Polskija transpartniki pačynajuć strajk. Jany skardziacca na toje, što biełarusy i rasijanie vyciaśniajuć ich z rynku

Strajk arhanizavany siamiejnymi transpartnymi kampanijami Lublinskaha vajavodstva i palitykami «Kanfiederacyi» (kaalicyja kansiervatyŭnych palityčnych partyj), paviedamlaje sajt ab transpartnaj halinie ŭ Jeŭropie trans.info.

Miarkujecca, što ŭ akcyi pratestu pieravozčykaŭ, zapłanavanaj na 22 sakavika, voźmuć udzieł 200 ciahačoŭ. Kala 10 hadzin ranicy (pa polskim časie) vialikahruzy adpraviacca ŭ bok Varšavy. Aŭtamabili nie buduć ujazdžać u stalicu, a tolki abjeduć jaje.

Paviedamiŭšy svaje patrabavańni polskamu ŭradu, pratestoŭcy daduć polskim uładam 14 dzion na ich vykanańnie.

— Kali adkazu nie budzie, my nie spynimsia na papieradžalnym strajku. Siońnia mnohija pieravozčyki staviać svaje hruzaviki la płota, tamu što kaeficyjent zahruzki ledź dasiahaje 50 adsotkaŭ, tak što, kali jany stajać la płota tut, to z takim ža pośpiecham jany mohuć stajać na raźviazcy de Hola ŭ Varšavie, — kamientuje adzin z arhanizataraŭ pratestu, aŭtapieravozčyk i kiraŭnik «Kanfiederacyi» ŭ Lublinie Rafał Miekler.

U pratestoŭcaŭ čatyry patrabavańni:

1. Błakavańnie ŭjezdu rasijskich i biełaruskich paŭpryčepaŭ u Polšču.

— Kampanii z hetych krain pastupova vyciaśniajuć nas z rynku. Siońnia jany ŭ stanie zabiaśpiečyć klijentaŭ transpartam na ŭsim učastku pamiž, naprykład, Zachodniaj Jeŭropaj i Biełaruśsiu, tamu što, u adroźnieńnie ad nas, im nie treba pierahružać tavary na miažy, — kaža Rafał Miekler. — Biełaruskija i rasijskija kampanii, jakija majuć svaje filijały ŭ Polščy, siońnia faktyčna nie majuć nijakaj kankurencyi.

2. Zabarona na rehistracyju ŭ Polščy kampanij ź biełaruskim i rasijskim kapitałam.

Pavodle acenak, jak rasijanie, tak i biełarusy stvarajuć u Polščy pieravažna kampanii, jakija zajmajucca aŭtamabilnymi hruzapieravozkami. U 2021 hodzie 912 firmaŭ ź Biełarusi zarehistravali svaju dziejnaść u Polščy. Paśla ahresii Rasii suprać Ukrainy adbyŭsia rost — da maja 2022 hoda ich było 473. Sajuz pradprymalnikaŭ i pracadaŭcaŭ prapanavaŭ biełarusam dapamohu ŭ arhanizacyi kantaktnaha punkta.

3. Uviadzieńnie adkaznaści hruzaadpraŭščyka za apłatu pasłuh transpartnaj kampanii.

— Na hruzaadpravicielaŭ varta ŭździejničać, kab jany vybirali svaich pasrednikaŭ z rozumam. My chočam uvieści zakanadaŭčaje abaviazacielstva hruzaadpraŭščyka apłacić pasłuhu, kali paśla vykanańnia pieravozki vyśvietlicca, što pasredniki niepłaciežazdolnyja, — tłumačyć Rafał Miekler.

U toj ža čas jon adznačaje, što ŭ časy ekanamičnaha spadu, nizkich taryfaŭ i padaŭžeńnia terminaŭ apłaty ŭsio jašče zdarajecca, što z-za ŭdziełu ŭ łahistyčnym łancužku tak zvanych «iłžyvych» ekśpiedytaraŭ pieravozčyki nie atrymlivajuć apłatu paśla vykanańnia zamovy.

4. Adnaŭleńnie dazvołaŭ dla ŭkrainskich pieravozčykaŭ na dvuchbakovyja pieravozki.

— My budziem patrabavać ad urada adnavić hetyja patrabavańni, a taksama ŭvieści ŭmovu, što pieravozčyk, jaki ŭjazdžaje ŭ Polšču z Ukrainy, pavinien vykarystoŭvać transpartny srodak, jaki adpaviadaje standartu Jeŭra-3. Takaja ekałahičnaja ŭmova ŭ svoj čas była ŭviedzienaja ŭkrainskim bokam, ale nie našym, — tłumačyć Rafał Miekler.

Jon dadaŭ, što paśla ŭviadzieńnia ŭkrainskim bokam ekałahičnych umoŭ pieravozčyki, jakija da hetaha času ažyćciaŭlali pieravozki na ŭschod starymi aŭtamabilami z bolš nizkim jeŭrastandartam, pavinny šukać novyja maršruty.

• 16
• 0
• 7
• 2
• 2
• 1
• 2
• 0