Sud pa «spravie dziaržpieravarotu»: Juraś Ziankovič zapisvaŭ Zoom dla «partyzanaŭ»
Abvinavačany pa spravie ab zachopie ŭłady Juraś Ziankovič zapisvaŭ ZOOM-kanfierencyi dla «vajennych kaleh» i «partyzan», piša BiełTA.
Ciapier sud vyvučaje hetyja zapisy ŭ jakaści rečavych dokazaŭ. Padčas adnoj z ZOOM-kanfierencyj abvinavačany Ryhor Kastusioŭ čarhovy raz vykazaŭ zaniepakojenaść. Jon adznačyŭ, što zapisvać chod kanfierencyi moža być niebiaśpiečna. Juryj Ziankovič zapeŭniŭ prysutnych, što zapis viadziecca dla «vajennych kalehaŭ» i «partyzan, u jakich jość historyja baraćby z režymam — až da 20 hadoŭ». Razam z tym prapanoŭvałasia padzialić zmoŭščykaŭ na techničnuju i palityčnuju hrupy, kab paźbiehnuć uciečak infarmacyi.
Havorka išła pra «abjadnańnie na asnovie admaŭleńnia». Udzielniki kanfierencyi pahadzilisia, što luby, chto vystupaje suprać Alaksandra Łukašenki, navat kali jon pa-prarasijsku nastrojeny, moža dałučycca. Jašče adnoj umovaj była zhoda z tym varyjantam Kanstytucyi Biełarusi, jaki byŭ raspracavany Alaksandram Fiadutam. Jaho abmierkavańnie prapanoŭvałasia vynieści na refierendum.
Padčas razmovy niekalki razoŭ hučała fraza pra nieabchodnaść «mačyć Łuku».
«Kali my jaho «močym» i Biełaruś źnikaje, to ja nie zhodny. Kali my jaho «zamočym», a vyrašać, chto budzie kiravać Biełaruśsiu, buduć biez nas, to mnie niecikava», — zajaviŭ Ryhor Kastusioŭ.
Jon taksama dadaŭ, što nieabchodna pravieści ŭ Biełarusi vybary, kab abrać novaha prezidenta. Padrychtoŭku da novych vybaraŭ płanavali pačać adrazu ž paśla praviadzieńnia papiarednich.
Inšy abvinavačany, Juryj Ziankovič, padčas kanfierencyi zadaŭ pytańnie, ci zhodny Ryhor Kastusioŭ dałučycca da ich. Jon adkazaŭ, što «moža, nakolki budzie mahčyma». Dźmitryj Ščyhielski pavinien byŭ vysłać pakiet nieabchodnych dakumientaŭ, ale, pa słovach Ryhora Kastusiova, jon ich nie atrymaŭ, pakolki byŭ zatrymany.
«Prašu źviarnuć uvahu na maju pazicyju. Hałoŭnaje dla mianie — heta zachavańnie suvierenitetu i niezaležnaści Biełarusi. Maja niepryjaznaść da Alaksandra Łukašenki nie dazvalaje pastupicca hetaj pazicyjaj. Lepš chaj jon budzie prezidentam Biełarusi, pakul kraina zastajecca niezaležnaj», — źviarnuŭsia da suda Ryhor Kastusioŭ.
Abaronca zadała Juryju Ziankoviču pytańnie, što jon mieŭ na ŭvazie pad frazaj «zamočym Łuku». Abvinavačany adkazaŭ, što jany płanavali «mačyć» palityčna, a nie litaralna.
U Ryhora Kastusiova spytali, jak jon razumieŭ hetuju frazu. Jon adkazaŭ, što razumieŭ heta ŭ ramkach palityčnaha pracesu.
***
Praces pa spravie ab «zmovie z metaj zachopu ŭłady» ŭ Minskim abłasnym sudzie pačaŭsia 29 lipienia.
Abvinavačanymi pa spravie prachodziać piać čałaviek: lidar Partyi BNF Ryhor Kastusioŭ, litaraturaznaŭca i palittechnołah Alaksandr Fiaduta, juryst z ZŠA Juryj Ziankovič, supracoŭnica jaho minskaj firmy Volha Hałubovič i aktyvist, dalnabojščyk Dzianis Kraŭčuk.
Ziankovič, Fiaduta i Kastusioŭ abvinavačvajucca ŭ «zmovie z metaj zachopu ŭłady niekanstytucyjnym šlacham» (č.1 art. 357 KK), a Hałubovič i Kraŭčuk — tolki ŭ «hrubym parušeńni hramadskaha paradku» (č. 1 art. 342).
Akramia hetaha, Ziankoviču inkryminavanaje «stvareńnie ekstremisckaha farmavańnia i kiraŭnictva takim farmavańniem» (č. 1 art. 361-1 KK), «zakliki da zachopu dziaržaŭnaj ułady» (č. 3 art. 361 KK), «raspalvańnie sacyjalnaj varožaści, ździejśnienaje hrupaj asobaŭ» (č. 3 art. 130 KK).
Što za čamadan nosić kala Łukašenki jahony achoŭnik? Nie, tam nie jadziernaja knopka20
Kamientary