Ministr abarony Hiermanii raptoŭna prybyła ŭ Adesu. Heta pieršy jaje vizit va Ukrainu z pačatku vajny
Ministr abarony FRH Kryścinie Łambrecht prybyła ŭ subotu z raniej nie anansavanym vizitam u Adesu, dzie jaje sustreŭ ministr abarony Ukrainy Alaksiej Reźnikaŭ. Heta pieršy vizit Łambrecht va Ukrainu z momantu pačatku poŭnamaštabnaha ŭvarvańnia Rasii, piša «UP».
Ministr abarony FRH adznačyła, što Ukraina najbližejšym časam atrymaje pieršy ź niekalkich abiacanych Bierlinam kompleksaŭ supraćpavietranaj abarony IRIS-T. Pavodle jaje słoŭ, jon pavinien pastupić na praciahu «nastupnych niekalkich dzion».
Paviedamlajecca, što Łambrecht pryjšłosia na niekatory čas schavacca ŭ bunkiery z-za pavietranaj tryvohi.
Ministru, siarod inšaha, raskazali ab prymianieńni pieradadzienych uradam FRH Kijevu SAU Gepard. Pa słovach Łambrecht, hetyja samachodnyja zienitnyja ŭstanoŭki dapamohuć abaranić adeskuju krytyčnuju infrastrukturu ad rakietnych udaraŭ RF.
Raniej Hiermanija pastaviła Ukrainie ŭ ahulnaj kolkaści 30 takich SAU, a taksama 6000 bojeprypasaŭ da ich.
Reźnikaŭ paviedamiŭ, što Łambrecht «pryviezła dobryja naviny i jašče bolš instrumientaŭ dla ŭmacavańnia ŭkrainskaha vojska».
«My abmierkavali biahučuju hieapalityčnuju situacyju i situacyju ź biaśpiekaj, ministr była rada parazmaŭlać z našymi vajarami i ŭbačyć sistemu Gepard na bajavym dziažurstvie», — skazaŭ jon.
Aficer-pahraničnik, jaki prajšoŭ praz turmu, raskazvaje pra žyćcio «da» i «paśla» dyj nie škaduje słoŭ pahardy dla amapaŭcaŭ3
Kamientary