25 lipienia: Statkieviča chočuć padłavić
Da ŭładalnikaŭ i rabotnikaŭ maršrutak, što trymajuć haładoŭku ŭ Bieraści, dałučylisia indyvidualnyja pradprymalniki Viačasłaŭ Kucharčuk i Viktar Čajkoŭski – na znak salidarnaści. Ahułam u akcyi ŭdzielničajuć 15 čałaviek.
Palitviaźnia Mikołu Statkieviča baranavickija milicyjanty prymusova pravieryli na ŭtrymańnie alkaholu ŭ kryvi.
Anžaliku Borys vyklikali na dopyt u Leninskaje RUUS Horadni: śledčaha cikaviła, čamu ŭ Polščy jana nazyvaje siabie kiraŭnicaj Sajuzu palakaŭ Biełarusi.
Bieraściejski harvykankam zabaraniŭ raniej dazvoleny mitynh 27 lipienia, daznaŭšysia, što na jaho pryjedzie A.Milinkievič.
Biełaruskija milicyjanty ŭvarvalisia ŭ kvateru supracoŭnika łatvijskaha pasolstva Rejmasa Šmica i kanfiskavali videakasety. Paźniej ministar Navumaŭ zajaviŭ, što na ich była parnahrafija, a MZS Łatvii – što zapisy infarmacyjna-analityčnych prahramaŭ BT.
U Salihorsku padčas raspaŭsiudu ŭlotak zatrymanyja Ivan i Illa Šyły, a taksama aktyvist Partyi BNF Pavał Batujeŭ.
26 lipienia: Jełavaja spuściłasia na viaroŭcy
Aŭtamabil Alaksandra Milinkieviča zatrymali ŭ Połackim rajonie, kali jon jechaŭ da palitviaźnia Paŭła Sieviarynca, na padstavie najaŭnaści ŭ mašynie drukavanych materyjałaŭ. U mašynie byli taksama Ina Kulej, Pavał Mažejka i Alaksiej Janukievič. Paśla składańnia pratakołu Milinkievič usio ž paśpieŭ naviedać ssylnaha.
Da aryštu prysudzili rasiejcaŭ Mikałaja Zbarašenku (15 sutak) i Kaciarynu Vinakuravu (10 sutak): 22 lipienia jany pikietavali rasiejskaje pasolstva ŭ Miensku.
U kvatery Taciany Jełavoj uzłamali dźviery. Pry hetym sama Taciana zdoleła vyleźci z kvatery, što znachodzicca na šostym paviersie, pa viaroŭcy. Maci T.Jełavoj, taksama Tacianu, ad kvatery zabrała «chutkaja»: u bolnicy joj pastavili dyjahnaz «nejracyrkularnaja dystanija».
U kvatery siostraŭ Aleny i Kaciaryny Kazak praviali pieratrus i ŭ KDB na dopyt zabrali haspadyniaŭ. U Aleny ŭ momant zatrymańnia była temperatura 39 hradusaŭ, doma adny zastalisia troje jaje dziaciej (starejšamu synu 11 hadoŭ, małodšaj dačce 5 hadoŭ).
U Taciany Dziadok praviali pieratrus u jaje adsutnaść: kanfiskavali archiŭnyja ŭlotki, hazety, dyski z muzykaj Bize i «Bitłz».
Usie hetyja dopyty j naloty možna źviazać ź imknieńniem KDB raskryć udzielnikaŭ ruchu «Bunt».
Na vulicy zatrymali Jaŭhiena Babkoviča i zavieźli ŭ HUUS Mienharvykankamu. Kiryłu Ihnaciku na vulicy ŭručyli pozvu tudy ž na 27 lipienia.
Pačaŭsia sud u spravie niedziaržaŭnaj hazietaj «Vitiebskij kuŕjer M»: pradprymalnik Alaksandar Daniłaŭ ličyć, što vydańnie abraziła jaho, napisaŭšy, što jon atrymaŭ ziamlu pad pabudovu Centru moładzievaha adpačynku biaz tenderu i konkursu.
