Amal miljonu brytancaŭ, što pakutujuć na biassońnicu, zamiest snatvornaha prapišuć mabilny dadatak. Takoje rašeńnie pryniała brytanskaja Nacyjanalnaja słužba achovy zdaroŭja (NHS), jano budzie abaviazvać usich daktaroŭ u krainie.
Razmova idzie pra Sleepio — šaścitydniovuju prahramu ličbavaj terapii, jakuju možna budzie prymianiać u jakaści pieršačarhovaha mietadu lekavańnia biassońnicy.
Miarkujuć, što dadatak dapamoža pacyjentam pazbycca zaležnaści ad snatvornych, što vyklikajuć pryvykańnie, naprykład ad załpidemu i zapikłonu. Hetyja leki prymajuć kala paŭmiljona brytancaŭ, piša The Times.
Užyvańnie dadatka ŭchvaliŭ Nacyjanalny instytut achovy zdaroŭja i miedycynskaj dapamohi (Brytanija), i ekśpierty ličać, što novy srodak dapamoža 800 tysiačam brytancaŭ ź biassońnicaj. Dziaržavie heta budzie kaštavać krychu bolš za 55 dalaraŭ na pacyjenta, i kliničnyja vyprabavańni pakazvajuć, što takim čynam brytancy sekanomiać šmat hrošaj na naviedvańni doktara, dy i dadatak dapamoža ad biassońnicy bolš, čym tabletki.
Praca z Sleepio uklučaje ŭ siabie šeść štotydniovych 20-chvilinnych siesij kahnityŭnaj pavodzinnaj terapii biassońnicy, jakuju pravodzić virtualny doktar. Hetaja terapija stvarajecca z ulikam indyvidualnych patrebaŭ i z dapamohaj štučnaha intelektu, jana skiravanaja na pieramohu nad asnoŭnymi pryčynami biassońnicy — niehatyŭnymi dumkami i tryvohaj.
Sleepio prosić pacyjentaŭ vieści dziońnik snu i daje parady pra toje, jak spynić biaskoncyja dumki, što nie dajuć zasnuć.
Jość u dadatku i parady pa ładu žyćcia, naprykład, rekamiendacyja nie zasynać z telefonam kala łožka.
Kliničnaje vyprabavańnie prademanstravała, što 75% pacyjentaŭ, jakija prajšli terapiju praz dadatak, adčuli siabie lepiej, i čas, patrebny im dla zasynańnia, skaraciŭsia ŭdvaja. Daśledavańni taksama pakazvajuć, što kahnityŭnaja pavodzinnaja terapija biassońnicy źmianšaje na 30 chvilin čas, jaki pacyjenty pravodziać biez snu, kali pračynajucca siarod nočy.
Zaraz rekamiendacyi pa lačeńniu biassońnicy ŭ Brytanii śćviardžajuć, što pierš za ŭsio pacyjentu treba prapanavać rekamiendacyi pa hihijenie snu. Siarod ich, naprykład, pažadańnie abmiežavać užyvańnie kafieinu i prytrymlivacca adnaho i taho ž režymu pierad snom. Kali biassońnica nie prachodzić i prynosić čałavieku šmat pakut, jamu mohuć pryznačyć karotki kurs snatvornaha na termin da siami dzion.
Jak zmahacca z chrapam? Piać sposabaŭ
Čamu kava časam robić nas bolš stomlenymi
Ciapier čytajuć
Biełarusam stała składaniej lehalizavacca ŭ Polščy — tam bolš nie prymajuć vydadzienyja ŭ BSSR dakumienty i patrabujuć apastyli6
Kamientary