«Aryštavali pijanina, jakoje mnie kupili baćki ŭ pieršym kłasie». U Darji i Ihara Łosikaŭ aryštavali majomaść
Kab vykupić svaju majomaść z-pad aryštu, Ihar Łosik pavinien atrymać śpiecyjalny dazvoł. Kali jon hetaha nie zrobić, z domu mohuć zabrać navat čajnik, piša «Radyjo Svaboda».
Žurnalist «Svabody» Ihar Łosik za kratami ŭžo bolš za dva hady — z 25 červienia 2020-ha. U śniežni 2021-ha Homielski abłasny sud prysudziŭ Iharu 15 hadoŭ pazbaŭleńnia voli ŭ kałonii ŭzmocnienaha režymu. Palitviaźnia ŭžo pieraviali ŭ Navapołack, na miesca pastajannaha źniavoleńnia. U siaredzinie lipienia dadomu da Ihara ŭ Baranavičach znoŭ pryjšli ludzi ŭ formie.
«Heta adbyłosia niekalki tydniaŭ tamu, — raskazała Darja Łosik. — Hrukat u dźviery, dźvie dziaŭčyny ŭ formie. Skazali mnie, što ja ŭžo, napeŭna, viedaju, chto jany takija i čamu jany pryjšli. Ja ich puściła. Napeŭna, spračacca ź imi i nie puskać — sprava biessensoŭnaja. Jany papiaredzili, što mohuć vyklikać milicyju, kali ja budu im pieraškadžać. Usio ŭ najlepšych tradycyjach było. Ale dziela spraviadlivaści skažu, što pavodzili siabie davoli vietliva. Navat vielmi vietliva. Bachiły nadzieli».
Darja raskazvaje, što prystavy abyšli ŭsie pakoi, šukajučy, što b možna było apisać. Ihar i Darja daŭno ŭ aficyjnym šlubie, tamu ŭsio, što znachodzicca ŭ kvatery, moža być aryštavanaje.
Suma naniesienaj, pavodle viersii suda, dziejnaściu Ihara Łosika i inšych fihurantaŭ jaho spravy škody dziaržavie składaje 2,5 miljona rubloŭ i kala 130 tysiač rubloŭ sudovych vydatkaŭ. Usie hetyja hrošy dziaržaŭnyja orhany źbirajucca atrymać z rodnych asudžanych. Supracoŭniki adździeła prymusovaha vykanańnia mohuć pryjści ŭ luby čas biez papiaredžańnia.
«Aryštavali televizar, — praciahvaje Darja. — Pijanina taksama, chacia jaho nabyli baćki jašče kali ja pajšła ŭ pieršy kłas. Ale dakumientaŭ ab jaho nabyćci ŭ mianie nie było, tamu jaho taksama aryštavali. Čajnik aryštavali, kamplekt mebli ź lustram. Usio, što było nabytaje ŭ šlubie. Jak adna z supracoŭnic APV mnie patłumačyła, ja mahu vykupić svaju majomaść. Usiu, albo tuju, jakuju zachaču».
Kab vykupić svaju aryštavanuju dziaržavaj majomaść, Ihar Łosik pavinien atrymać dazvoł u adździele prymusovaha vykanańnia. Pieraličyć hrošy na dziaržaŭny rachunak možna budzie tolki paśla hetaha. Ciapier majomaść Łosikaŭ aryštavanaja, Darja nie maje prava navat joj karystacca.
«Nielha karystacca, nielha pieramiaščać pa kvatery, nielha łamać, nielha z hetymi pradmietami vykonvać niejkija dziejańni, — raskazvaje Darja Łosik. — Moj čajnik ciapier pad chatnim aryštam. Kvatera, u jakoj my ciapier žyviom, źjaŭlajecca ŭłasnaściu maich baćkoŭ. Jana pa zakonie nie maje nijakaha dačynieńnia da spravy Ihara. Kali b heta byŭ naš dom, to, jak ja razumieju, jaho taksama mahli b aryštavać».
Aryštavanaja ŭ Łosikaŭ majomaść budzie vystaŭlenaja na prodaž u tym vypadku, kali Darja i Ihar nie stanuć jaje vykuplać, albo nie atrymajuć dazvołu na heta. Fotazdymki z televizaram, čajnikam i inšaj majomaściu Łosikaŭ vystaviać na sajcie kramy kanfiskatu. Kali niechta zachoča štości z aryštavanaha nabyć, Darji pazvoniać i raskažuć pra heta.
«Častku z aryštavanaha ja chaču vykupić, — kaža Darja Łosik. — Ale reštu, vidać, ja im addam. Kali im tak patrebna.
Akramia hetaha, mnie skazali, što raz suma naniesienaj škody vialikaja, i ŭ kvatery ŭ mianie naŭrad ci znojdziecca stolki majomaści, to jany mohuć chadzić da mianie ź niejkaj pieryjadyčnaściu i apisvać novuju majomaść. Heta značyć, što kali ja ciapier sabie niešta nabudu sama, to heta taksama mohuć aryštavać i potym zabrać».
Na minułym tydni Darja zmahła zrabić Iharu vialikuju pieradaču ŭ kałoniju vahoj 50 kiłahramaŭ. Jaje pryniali i całkam pieradali. Akramia hetaha, Ihar Łosik napisaŭ zajavu na telefanavańnie žoncy. Ciapier Darja čakaje zvanka ad muža ŭ luby momant. Nakont mahčymaha spatkańnia ŭ kałonii infarmacyi pakul niama. Pamiaškańnie dla sustreč pa-raniejšamu na ramoncie, u dadatak Ihara, jak i inšych palitviaźniaŭ, mohuć spatkańnia pazbavić.
«Ihar piša, što chodzić na pracu ŭ atradzie, — dadaje Darja Łosik. — Listy pa-raniejšamu dachodziać tolki ad blizkich rodnych. Usio pa-staromu».
Napisać Iharu možna pa adrasie PK №1, 211440, Navapołack, Techničnaja, 8.
Kamientary