Pierapis biełarusaŭ i chobitaŭ

Šmat biedaŭ za šmatpakutnuju historyju Biełarusi abrynułasia na naš harotny narod. Ale zaraz pryjšła samaja strašnaja — pierapis.

«Vialiki Brat» ź zialonym partfelem i značkom pierapisčyka pryjšoŭ pa cabie. Nie adčyniaj jamu dźviery, zabłytaj jaho svaimi chitrymi adkazami, nie vydavaj jamu hałoŭnuju tajnu — svaju nacyjanalnaść. Prynamsi, čytajučy niekatoryja forumy ŭ Internecie, možna pierakanacca,

što mienavita ŭ hetym niekatoryja ludzi bačać usiu svaju hramadzianskuju śmiełaść — skazać «fi» dziaržavie ŭ cełym i kankretnamu pierapisčyku ŭ pryvatnaści.

Zdajecca, takija ludzi ŭžo saśpieli da vialikaha «hramadzianskaha ŭčynku» — nie ŭpuścić pierapisčykaŭ u svoj dom albo adkazać, što ichniaja nacyjanalnaść — chobit.

Pryznajusia, heta ŭ mianie vyklikaje pryblizna tuju ž iranična‑złobnuju reakcyju, jak paviedamleńnie, što antyhlabalisty dzie‑niebudź u Eŭropie raźbili vokny Makdonalsa. Viedajecie, u śviecie, dzie ŭ Iranie asudžajuć na śmierć za ŭdzieł u apazycyjnych akcyjach, dzie ŭ niekatorych krainach zabivajuć tolki za inšuju seksualnuju aryjentacyju, i — možacie ličyć heta banalnaściu — u Afrycy tysiačy dziaciej pamirajuć ad hoładu, — dyk voś u takim śviecie jość prablemy bolš haračyja, čym Makdonals.

Toje samaje i ŭ Biełarusi — zdajecca, dla mnohich dylema «puskać ci nie ŭ svoj dom pierapisčyka, i što jamu havaryć» stała ci nie adzinym, vielmi lohkim i zručnym sposabam prajavić svaju «śmiełaść». A voś vam, darečy, i pohlad «ź inšaha boku» — biełaruskamoŭnaja studentka‑pierapisčyca piša pra svaje pieršyja pryjemnyja ŭražańni.

Kali chto dumaje, što jon «hieroj», to dla pierapisčykaŭ jany — «chamło».

Darečy, niešta ja pakul nia čuŭ, kab pierapis niepakoiŭ tych, chto realna supraćstaić uładam — apazycyjnyja partyi ci navat pravaabaroncaŭ. Nie, pieravažna dzidy łomiacca «kuchonnymi revalucyjanerami», jakija za apošnija hady dziakujučy raźvićciu internetu razmnažajucca, nibyta «niečaroŭnyja trusiki», u hieametryčnaj prahresii.

Heta taki biełaruski fenomen, kali na akcyi prysutničaje 500 čałaviek, a 20 tysiač čytajuć pra onłajn‑repartaž hetaj akcyi ŭ Internecie.

Što b chaciełasia skazać takim revalucyjaneram, dla jakich uvieś «pratest» vyjaŭlajecca ŭ alternatyvie, pakazać usim dulu albo siaredni palec? Paŭdzielničajcie ŭ niejkim prajekcie, ustupicie ŭ partyju, hramadzkuju arhanizacyju… Nie padabajucca ŭsie isnujučyja — stvarycie svaju. Zmahajsia za što‑niebudź, dakažy, urešcie, što ty nia chobit.

Vital Cyhankoŭ, Radyjo Svaboda

• 0
• 0
• 0
• 0
• 0
• 0
• 0
• 0