Pačaŭsia novy siezon zapusku ź Biełarusi ŭ Litvu «cyharetnych kryh»
U minułyja vychadnyja litoŭskija pamiežniki kala Druskienik vyciahnuli ź Niomana try hruzy biełaruskich cyharet. Heta ŭžo tendencyja: tolki na minułym tydni litoŭskija pamiežniki zatrymali 7 takich «pasyłak». Usiaho sioleta tolki pamiežnikami ŭ Druskienikach byli zatrymany 42 padobnyja hruzy, paviedamlaje Delfi.
U noč ź piatnicy na subotu niedzie apoŭnačy pamiežniki kala vioski Lipluny zaŭvažyli, što pamiž kryhami pa Niomanie płyvie padazrony abjekt. Z vyhladu jon i sam byŭ padobny da kryhi.
Pamiežniki na matornaj łodcy padpłyli da abjekta i dastavili jaho na bierah. Vyśvietliłasia, što heta hruz kantrabandnych cyharet, abkładzieny śnieham i lodam. U Litvu takim čynam sprabavali dastavić 1250 pačkaŭ cyharet NZ Gold ź biełaruskimi banderolami.
Na hruzie było GPS-abstalavańnie.
Za 200 mietraŭ ad hetaha abjekta pamiežniki zaŭvažyli jašče adnu padazronuju «kryhu». Situacyja paŭtaryłasia — hetym razam znajšli hruz z 1000 pačkaŭ cyharet Fest. Pačali rasśledavańnie.
U subotu ŭ miežach vioski Hierdašy byŭ znojdzieny hruz, vykinuty na bierah, — 2000 pačkaŭ cyharet Fest i Minsk Capital QS ź biełaruskimi banderolami.
17 km miažy ź Biełaruśsiu prachodziać pa Niomanie. Na biełaruskim baku, jak śćviardžajuć litoŭcy, kantrabandysty adčuvajuć siabie volna i ničoha nie bajacca.
Sioleta litoŭskija pamiežniki vyłavili ź Niomana 42 takija kantrabandnyja hruzy. Tolki na minułym tydni zafiksavana 7 takich pasyłak, pačata 5 rasśledavańniaŭ.
Anałahičnyja hruzy traplajucca i pamiežnikam Śviancianskaha rajona, dzie kantrabandu spłaŭlajuć pa Vilii.
Hetaja praktyka była vielmi pašyranaja ŭ kantrabandystaŭ i ŭ minułuju zimu.
Kamientary