U Horkach na dvoje sutak aryštu asudžany Dziamjan Frankoŭski – za niasvoječasovuju vypłatu štrafu ŭ 20 bazavych vieličyniaŭ; štraf na jaho nakłali za raspaŭsiud «Narodnaj voli».
27 lipienia: Dzień Niezaležnaści
U Mahilovie padčas śviatkavańnia Dnia Niezaležnaści zatrymanyja Iryna Kačarova, Siaržuk Niahacin, Siarhiej Stralcoŭ, Alaksandar Siłkoŭ, Siaržuk Hirkin, Hanna Illina, Natałlja Palakova.
U Viciebsku zatrymali Alenu Zaleskuju, Vieru Kavalovu i Ŭładzimiera Simankoviča: ich źvinavacili ŭ arhanizacyi šeścia.
U Salihorsku padčas konkursu malunkaŭ da Dnia Niezaležnaści zatrymali moładzievych aktyvistaŭ P.Batujeva, bratoŭ Šyłaŭ, Hleba Sandrasa, Dzianisa Karnova, Andreja Tyčynu, Michała Hruździa i Barysa Parchamčuka.
U Klecku milicyjanty dapytali aktyvista AHP Siarhieja Panamarova: ich cikaviła, ci maje jon dačynieńnie da truny, znojdzienaj u adnym z hramadzkich miescaŭ horadu. U trunie lažała pudziła z harmonikam z akcyi «Pachavańnie pradprymalnika».
U Homieli ŭ prakuraturu chacieli vyklikać moładzievaha aktyvista Sieržuka Siamionava: milicyjant pieradavaŭ baćkam pozvu na syna. Adnak baćki jaje nie ŭziali, bo chłopiec prapisany ŭ inšym miescy. Vyklik tyčycca dziejnaści likvidavanaha ŭładami moładzievaha centru «Hart».
U Miensku padčas vyviešvańnia raściažki «Bunt» zatrymanyja Kaciaryna Fursa i Nasta Čachoŭskaja.
Na ekolaha Valera Drančuka padčas jaho pajezdki ŭ Biełavieskuju pušču skłali pratakoł: jaho źvinavacili ŭ parušeńni režymu asabliva achoŭnych pryrodnych terytoryjaŭ.
28 lipienia: sud «Partnerstva»
Pačaŭsia sud nad aktyvistami niezarehistravanaj arhanizacyi «Partnerstva» – Eniraj Branickaj, Mikałajem Astrejkam, Alaksandram Šałajkam, Cimocham Drančukom. Na zakrytym sudovym pracesie nie dazvolili prysutničać ni svajakam, ni dyplamatam z krainaŭ Eŭraźviazu i ZŠA, ni žurnalistam.
31 lipienia: šukajuć Skrabutana
Kalehija pa hramadzianskich spravach Mahiloŭskaha abłsudu paćvierdziła racyju aktyvista prafsajuzu REP Mahiloŭskaha zavodu štučnaha vałakna Ŭładzimiera Tuzava: miesiac tamu jon vyjhraŭ sud pieršaj instancyi ŭ suviazi ź niezakonnym utrymańniem jaho premii.
U Zelvienskuju prakuraturu vyklikali maci Jaŭhiena Skrabutana: pamočnik prakurora cikaviŭsia, dzie ciapier chłopiec. Najchutčej vyklik źviazany z kryminalnaj spravaj «Maładoha frontu».
❏
Apazycyjny aktyvist Dzianis Dzianisaŭ, jaki źnik u Miensku 22 lipienia, abjaviŭsia ŭ Rasiei 23-ha. Ciapier jon viarnuŭsia ŭ Biełaruś. Dahetul niemaviedama, što ž sapraŭdy ź im zdaryłasia. Na fota: Dzianis Dzianisaŭ sa svajoj kalažankaj Tacianaj Dziadok. Na nastupny dzień paśla taho, jak jana napisała zajavu pra źniknieńnie Dzianisa, da jaje na kvateru pryjšli ź pieratrusam.
Kamientary