17 žniŭnia 2021-ha siłaviki zatrymali Michaiła Łupanosava, brata byłoha padpałkoŭnika HUBAZiKa Stanisłava Łupanosava, jaki vyjechaŭ ź Biełarusi, asudziŭšy dziejańni byłych kaleh. Michaił byŭ dyrektaram budaŭničaj firmy. U SIZA jaho prymušali pad kamieru asudžać dziejańni brata i pieradavać zakliki «adumacca» ad byłych kaleh. 8 červienia jamu vynieśli prysud.
Pa častcy 2 artykuła 216 «Naniasieńnie majomasnaj škody biez prykmiet kradziažu» Michaiłu Łupanosavu prysudzili 2,5 hoda chimii, jak i zapytaŭ prakuror.
Spravu razhladali ŭ sudzie Maskoŭskaha rajona Minska, sudździa — Siarhiej Kacar.
Mužčynu adpuścili ŭ zale suda. Abskardžvać prysud jon nie budzie.
Pieršapačatkova Michaiłu inkryminavali jašče dva artykuły — č.č. 1 i 2 art. 380 (vykarystańnie niesapraŭdnaha dakumienta, učynienaje paŭtorna), a taksama č. 1 art. 427 (uniasieńnie adkaznaj asobaj zahadzia niesapraŭdnych danych u aficyjnyja dakumienty, padrobka dakumientaŭ, učynienaja z karyści ci inšaj asabistaj zacikaŭlenaści).
Ale hetyja abvinavačvańni ŭ pracesie advalilisia.
Maskoŭski adździeł SK Minska raniej ahučvaŭ, u čym jany padazrajuć Michaiła. Jon nibyta atrymlivaŭ licenziju na budaŭnictva, nie majučy supracoŭnikaŭ patrebnaj katehoryi, a tamu, jak śćviardžajecca, sam unios u pracoŭnyja knižki piaci asob niesapraŭdnyja zapisy ab raniejšych miescach pracy.
Jašče adzin epizod, jaki staviŭsia ŭ vinu bratu Łupanosava, hučyć tak: zaklučyŭ damovu z adnoj firmaj i subpadradčykam na praviadzieńnie […] rabot, praź niekalki miesiacaŭ prapanavaŭ zakazčyku źmianić umovy apłaty i pieraličvać apłatu za vykananyja raboty ad zamoŭcy adrazu na rachunak subpadradčyka, dzie Łupanosaŭ taksama byŭ namieśnikam dyrektara.
«Takim čynam, na padstavie akta zdačy-pryjomki vykananych rabot, jakija faktyčna nie adbyvalisia, zamoŭcam pieraličanyja za niekalki etapaŭ 45 tysiač biełaruskich rubloŭ. U nastupnym ukazanyja srodki raschodavalisia ŭ intaresach tavarystva, dyrektaram jakoha źjaŭlaŭsia fihurant», — paviedamlaŭ SK.
Čytajcie taksama: Śledčy kamitet raskazaŭ, za što kašmaryć brata Łupanosava
Čytajcie taksama: Aficer HUBAZiKa, jaki pieradavaŭ infarmacyju ruchu za svabodnyja vybary, daŭ pieršaje intervju: Chaj dumajuć, što ja adzin taki, chaj supakojvajuć siabie
Pamior dzied Koli Łukašenki — były viazień HUŁAHa, asudžany za dapamohu «banderaŭcam»10
Kamientary