«Supracoŭniki kanała vydatna viedali, što nichto vybary nie falsifikavaŭ, ale vyrašyli kazać advarotnaje». Čamu amierykanski «pakutnik» mała čym adroźnivajecca ad zorak BT

Karłsan syšoŭ litaralna praz paru dzion paśla taho, jak kiraŭnictva kanała pahadziłasia vypłacić bolš za 750 młn dalaraŭ kampanii Dominion Voting Systems. Heta adna z najbujniejšych kampanij u ZŠA, jakija absłuhoŭvajuć amierykanskija vybary.

Niekatory čas tamu firma padała ŭ sud na Fox News, pakolki supracoŭniki kanała abvinačvali sistemu Dominion u falsifikacyi vybaraŭ, u jakich prajhraŭ Tramp. Firma damahałasia ad kanała 1,6 młrd. Pa amierykanskich zakonach, u ramkach pracesu jurysty atrymali prava pabačyć unutranuju dakumientacyju, pierapisku, sms i h.d. I voś tut pačaŭsia treš.

Tut treba patłumačyć, što padčas vybaraŭ Fox News spačatku infarmavaŭ pra ŭsio zhodna z danymi «amierykanskaha CVK», što na vybarach pieramahaje Bajden. To-bok, spačatku tam nie hučaŭ tezis, što vybary sfalsifikavanyja. Ale potym kanał ubačyŭ prablemu. Hledačy pačali sychodzić na inšyja kansiervatyŭnyja kanały, drabniejšyja za Fox, dzie im kazali toje, što jany chacieli pačuć — što vybary sfalsifikavanyja. I tady Fox źmianiŭ dumku i pačaŭ kazać, što ŭ Trampa skrali pieramohu, što sistema kampanii Dominion całkam usio pierakruciła na karyść Bajdena.

Ale… dakumienty i ŭnutranaja pierapiska dakazali, što supracoŭniki kanała vydatna viedali, što nichto vybary nie falsifikavaŭ. Jany prosta vyrašyli havaryć advarotnaje, kab zachavać papularnaść u kansiervatyŭnaha hledača. Pra heta jany šmat razoŭ havaryli sami.

Jurysty apytvali ŭładalnika kampanii, miljardera Rupierta Mardaka. Jaho spytali, čamu kanał tak rabiŭ, kali jany viedali praŭdu? Čamu davali efirny čas aŭtaram kanśpirałahičnych teoryj? Mardak ščyra adkazvaŭ, što pryčyna — nie złaja vola, a… žadańnie zarabić hrošy. Ale dakumienty śviedčać, što sprava nie tolki ŭ hrašach. Sprava ŭ strachu pierad svaimi hledačami.

Adna ź pierapisak, jakuju apublikavali, datyčyć akurat Takiera Karłsana, zdymak jakoha dniami raźmiaściła na pieršaj staroncy navat «Saŭbiełka».

Ź pierapiski vynikaje, što pradziusar piša: u Trampa małaja efiektyŭnaść dziejańniaŭ. Karłsan adkazvaje: «Tak, u jaho usio kulhaje, jon vydatna ŭmieje tolki źniščać. U hetym jon biassprečny čempijon śvietu». Praz paru miesiacaŭ Karłsan piša: «My ŭžo vielmi blizkija da taho, kab chutka ihnaravać Trampa ŭ bolšaści efirnaha času».

U inšym paviedamleńni jon dadaje: «Jak ža ja jaho nienavidžu». Na druhi dzień paśla ataki na Kapitolij jon piša: «Tramp — heta demaničnaja siła, źniščalnik, ale nas (Fox) jon nie źniščyć». U efiry ž Karłsan nazyvaje napad «zvyčajnaj ekskursijaj», a Trampa nazyvaje «fantastyčnym prezidentam», u jakoha «skrali pieramohu».

U 2021 hodzie, jak padličyŭ New York Times, Takier Karłsan u bolš jak 100 vypuskach svajoj pieradačy raskazvaŭ, što vybary sfalsifikavanyja. U toj ža čas jon piša ŭ mejle inšaj viadučaj kanała pra inicyjatyvu Trampa nakont «skradzienych vybaraŭ»: «Usio heta varjactva, a jaho jurystka ničoha nie moža dakazać, jana davodzić usich, u tym liku mianie, da varjactva».

Tut treba dadać, što havorka pra jurystku Sidni Paŭeł. Jana prasoŭvała tezis pra falsifikacyju vybaraŭ. Sama jana zajaviła, što daviedałasia heta ad žančyny, jakaja moža padarožničać u časie. Mienavita sa spasyłkaj na jaje Sidni Paeŭł vystupała ŭ efiry Fox News. Karłsan u tyja dni pisaŭ pradziusaru, što jaje raspovied «poŭny absurd». Ale ŭ toj ža dzień jon paŭtaraŭ jaje tezisy, što «vybary skradzienyja»: «Pakul my nie viedajem, kolki dakładna hałasoŭ skradziena, ale my daviedajemsia».

Kali paźniej adna ź viadučych pastaviła pad sumnieŭ abvinavačańni Trampa, to Karłsan napisaŭ načalstvu, što «jaje treba zvolnić, bo jana škodzić kampanii, ceny akcyj padajuć». Inšyja supracoŭniki taksama skardziacca na viadučuju: «Jana źniščaje marku, jakuju my stvarali 25 hod». Jurysty atrymali pierapisku taksama dvuch viadučych, jakija skardzilisia adzin druhomu, što «abjektyŭnaja žurnalistyka złuje hledačoŭ».

Telekampanija nie admaŭlaje hetych supiarečnaściaŭ. Ale cikavaje jaje apraŭdańnie. Jana spasyłajecca na… svabodu relihii i svabodu słova ŭ ZŠA. Maŭlaŭ, my tak ličyli, ale nie havaryli, što heta fakt.

Asudzić Fox News było b składana, bo, pavodle amierykanskich zakonaŭ, nieabchodna dakazać śviadomuju złuju volu. A heta zrabić nadzvyčaj ciažka, bo patrebnyja dokazy, što złaja vola isnavała. Fox uvieś čas nastojvaŭ, što jany prosta pieradavali cytaty inšych i nie kanstatavali, što heta fakt. Tym nie mienš, jurystam Dominion udałosia atrymać ad kanała bolš za paŭmiljarda. A ŭ «jabaciek» źjaviŭsia amierykanski pakutnik, jaki mała čym adroźnivajecca ad zorak BT.

• 41
• 21
• 6
• 6
• 8