.
З пачаткам вайны Узброеныя сілы Украіны (ЗСУ) звярнуліся да беларусаў з просьбай скласці апытанку, якая дапамагала б выяўляць расійскіх шпіёнаў з беларускімі пашпартамі.
«З яе дапамогай можна зразумець, шпіён гэта ці сапраўдны беларус. У самой анкеце не толькі моўныя пытанні.
Напрыклад, чалавек кажа, што ён бег ад рэжыму, жыў у Мінску. Пытаемся у яго, дзе там Камароўскі рынак. Кожны беларус гэта ведае. З дапамогай такіх пытанняў і выкрывалі, што ён расіянін. І такіх выпадкаў вельмі шмат. Альбо пыталі, што такое чыгунка ці бульба.
Падобныя пытанні складзены і для тых, у легендзе каторых сцвярджаецца, што ён жыў у Брэсце ці Магілёве. Дыверсант з Расіі, канечне, на такія пытанні не адкажа», — расказвае мужчына. Аўтары тэсту з меркаванняў бяспекі не раскрываюць іншых пытанняў, якія ён утрымлівае.
Але расійскіх шпіёнаў выдаюць і іншыя дэталі.
Тыя, хто выдае ім дакументы, часам нават не ведаюць, што ў Беларусі няма губерній.
«У падробленым пашпарце бывае напісана, што ён выдадзены паліцыяй нейкай губерніі ці Полацкай вобласці. І тут памыляюцца нават два разы.
Саму апытанку часта выкарыстоўвае патруль. Напрыклад, яны ідуць па Львове, пытаюцца ў чалавека дакументы, а ён дае беларускі пашпарт. І тады яны па апытанцы праходзяцца. Калі чалавек адказвае, то пытанняў больш да яго няма.
Асабліва ў сакавіку мы шмат такіх дыверсантаў злавілі, калі была аблога Кіева. Яны здаваліся ў палон, казалі, што з Беларусі і што дакументы згарэлі. А потым выяўлялася, што гэта расійскі вайсковец».
Магчыма, менавіта праз такіх дыверсантаў з «беларускімі» пашпартамі і пайшлі чуткі, што ў Ворзелі пад Кіевам стаяў і беларускі аддзел.
Чытайце таксама:
Беспрацоўны з судзімасцю, няня, адміністратар гатэля і адмаўляльнік Халакосту. Каго лукашэнкаўская прапаганда выдае за замежных экспертаў?
У Брэсце хлопец выйшаў з антываенным плакатам да расійскага консульства
Цяпер чытаюць
Аляксандр Лукашэнка так ляснуўся на лёд на хакеі, што трыбуны замерлі ВІДЭА105
Аляксандр Лукашэнка так ляснуўся на лёд на хакеі, што трыбуны замерлі ВІДЭА
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher55
Каментары